തെലങ്കാനയില്‍ കോണ്‍ഗ്രസ് വരുമോ: 50 ലേറെ സീറ്റുകളില്‍ വിജയസാധ്യതയെന്ന് പഠനം

Updated: Thursday, March 3, 2022, 16:17 [IST]

ഹൈദരാബാദ്: സംഗറെഡ്ഡി എംഎൽഎ ടി ജഗ്ഗ റെഡ്ഡിയുടെ രാജി നാടകവും മുതിർന്ന നേതാക്കൾ തമ്മിലുള്ള തർക്കവും രൂക്ഷമാണെങ്കിലും അടുത്ത വർഷം നടക്കാനിരിക്കുന്ന നിയമസഭ തിരഞ്ഞെടുപ്പ് സംബന്ധിച്ച് തെലങ്കാനയിലെ കോണ്‍ഗ്രസ് നേതൃത്വം വളരെ വലിയ ആത്മവിശ്വാസത്തിലാണ്. എ ഐ സി സി ഈയിടെ നടത്തിയ ഒരു സർവേയിൽ ഭരണ കക്ഷിയായ ടി ആർ എസ് സംസ്ഥാനത്ത് ഭരണവിരുദ്ധ വികാരം നേരിടുന്നുണ്ടെന്നും കോൺഗ്രസിന് 50 നിയമസഭാ മണ്ഡലങ്ങളിൽ വിജയസാധ്യതയുണ്ടെന്നുമാണ് അഭിപ്രായപ്പെടുന്നത്.

നിയമസഭാ ഉപതിരഞ്ഞെടുപ്പിൽ ബി ജെ പി മികച്ച പ്രകടനം കാഴ്ചവെച്ചിട്ടും ഗ്രാമപ്രദേശങ്ങളിൽ ബി ജെ പിയുടെ ശക്തിക്കുറവ് മുതലാക്കി ഭിന്നതകൾ മാറ്റിവെച്ച് നേതാക്കൾ ഒരു ടീമായി പ്രവർത്തിച്ചാൽ 2023ലെ നിയമസഭാ തിരഞ്ഞെടുപ്പിലും 2024ലെ ലോക്‌സഭാ തിരഞ്ഞെടുപ്പിലും മികച്ച പ്രകടനം കാഴ്ചവെക്കാൻ പാർട്ടിക്ക് അവസരമുണ്ടെന്നും സർവേ പറയുന്നു. 119 മണ്ഡലങ്ങളിൽ ഭൂരിപക്ഷത്തിലും ബി ജെ പിക്ക് ശക്തരായ സ്ഥാനാർത്ഥികളില്ലെന്നും സർവെ ചൂണ്ടിക്കാട്ടുന്നു. കഴിഞ്ഞ മൂന്ന് മാസത്തിനിടെ 119 നിയമസഭാ മണ്ഡലങ്ങളിൽ സ്വകാര്യ ഏജൻസി നടത്തിയ സർവേയാണ് എ ഐ സി സിക്ക് ലഭിച്ചത്.

സർവേയുടെ വിശദാംശങ്ങൾ മുഴുവനായി പാർട്ടി അംഗങ്ങളുമായി പങ്കുവെക്കാനില്ലെന്നും എന്നാൽ നൽഗൊണ്ട, ഖമ്മം, രംഗറെഡ്ഡി, മഹ്ബൂബ് നഗർ ജില്ലകളിലെ പാർട്ടിയുടെ പ്രവർത്തനം നല്ല രീതിയിലാണ് മുന്നോട്ട് പോവുന്നതെന്ന് ഞങ്ങള്‍ മനസ്സിലാക്കിയെന്നും ടി പി സി സി വർക്കിംഗ് പ്രസിഡന്റുമാരായ ജെ ഗീതാ റെഡ്ഡിയും മഹേഷ് കുമാർ ഗൗഡും എന്നിവർ വ്യക്തമാക്കി. നിസാമാബാദ്, മേദക്, കരിംനഗർ, അദിലാബാദ് ജില്ലകളിൽ കോൺഗ്രസും ടി ആർ എസും തമ്മിൽ ഇഞ്ചോടിഞ്ച് പോരാട്ടമാണ് നടക്കുന്നത്.

അമ്മയേപ്പൊലെ തന്നെയുണ്ട്: വൈറലായി മീനാക്ഷി ദിലീപിന്റെ പുതിയ ചിത്രം

അതേസമയം സംസ്ഥാനത്ത് കോൺഗ്രസിന്റെ സാധ്യതകൾ മെച്ചപ്പെട്ടുവെന്നത് പറയാന്‍ സമമായിട്ടില്ലെന്നായിരുന്നു രാഷ്ട്രീയ നിരീക്ഷകയും സാമൂഹിക പ്രവർത്തകയുമായ സി രേഖ റാവു അഭിപ്രായപ്പെട്ടത്. അതേസമയം, തെലങ്കാനയില്‍ അടുത്ത വർഷം നടക്കാനിരിക്കുന്ന നിയമസഭാ തെരഞ്ഞെടുപ്പിൽ വിജയിക്കാനായി ഭരണകക്ഷിയായ തെലങ്കാന രാഷ്ട്ര സമിതി രാഷ്ട്രീയ തന്ത്രജ്ഞനായ പ്രശാന്ത് കിഷോറിന് 500 കോടി രൂപ വാഗ്ദാനം ചെയ്തുവെന്ന ആരോപണവുമായി സംസ്ഥാന കോണ്‍ഗ്രസ് കഴിഞ്ഞ ദിവസം രംഗത്ത് എത്തിയിരുന്നു.

വരാനിരിക്കുന്ന തെരഞ്ഞെടുപ്പുകൾക്കായി പ്രശാന്ത് കിഷോറിന്റെ നേതൃത്വത്തിലുള്ള ഇന്ത്യൻ പൊളിറ്റിക്കൽ ആക്ഷൻ കമ്മിറ്റിയുടെ (ഐ-പാക്) സേവനം ഉപയോഗപ്പെടുത്താനും ദേശീയ തലത്തില്‍ പാർട്ടിയുടെ ഇടപെടലുകള്‍ ശക്തിപ്പെടുത്താനാനും എത്തിക്കാനും ടി ആർ എസ് മേധാവിയും തെലങ്കാന മുഖ്യമന്ത്രിയുമായ കെ ചന്ദ്രശേഖർ റാവു പദ്ധതിയിടുന്നുവെന്ന വാർത്തകള്‍ പുറത്ത് വന്നതിന് പിന്നാലെയായിരുന്നു കോണ്‍ഗ്രസ് നേതൃത്വത്തിന്റെ പ്രതികരണം.