ജിഷയെ കൊല്ലാന് ഉപയോഗിച്ച കത്തി കണ്ടെടുത്തു
പെരുമ്പാവൂര്: ജിഷ വധത്തില് നിര്ണായകമായ മറ്റൊരു തെളിവുകൂടി പോലീസ് ശേഖരിച്ചു. ജിഷയെ കൊല്ലാന് ഉപയോഗിച്ച കത്തി പ്രതിയുടെ താമസസ്ഥലത്തുനിന്നും അന്വേഷണസംഘം കണ്ടെടുത്തു. പെരുമ്പാവൂര് ഇരിങ്ങോള് വൈദ്യശാലപ്പടിയിലായിരുന്നു അസം സ്വദേശിയായ അമീന് ഉള് ഇസ്ലാം താമസിച്ചുവന്നിരുന്നത്.
പ്രതിയെ മൊഴിയെ തുടര്ന്ന് പോലീസ് ഇവിടെ പരിശോധന നടത്തി ആയുധം കണ്ടെടുക്കുകയായിരുന്നു. കത്തിയില് രക്തം പുരണ്ടിട്ടുണ്ടെന്നാണ് സൂചന. ജിഷയെ കൊലപ്പെടുത്തുമ്പോള് ധരിച്ചിരുന്ന വസ്ത്രവും ഇവിടെനിന്നും കണ്ടെടുത്തു. ഇവ രണ്ടും ഫോറന്സിക് പരിശോധനയ്ക്ക് വിധേയമാക്കാനാണ് പോലീസ് തീരുമാനം.
വിശദമായ ചോദ്യം ചെയ്യലിനുശേഷം ആലുവ പോലീസ് ക്ലബ്ബിലെത്തിച്ചശേഷം പ്രതിയുടെ അറസ്റ്റ് രേഖപ്പെടുത്തിയതായി എഡിജിപി ബി സന്ധ്യ പറഞ്ഞു. പ്രതിയെ അടുത്ത ദിവസം തന്നെ തിരിച്ചറിയല് പരേഡിന് ഹാജരാക്കും. പ്രതിയുടെ അറസ്റ്റിനുശേഷം പെരുമ്പാവൂരില് ജിഷയുടെ അമ്മയെ സന്ധ്യ സന്ദര്ശിച്ചിരുന്നു.
ചോദ്യം ചെയ്യലില് പ്രതി കുറ്റം സമ്മതിച്ചിട്ടുണ്ടെങ്കിലും വിചാരണ വേളയില് മൊഴിമാറ്റാമെന്നിരിക്കെ ശക്തമായ തെളിവുകളോടെ കുറ്റപത്രം തയ്യാറാക്കാനാണ് അന്വേഷണ സംഘത്തിന് ലഭിച്ച നിര്ദ്ദേശം. സംഭവത്തിന് ദൃക്സാക്ഷികളില്ലാത്തതിനാല് സാഹചര്യത്തെളിവുകളും ഡിഎന്എ ഉള്പ്പെടെയുള്ള ശാസ്ത്രീയ തെളിവുകളുമാണ് പോലീസിന് ആശ്രയം. പ്രതിയെ തെളിവെടുപ്പിനെത്തിക്കുന്നതോടെ കൂടുതല് തെളിവുകള് ലഭിക്കുമെന്ന പ്രതീക്ഷയിലാണ് പോലീസ്.