കടലില് മത്സ്യബന്ധനത്തിന് പോയവര് ഉടന് തിരിച്ചെത്തണം; കേരള തീരത്ത് ജാഗ്രതാ നിര്ദ്ദേശം
കേന്ദ്ര കാലാവസ്ഥ വകുപ്പിന്റെ മുന്നറിയിപ്പില് മാറ്റം വരുന്നത് വരെ കേരള തീരത്ത് നിന്ന് ആരും മല്സ്യബന്ധനത്തിന് പോകരുത്
തിരുവനന്തപുരം: തെക്ക് പടിഞ്ഞാറന് ബംഗാള് ഉള്ക്കടലില് രൂപം കൊണ്ട തീവ്രന്യൂന മര്ദ്ദത്തിന് പിന്നാലെ കേരള തീരത്ത് ജാഗ്രതാ നിര്ദ്ദേശവുമായി കാലാവസ്ഥ വകുപ്പ്. കേരള തീരത്ത് കടലില് പോയ മത്സ്യത്തൊഴിലാളികള് ഉടന് തിരിച്ചെത്തണമെന്നാണ് ജാഗ്രത നിര്ദ്ദേശത്തില് പറയുന്നത്.
തെക്ക്-പടിഞ്ഞാറന് ബംഗാള് ഉള്ക്കടലില് രൂപം കൊണ്ട തീവ്ര-ന്യൂനമര്ദത്തിന്റെ സ്വാധീനം കന്യാകുമാരി തീരം വരെ എത്തുമെന്ന് പ്രതീക്ഷിക്കുന്നതിനാല് കേരള തീരത്ത് നിന്ന് മല്സ്യബന്ധനത്തിന് പോയവര് ഇന്ന് തന്നെ (ജനുവരി 31) തിരിച്ച് സുരക്ഷിത തീരത്തേക്ക് മടങ്ങണമെന്ന് കേന്ദ്ര കാലാവസ്ഥ വകുപ്പ് അറിയിച്ചത്.
ജനുവരി 31 മുതല് ഫെബ്രുവരി 4 വരെ ന്യൂനമര്ദ സ്വാധീനഫലമായി അതിശക്തമായ കാറ്റും മോശം കാലാവസ്ഥയും പ്രതീക്ഷിക്കുന്ന കന്യാകുമാരി തീരം, ഗള്ഫ് ഓഫ് മന്നാര്, തമിഴ്നാട് തീരം, തെക്ക് പടിഞ്ഞാറന് ബംഗാള് ഉള്ക്കടല് എന്നീ സമുദ്ര ഭാഗങ്ങളില് യാതൊരു കാരണവശാലും മല്സ്യബന്ധനത്തിനായി പോകാന് പാടുള്ളതല്ല. മണിക്കൂറില് 45 മുതല് 55 കിലോമീറ്റര് വരെയും ചില അവസരങ്ങളില് 65 കിലോമീറ്റര് വരെയും വീശിയടിച്ചേക്കാവുന്ന അതിശക്തമായ കാറ്റിനുള്ള മുന്നറിയിപ്പാണ് കേന്ദ്ര കാലാവസ്ഥ വകുപ്പ് പുറപ്പെടുവിച്ചിട്ടുള്ളത്.
കേന്ദ്ര കാലാവസ്ഥ വകുപ്പിന്റെ മുന്നറിയിപ്പില് മാറ്റം വരുന്നത് വരെ കേരള തീരത്ത് നിന്ന് ആരും മല്സ്യബന്ധനത്തിന് പോകരുതെന്ന് തിരുവനന്തപുരം ജില്ലാ കളക്ടര് ജെറോമിക് ജോര്ജ് അറിയിച്ചു.
അതേസമയം, സംസ്ഥാനത്ത് ഫെബ്രുവരി രണ്ട് വരെ ഒറ്റപ്പെട്ടയിടങ്ങളില് ഇടിമിന്നലോടുകൂടിയ മഴയ്ക്ക് സാധ്യതയുള്ളതായി കേന്ദ്രകാലാവസ്ഥാ വകുപ്പിന്റെ മുന്നറിയിപ്പ്. ഇടിമിന്നല് അപകടകാരികളാണെന്നതിനാല് കാര്മേഘം കണ്ടു തുടങ്ങുന്ന സമയം മുതല് തന്നെ മുന്കരുതല് സ്വീകരിക്കണം. ഈ സാഹചര്യത്തില് സംസ്ഥാന ദുരന്ത നിവാരണ അതോറിറ്റി പൊതുജനങ്ങള്ക്കായി ജാഗ്രതാ നിര്ദേശങ്ങള് പുറത്തിറക്കി.
Click it and Unblock the Notifications
Sign in with Google