ലുലുവിനെ പൂട്ടാന്‍ രണ്ടും കല്‍പ്പിച്ച് രംഗത്ത് ഇറങ്ങിയ ജഗന്‍: പക്ഷെ രക്ഷകനായി അവതരിച്ച നായിഡു: ഒരു ആന്ധ്ര കഥ

ആന്ധ്രപ്രദേശിലെ വിവിധ നഗരങ്ങളില്‍ ലുലു ഗ്രൂപ്പിന്റെ വമ്പന്‍ മാള്‍ പദ്ധതികള്‍ക്ക് പൂർണ്ണ പിന്തുണയാണ് ടി ഡി സർക്കാർ നല്‍കുന്നത്. സ്വന്തം മുന്നണിയില്‍ നിന്ന് തന്നെ എതിർപ്പ് ഉയർന്നിട്ടും ഇതൊന്നും വകവെക്കാതെ ചന്ദ്രബാബു നായിഡു പദ്ധതികളുമായി മുന്നോട്ട് പോകാന്‍ ഗ്രൂപ്പിന് എല്ലാവിധ സഹായങ്ങളും നല്‍കുന്നു. എന്നാല്‍ മറുവശത്താകട്ടെ പ്രതിപക്ഷമായ വൈഎസ്ആർ കോണ്‍ഗ്രസ് നിരന്തരം വിമർശനവും പ്രതിഷേധങ്ങളുമാണ് നടത്തിക്കൊണ്ടിരിക്കുന്നത്.

വിജയവാഡ, വിശാഖപട്ടണം, തിരുപ്പതി തുടങ്ങിയ പ്രധാന നഗരങ്ങളില്‍ ലക്ഷക്കണക്കിന് കോടി രൂപയുടെ നിക്ഷേപത്തോടെ ലുലു ഗ്രൂപ്പ് ആരംഭിക്കുന്ന ഷോപ്പിംഗ് മാളുകളും ഹൈപ്പര്‍മാര്‍ക്കറ്റുകളും 'അഴിമതിയുടെ ഭാഗം' എന്ന് വിമര്‍ശിച്ച് വൈഎസ്ആര്‍സിപി നേതാക്കള്‍ ഇപ്പോഴും രംഗത്തുണ്ട്. പദ്ധതികള്‍ക്ക് അനുകൂലമായി സര്‍ക്കാര്‍ പ്രധാന ഭൂമികള്‍ 'കുറഞ്ഞ വിലയില്‍' വാടകയ്ക്ക് നല്‍കുന്നത് സംസ്ഥാനത്തിന്റെ സാമ്പത്തിക നഷ്ടത്തിന് കാരണമാകുമെന്നും അവര്‍ ആരോപിക്കുന്നു.

2019-ല്‍ മുഖ്യമന്ത്രി വൈ.എസ്. ജഗന്‍ മോഹന്‍ റെഡ്ഡി നയിക്കുന്ന വൈഎസ്ആര്‍സിപി സര്‍ക്കാര്‍ ലുലു ഗ്രൂപ്പിന് വിശാഖപട്ടണത്ത് ഭൂമി അനുവദിച്ചത് റദ്ദാക്കിയിരുന്നു. മുന്‍ ടിഡിപി സര്‍ക്കാര്‍ 'നിയമലംഘനങ്ങളും ഭൂമി അനുവദനത്തിലെ അപക്വതകളും' കാരണം 13.83 ഏക്കര്‍ പ്രധാന ഭൂമി വെറും 4 ലക്ഷം രൂപയ്ക്ക് ഏക്കറിന് നല്‍കിയിരുന്നുവെന്നായിരുന്നു വൈഎസ്ആര്‍സിപി ഭരണകൂടം ഇതിന് കാരണമായി പറഞ്ഞത്.

ഭൂമിയുടെ വിപണി മൂല്യം 50 കോടി രൂപയായിരുന്നെങ്കിലും, അത് 'കുറഞ്ഞ വിലയില്‍' നല്‍കിയത് സംസ്ഥാന ഖജനാവിന് വലിയ നഷ്ടമുണ്ടാക്കുമെന്നായിരുന്നു അന്നത്തെ വിമര്‍ശനം. ഈ തീരുമാനത്തിനോട് പ്രതികരിച്ച് ലുലു ഗ്രൂപ്പ് 'ആന്ധ്രയില്‍ ഭാവിയില്‍ നിക്ഷേപിക്കില്ല' എന്ന് പ്രഖ്യാപിക്കുകയും ചെയ്തു. തുടർന്ന് 2200 കോടി രൂപയുടെ പദ്ധതി ഉപേക്ഷിച്ച്, ഗ്രൂപ്പ് തെലങ്കാന, കേരളം, തമിഴ്നാട് തുടങ്ങിയ സംസ്ഥാനങ്ങളിലേക്ക് മാറ്റുകയും ചെയ്തു.

എന്നാല്‍, 2024-ല്‍ ടിഡിപി സഖ്യ സര്‍ക്കാര്‍ അധികാരത്തിലെത്തിയതോടെ ലുലു പദ്ധതികള്‍ വീണ്ടും പുനരുജ്ജീവിപ്പിക്കപ്പെട്ടു. മുഖ്യമന്ത്രി എന്‍. ചന്ദ്രബാബു നായിഡു, ലുലു ചെയര്‍മാന്‍ എം.എ. യൂസുഫലി എന്നിവരുടെ കൂടിക്കാഴ്ചയ്ക്ക് ശേഷം വിശാഖപട്ടണത്ത് 8 സ്ക്രീന്‍ IMAX മള്‍ട്ടിപ്ലക്സുമായുള്ള വമ്പന്‍ മാള്‍, വിജയവാഡയിലും തിരുപ്പതിയിലും ഹൈപ്പര്‍മാര്‍ക്കറ്റുകള്‍, ഫുഡ് പ്രോസസിംഗ് യൂണിറ്റുകള്‍ എന്നിവയ്ക്ക് അനുമതി ലഭിച്ചു. 1222 കോടി രൂപയുടെ ഈ പദ്ധതികള്‍ 1500-ലധികം തൊഴിലവസരങ്ങള്‍ സൃഷ്ടിക്കുമെന്ന് സര്‍ക്കാര്‍ അവകാശപ്പെടുന്നു. എന്നാല്‍, വൈഎസ്ആര്‍സിപി ഇതിനെ 'മറ്റൊരു അഴിമതി'യായി ചിത്രീകരിക്കുന്നു.

പുതിയ അഴിമതി ആരോപണങ്ങള്‍ പ്രകാരം, ടിഡിപി സര്‍ക്കാര്‍ വിജയവാഡ, വിശാഖപട്ടണം, മല്ലവല്ലി പ്രദേശങ്ങളിലെ പ്രധാന ഭൂമികള്‍ 'താഴ്ന്ന വിലയില്‍' 99 വര്‍ഷത്തേക്ക് വാടകയ്ക്ക് നല്‍കുന്നു. ഉദാഹരണത്തിന്, വിശാഖപട്ടണത്തെ 25.37 ഏക്കര്‍ ഭൂമി വെറും 7.08 കോടി രൂപ വാര്‍ഷിക വാടകയ്ക്കും മല്ലവല്ലിയിലെ 7.48 ഏക്കര്‍ ഭൂമി 50 ലക്ഷം രൂപയ്ക്ക് 66 വര്‍ഷത്തേക്കുമാണ് ലുലുവിന് കൈമാറിയത്.

മുന്‍ സര്‍ക്കാര്‍ സമാന ഭൂമി സൈയോണ്‍ ബെവറേജസിന് 1.92 കോടി രൂപയ്ക്ക് നല്‍കിയിരുന്നെങ്കിലും, ഇപ്പോള്‍ അത് നാലിരട്ടി കുറച്ചുവെന്ന് വൈഎസ്ആര്‍സിപി ചൂണ്ടിക്കാണിക്കുന്നു. കൂടാതെ, പദ്ധതിക്ക് 170 കോടി രൂപ സബ്‌സിഡി, വാടക മാറ്റ് സൗകര്യം എന്നിവ നല്‍കുന്നത് 'പ്രൈവറ്റ് കമ്പനിയെ അനുകൂലമായി' മാറ്റുന്നുവെന്നും അവര്‍ ആരോപിക്കുന്നു. യൂസുഫലിയുടെ ജനുവരി കത്തിന്റെ അടിസ്ഥാനത്തില്‍ 'പ്രതിയോഗിതാപരമായ ടെണ്ടര്‍' ഇല്ലാതെ തീരുമാനിച്ചത് സുതാര്യതയില്ലാത്തതാണെന്നും വിമര്‍ശനം.

വിജയവാഡയില്‍ ലുലു മാളിനായി APSRTC, എന്‍ഡൗമെന്റ്, മാര്‍ക്ക്‌ഫെഡ് ഭൂമികള്‍ പരിഗണിക്കുന്നതിനെതിരെ സിപിഎം, പ്രാദേശിക ആക്ടിവിസ്റ്റുകള്‍, വിരമിച്ച APSRTC ജീവനക്കാര്‍ എന്നിവരും രംഗത്തെത്തി. 1990-കള്‍ വരെ പ്രധാന ബസ് സ്റ്റാന്‍ഡായിരുന്ന ഗവണ്‍ണര്‍പേട് ഡിപ്പോയുടെ ചരിത്രപരവും പ്രവര്‍ത്തനപരവുമായ പ്രാധാന്യം പരിഗണിക്കണമെന്ന് അവര്‍ ആവശ്യപ്പെടുന്നു. പൊതു ഗതാഗതത്തിന് പകരം 'കോര്‍പ്പറേറ്റ്' പദ്ധതികള്‍ക്ക് മുന്‍ഗണന നല്‍കുന്നത് സംസ്ഥാനത്തിന്റെ അടിസ്ഥാന സൗകര്യങ്ങളെ ദുര്‍ബലപ്പെടുത്തുമെന്നുമാണ് വിമര്‍ശനം.

ഈ വിവാദത്തിനിടെയാണ്, പവന്‍ കല്യാന്‍ നയിക്കുന്ന ജനസേന പാര്‍ട്ടിയും ലുലു പദ്ധതികളോട് സംശയം പ്രകടിപ്പിച്ചിച്ച് രംഗത്ത് വന്നതെ. എന്നിരുന്നാലും, സര്‍ക്കാര്‍ പദ്ധതികളെ 'സൗദി വിഷണ്‍ 2030' പോലുള്ള ദേശീയ ലക്ഷ്യങ്ങളുമായി ചേര്‍ത്ത് സാമ്പത്തിക വളര്‍ച്ചയുടെ ഭാഗമായി ചിത്രീകരിക്കുന്നു. 5000-ലധികം തൊഴിലവസരങ്ങളും വിദേശ നിക്ഷേപവും സൃഷ്ടിക്കുമെന്ന് അവകാശപ്പെടുന്ന ടിഡിപി, വൈഎസ്ആര്‍സിപിയുടെ എതിര്‍പ്പിനെ 'രാഷ്ട്രീയ പ്രത്യാഘാതം' എന്ന് പറഞ്ഞ് തള്ളിക്കളയുകയാണ്.