'ഡെത്ത് ഇന്ഫര്മേഷന് പോര്ട്ടൽ'; കൊവിഡ് മരണ വിവരം അറിയാൻ പ്രത്യേക സംവിധാനവുമായി സംസ്ഥാന സർക്കാർ
തിരുവനന്തപുരം; സംസ്ഥാനത്തെ കോവിഡ് 19 മരണങ്ങളുടെ വിവരങ്ങളറിയാന് പുതിയ കോവിഡ് 19 ഡെത്ത് ഇന്ഫര്മേഷന് പോര്ട്ടല് സംസ്ഥാന സര്ക്കാര് പുറത്തിറക്കി. ആരോഗ്യ വകുപ്പ് മന്ത്രി വീണാ ജോർജാണ് ഇക്കാര്യം അറിയിച്ചത്. പൊതുജനങ്ങള്ക്കും സര്ക്കാര് സ്ഥാപനങ്ങള്ക്കും ഒരുപോലെ ഉപയോഗിക്കാന് കഴിയുന്നതാണ് പോര്ട്ടലെന്ന് മന്ത്രി പറഞ്ഞു.
പൊതുജനത്തിന് അവരുടെ ബന്ധുക്കളുടെ മരണത്തിന്റെ വിശദാംശങ്ങള് തിരയുന്നതിനുള്ള സംവിധാനം പോര്ട്ടലിലുണ്ട്. സര്ക്കാര് ഔദ്യോഗികമായി കോവിഡ് മരണമാണെന്ന് റിപ്പോര്ട്ട് ചെയ്തവ എല്ലാം ഈ പോര്ട്ടലിലൂടെ കണ്ടെത്താനാകും. പേര്, ജില്ല, മരണ തീയതി തുടങ്ങിയ വിശദാംശങ്ങള് നല്കിയാല് പോര്ട്ടലില് നിന്ന് വിവരങ്ങള് ലഭ്യമാകുന്നതാണെന്നും മന്ത്രി വ്യക്തമാക്കി.
ഇതുകൂടാതെ പ്രഖ്യാപിക്കപ്പെട്ട കോവിഡ് മരണങ്ങളുടെ, ഡി.എം.ഒ. നല്കുന്ന ഡെത്ത് ഡിക്ലറേഷന് ഡോക്യുമെന്റിന്റെ ആധികാരികത പരിശോധിക്കുന്നതിന് വിവിധ സര്ക്കാര് സ്ഥാപനങ്ങള്ക്ക് കഴിയുന്നതാണ്. നിലവില് 22.07.2021 വരെയുള്ള മരണങ്ങള് ലഭ്യമാണ്. 22.07.2021 ന് ശേഷം പ്രഖ്യാപിച്ച മരണങ്ങള് ഉടന് തന്നെ അപ്ഡേറ്റ് ചെയ്യുമെന്നും മന്ത്രി അറിയിച്ചു.
Recommended Video
അതേസമയം സംസ്ഥാനത്ത് ഇന്ന് 117 മരണങ്ങളാണ് സ്ഥിരീകരിച്ചത്. ഇന്ന് 22,040 പേര്ക്ക് കൂടി രോഗം സ്ഥിരികരിച്ചു. മലപ്പുറം 3645, തൃശൂര് 2921, കോഴിക്കോട് 2406, എറണാകുളം 2373, പാലക്കാട് 2139, കൊല്ലം 1547, ആലപ്പുഴ 1240, കണ്ണൂര് 1142, തിരുവനന്തപുരം 1119, കോട്ടയം 1077, കാസര്ഗോഡ് 685, വയനാട് 676, പത്തനംതിട്ട 536, ഇടുക്കി 534 എന്നിങ്ങനേയാണ് ജില്ലകളില് ഇന്ന് രോഗ ബാധ സ്ഥിരീകരിച്ചത്.