'ബിജെപി വിളിച്ചാല്‍ നോ എന്നു പറയില്ല'; വിളികാത്ത് സുരേഷ് ഗോപി

തിരുവനന്തപുരം: വിഴിഞ്ഞം പ്രസംഗവുമായി ബന്ധപ്പെട്ട വിവാദം തുടരവെ താന്‍ ബിജെപിയിലേക്ക് പോകുകയാണെന്ന സുചന നല്‍കി നടന്‍ സുരേഷ് ഗോപി. ബിജെപി വിളിച്ചാല്‍ നോ എന്നു പറയില്ല. താനല്ല ഇക്കാര്യത്തില്‍ ആദ്യം തീരുമാനമെടുക്കേണ്ടത്, ബിജെപിയാണ്. അവര്‍ വിളിച്ചാല്‍ സന്തോഷത്തോടെ അംഗമാകുമെന്ന് സുരേഷ് ഗോപി പറഞ്ഞു.

മോദിജിയോ അദ്ദേഹത്തിന്റെ അണികളോ ആവശ്യപ്പെട്ടാല്‍ നോ എന്ന് പറയാന്‍ തനിക്കാവില്ല. രാഷ്ട്രീയ പ്രവേശവും നിലപാടുകളും ഇത്രയും നാള്‍ വേണ്ടെന്നു വയ്ക്കുകയായിരുന്നു. ഇനി അങ്ങിനെയല്ല. വിഴിഞ്ഞത്ത് നടന്ന പ്രസംഗം അടര്‍ത്തിമാറ്റിയെടുത്ത് ചിലര്‍ വിവാദമാക്കുകയായിരുന്നു. ചിലര്‍ ദുഷ്ടലാക്കോടെയാണ് തന്റെ വാചകങ്ങള്‍ ഉപയോഗിച്ചതെന്നും അദ്ദേഹം പറഞ്ഞു.

ബിജെപിക്കുവേണ്ടി മാത്രമല്ല. താന്‍ എല്ലാ പാര്‍ട്ടികള്‍ക്കുവേണ്ടിയും പ്രവര്‍ത്തിച്ചിട്ടുണ്ട്. കോണ്‍ഗ്രസിനുവേണ്ടിയും പ്രവര്‍ത്തിച്ചിട്ടുണ്ട്. എ കെ ആന്റണിയോട് ചോദിച്ചാല്‍ ഇക്കാര്യം അറിയാം. വിഴിഞ്ഞം പ്രസംഗവുമായി ബന്ധപ്പെട്ട് വീക്ഷണം പത്രത്തില്‍ വന്ന മുഖപ്രസംഗം താന്‍ വായിച്ചിട്ടില്ലെന്നും സുരേഷ് ഗോപി വ്യക്തമാക്കി.

വിഴിഞ്ഞം പദ്ധതി പ്രാവര്‍ത്തികമാക്കാന്‍ ഹിന്ദുക്കള്‍ മുന്നിട്ടിറങ്ങണമെന്നായിരുന്നു സുരേഷ് ഗോപി കഴിഞ്ഞദിവസം വിഴഞ്ഞത്തു നടന്ന പ്രതിഷേധ പരിപാടിക്കിടെ പ്രസംഗിച്ചത്. സുരേഷ് ഗോപി വികസന കാര്യത്തിലും വര്‍ഗീയത കലര്‍ത്തുകയാണെന്ന് ആരോപിച്ച് ഒട്ടേറെ പേര്‍ അദ്ദേഹത്തെ വിമര്‍ശിക്കുകയും ചെയ്തു. സോഷ്യല്‍ മീഡിയയിലും സുരേഷ് ഗോപിക്കെതിരെ രൂക്ഷ വിമര്‍ശനമാണ് ഉയര്‍ന്നത്.

English summary

Actor Suresh Gopi ready to join BJP