ന്യൂനപക്ഷങ്ങളെ കൂടെ നിര്ത്താന് സംഘപരിവാര് നടത്തുന്ന പ്രവര്ത്തനങ്ങള് പരിഹാസ്യം: സിപിഎം
തിരുവനന്തപുരം: ന്യൂനപക്ഷ ജനവിഭാഗങ്ങളെ ആന്തരിക ഭീഷണിയായി പ്രഖ്യാപിച്ച സംഘപരിവാര് അവരെ കൂടെ നിര്ത്താന് നടത്തുന്ന പ്രവര്ത്തനങ്ങള് അങ്ങേയറ്റം പരിഹാസ്യമാണെന്ന് സി പി എം പ്രസ്താവനയിലൂടെ അറിയിച്ചു. ഈസ്റ്റര് ദിനത്തില് ബി ജെ പി നേതാക്കള് ബിഷപ്പ് ഹൗസുകള് സന്ദര്ശിക്കുന്ന പശ്ചാത്തലത്തിലാണ് സി പി എം വിമര്ശനം.
ആര് എസ് എസിന്റെ ത്വാതിക ഗ്രന്ഥമായ വിചാരധാരയില് ആന്തരിക ഭീഷണിയായി പ്രഖ്യാപിച്ചവരാണ് ക്രിസ്ത്യാനികള് ഉള്പ്പടെയുള്ള ന്യൂനപക്ഷ ജനവിഭാഗങ്ങളും കമ്മ്യൂണിസ്റ്റുകാരും. അതുകൊണ്ട് തന്നെയാണ് ന്യൂനപക്ഷ ജനവിഭാഗങ്ങള്ക്ക് നേരെയും കമ്മ്യൂണിസ്റ്റ്കാര്ക്കെതിരെയും അക്രമപരമ്പര തന്നെ രാജ്യത്ത് അരങ്ങേറിയത്. ഗ്രഹാം സ്റ്റേയിന്സിനെ പോലെയുള്ളവരെ ചുട്ടുകൊന്നതും ഹിന്ദുത്വവാദികളാണ്.
കഴിഞ്ഞ ക്രിസ്തുമസ് ആഘോഷവേളയില് രാജ്യത്തെമ്പാടും വമ്പിച്ച ആക്രമണമാണ് കന്യാസ്ത്രികള് ഉള്പ്പടെയുള്ളവര്ക്ക് നേരെ ഉണ്ടായത്. ഛത്തീസ്ഗണ്ഡിലുണ്ടായ ആക്രമണ പരമ്പരയ്ക്ക് അന്ത്യമായിട്ടുമില്ല. ഈ ഘട്ടത്തിലാണ് ക്രിസ്ത്യന് മതസ്ഥാപനങ്ങളും പുരോഹിതന്മാരെയും സന്ദര്ശിക്കുന്ന പരിപാടിയുമായി പ്രധാനമന്ത്രി തൊട്ടുള്ള ബിജിപി നേതാക്കള് രംഗത്തിറങ്ങിയിരിക്കുന്നത്. ബിജെപിയുടെ നിലപാട് അറിയാവുന്ന പ്രബുദ്ധരായ കേരള ജനത ഇത് തിരിച്ചറിയുക തന്നെ ചെയ്യും.
സംഘപരിവാറിന്റെ രാഷ്ട്രീയ നിലപാടുകള് ആപല്ക്കരമാണെന്ന് തിരിച്ചറിഞ്ഞ് ക്രിസ്ത്യന് ന്യൂനപക്ഷ ജനവിഭാഗങ്ങള് തന്നെ പ്രക്ഷോഭരംഗത്ത് ഇറങ്ങിയിട്ട് ദിവസങ്ങളായിട്ടെയുള്ളൂ. പല സംസ്ഥാനങ്ങളിലും പ്രതിപക്ഷ നേതാക്കളെ തങ്ങളുടെ വരുതിയില് കൊണ്ടുവരാന് സംഘപരിവാര് ഉപയോഗിച്ച ഭീഷണിയും പ്രലോഭനവും ക്രിസ്ത്യന് ന്യൂനപക്ഷ വിഭാഗങ്ങളോടും ആരംഭിച്ചിരിക്കുകയാണ്. അരമനകള് തോറുമുള്ള ബിജെപി നേതാക്കളുടെ യാത്രകള് ഇതിന് അടിവരയിടുന്നതാണ്. ശക്തമായ മതനിരപേക്ഷ കാഴ്ചപ്പാടുള്ള കേരള ജനത ഈ നാടകങ്ങളെ അവജ്ഞയോടെ തള്ളിക്കളയുമെന്നും സി പി എം വ്യക്തമാക്കി.
ബി ജെ പിയുടെ സന്ദര്ശനത്തിനെതിരെ കോണ്ഗ്രസും രംഗത്തെത്തിയിരുന്നു. ക്രിസ്ത്യാനികളെ എവിടെ കണ്ടാലും തല്ലണം എന്നാണ് കര്ണാടകയിലെ ബിജെപി നേതാവ് പറഞ്ഞത്. തല്ലിയിട്ട് വരുന്നവരെ സംരക്ഷിക്കാം എന്നും ബിജെപി ഉറപ്പു നല്കി. ഈ പാര്ട്ടിയെ രക്ഷകരായി തെറ്റിദ്ധരിച്ചിരിക്കുന്ന ചെറിയൊരു വിഭാഗം ക്രിസ്തുമത വിശ്വാസികള് കേരളത്തിലുമുണ്ട്. വെളുത്ത ചിരിയുമായി ബിജെപി നേതാക്കള് നിങ്ങളെ സമീപിക്കുന്നുണ്ടെങ്കില് അത് ചെകുത്താന്റെ ചിരിയാണെന്ന് ഇനിയെങ്കിലും തിരിച്ചറിയണമെന്നാണ് കെ സുധാകരന് പറഞ്ഞത്.
സംസ്ഥാനത്തെ ബിഷപ്പ് ഹൗസുകള് കയറിയിറങ്ങി കേരളത്തിലെ ബി.ജെ.പി നേതാക്കാള് ഈസ്റ്റര് ആശംസകള് നേരുന്നത് ഇരട്ടത്താപ്പും പരിഹാസ്യവുമാണെന്ന് പ്രതിപക്ഷ നേതാവ് വി ഡി സതീശനും പറഞ്ഞിരുന്നു. നിയമസഭ തെരഞ്ഞെടുപ്പ് പ്രഖ്യാപിച്ചിരിക്കുന്ന കര്ണാടകത്തില് ഒരു ബി.ജെ.പി മന്ത്രി ജനങ്ങളോട് ആഹ്വാനം ചെയ്തത് എല്ലാവരും കേള്ക്കേണ്ടതാണ്. ക്രൈസ്തവരെ ഓടിച്ചിട്ട് അടിക്കണമെന്നും അവര് വീടുകളിലേക്ക് വരുന്നത് മതപരിവര്ത്തനം നടത്താനാണെന്നുമാണ് മന്ത്രി മുനിരത്ന പറഞ്ഞത്. രാജ്യവ്യാപകമായി ഇതേ നിലപാട് തന്നെയാണ് ബി.ജെ.പി ക്രൈസ്തവരോട് കാട്ടുന്നതെന്നും വി ഡി സതീശന് വ്യക്തമാക്കി.
Click it and Unblock the Notifications
Sign in with Google