'അപമാനഭാരം കൊണ്ട് തലകുനിക്കുന്നു': മണിപ്പൂര് സംഭവങ്ങളില് പ്രതികരിച്ച് ഗവര്ണര്
തിരുവനന്തപുരം: മണിപ്പൂരില് നടക്കുന്ന അതിക്രമങ്ങളില് പ്രതികരിച്ച് കേരള ഗവര്ണര് അരിഫ് മുഹമ്മദ് ഖാന്. സ്ത്രീകളെ കൂട്ടബലാത്സംഗം ചെയ്യുകയും സ്ത്രീകളെ നഗ്നരാക്കി നടത്തിക്കുകയും ചെയ്ത സംഭവത്തിലാണ് ഗവര്ണറുടെ പ്രതികരണം. അപമാനഭാരം കൊണ്ട് തലകുനിക്കുകയാണെന്ന് ഗവര്ണര് പറഞ്ഞു. വേദന പ്രകടിപ്പിക്കാന് വാക്കുകളില്ല. ഒരു മനുഷ്യന് എങ്ങനെ സ്ത്രീകളോട് ഇത്ര ക്രൂരമാകാന് കഴിയുമെന്ന് ആരിഫ് മുഹമ്മദ് ഖാന് ചോദിച്ചു.
കഴിഞ്ഞ ദിവസം മുഖ്യമന്ത്രി പിണറായി വിജയനും മണിപ്പൂര് അതിക്രമങ്ങളില് പ്രതികരിച്ച് രംഗത്തെത്തിയിരുന്നു. അധികാര രാഷ്ട്രീയ ലക്ഷ്യങ്ങള്ക്കായി വിദ്വേഷം വിതച്ചുകൊണ്ട് മണിപ്പൂരിനെ കലാപഭൂമിയാക്കുന്ന സംഘപരിവാര് അജണ്ടയെ രാജ്യത്തെ മതനിരപേക്ഷ സമൂഹം തിരിച്ചറിയണമെന്നാണ് മുഖ്യമന്ത്രി പിണറായി വിജയന് പറഞ്ഞത്.
'മണിപ്പൂരില് നിന്ന് അനുദിനം സ്തോഭജനകമായ വാര്ത്തകളാണ് വരുന്നത്. രണ്ടുമാസത്തിലധികമായി തുടരുന്ന വംശീയകലാപത്തെ ഭയാശങ്കകളോടെ മാത്രമേ നോക്കി കാണാന് കഴിയൂ. അത്യന്തം ഭയാനകമായ ദൃശ്യങ്ങളാണ് മനുഷ്യ മനഃസാക്ഷിയെ മുറിവേല്പ്പിച്ചുകൊണ്ട് തുടര്ച്ചയായി വന്നുകൊണ്ടിരിക്കുന്നത്. അങ്ങേയറ്റം നിന്ദ്യവും അതി ക്രൂരവുമായ രീതിയിലാണ് കുക്കി വിഭാഗത്തിലെ സ്ത്രീകള് ആള്ക്കൂട്ട കലാപകാരികളാല് വേട്ടയാടപ്പെട്ടത്. കലാപം ആരംഭിച്ചതിന്റെ തൊട്ടടുത്ത ദിവസങ്ങളിലെ ദൃശ്യങ്ങളാണ് ഇപ്പോള് പുറത്തുവന്നത്.'
'മണിപ്പൂരിലെ പര്വത-താഴ്വര നിവാസികള് തമ്മിലുള്ള ചരിത്രപരമായ വൈരുദ്ധ്യങ്ങള്ക്കുമേല് എരിതീയില് എണ്ണയൊഴിച്ച് അതിനെ വര്ഗ്ഗീയമായി ആളിക്കത്തിക്കുകയാണ്. ആസൂത്രിതമായ ക്രൈസ്തവ വേട്ടയാണ് കലാപത്തിന്റെ മറവില് നടക്കുന്നതെന്ന് വ്യക്തമാണ്. ഗോത്രവിഭാഗങ്ങളുടെ ക്രൈസ്തവ ദേവാലയങ്ങള് സംഘടിതമായി ആക്രമിച്ചു തകര്ക്കപ്പെടുന്ന നിലയാണ്'.
'സമാധാനം പുനഃസ്ഥാപിക്കാന് ബാധ്യസ്ഥരായവര് തന്നെ കലാപം ആളിക്കത്തിക്കാന് ശ്രമിക്കുന്നതായാണ് വാര്ത്തകള് വരുന്നത്. മണിപ്പൂര് വിഷയത്തിലെ കേന്ദ്ര സര്ക്കാരിന്റെ കുറ്റകരമായ മൗനവും സംഘപരിവാര് അജണ്ടയും ശക്തമായി വിമര്ശിക്കപ്പെടുകയാണ്. വര്ഗ്ഗീയ ധ്രുവീകരണം ശക്തിപ്പെടുത്തുന്നതിനുള്ള ആസൂത്രിത ശ്രമങ്ങളെ ചെറുത്തു തോല്പ്പിക്കേണ്ടത് ജനാധിപത്യ വിശ്വാസികളുടെ കടമയാണെന്നും മുഖ്യമന്ത്രി പറഞ്ഞു.
Click it and Unblock the Notifications
Sign in with Google