മികച്ച നടനുള്ള പുരസ്കാരം; ഭിന്നലൈംഗികതയ്ക്കുള്ള പിന്തുണയെന്ന് സുദേവ്
കൊച്ചി: നായകനായ ആദ്യ സിനിമയില് തന്നെ മികച്ച നടനെന്ന സംസ്ഥാന സര്ക്കാരിന്റെ അവാര്ഡ്. ഇത്തരമൊരു അപൂര്വ ബഹുമതിയാണ് സുദേവ് നായരെ തേടിയെത്തിയിരിക്കുന്നത്. ഒരുപക്ഷേ, ഈ പേരിലുള്ള ഒരു നടനെക്കുറിച്ച് പലരും അറിയുന്നതുപോലും ഇപ്പോഴായിരിക്കുമെന്നതാണ് വസ്തുത.
മൈ ലൈഫ് പാര്ട്ണര് എന്ന ഭിന്നലൈംഗികതയെക്കുറിച്ച് പറയുന്ന ചിത്രത്തിലെ മികച്ച പ്രകടനമാണ് സുദേവ് നായരെ അവാര്ഡിന് അര്ഹനാക്കിയത്. പല പ്രമുഖ നടന്മാരും നിരസിച്ച വേഷമാണ് സുദേവ് ധൈര്യപൂര്വം ഏറ്റെടുത്തത്. പൂന ഫിലിം ഇന്സ്റ്റിറ്റിയൂട്ടില് നിന്നും അഭിനയത്തില് ബിരുദം നേടിയ നടന് കൂടിയാണ് സുദേവ്.
മികച്ച നടനുള്ള അവാര്ഡ് ഭിന്നലൈംഗികതയ്ക്കുള്ള പിന്തുണ കൂടിയാണെന്ന് അവാര്ഡ് ലഭിച്ചശേഷം സുദേവ് പ്രതികരിച്ചു. ജീവിതത്തില് ലഭിച്ച വലിയൊരു അംഗീകാരമാണിത്. മാതാപിതാക്കള്ക്കും സംവിധായകന് പത്മകുമാറിനും ഈ അവാര്ഡ് സമര്പ്പിക്കുകയാണെന്നും സുദേവ് പറഞ്ഞു. സ്വവര്ഗ പ്രണയിയായ കഥാപാത്രം തനിക്കൊരിക്കലും വെല്ലവിളി ആയിരുന്നില്ലെന്ന് അദ്ദേഹം പറയുന്നു.
ഒട്ടേറെ ഗേ സുഹൃത്തുക്കളുണ്ടായിരുന്നതിനാല് തന്നെ വേഷത്തിന്റെ പ്രാധാന്യത്തെക്കുറിച്ച് തനിക്ക് വ്യക്തതയുണ്ടായിരുന്നു. ഏതെങ്കിലും തരത്തിലുള്ള വിമുഖത കഥാപാത്രത്തിനോടില്ല. മുന്വിധിയോടെ കഥാപാത്രത്തെ സമീപിക്കുന്ന ആളല്ല താന്. കൂടുതല് നല്ല കഥാപാത്രങ്ങള് മലയാളത്തില് നിന്നും തന്നെ തേടിവരുമെന്നാണ് വിശ്വാസമെന്നും സുദേവ് പറഞ്ഞു.
Click it and Unblock the Notifications
Sign in with Google