കാരുണ്യയ്ക്ക് ഭാ​ഗ്യക്കുറി വകുപ്പിന്റെ 29 കോടി; ചെക്ക് മന്ത്രി വീണ ജോർജിന് കൈമാറി

തിരുവനന്തപുരം: കാരുണ്യ ചികിത്സാ പദ്ധതിയിലേക്ക് സംസ്ഥാന ഭാ​ഗ്യക്കുറി വകുപ്പ് 29 കോടി 10 ലക്ഷം രൂപ കൂടി നൽകി. കാരുണ്യ , കാരുണ്യ പ്ലസ് ലോട്ടറികളിൽ നിന്നുള്ള ആദായവിഹിതമായ 29 കോടി 10 ലക്ഷം രൂപയുടെ ചെക്ക് ആരോഗ്യവകുപ്പ് മന്ത്രി വീണാ ജോർജിന് ധനകാര്യവകുപ്പ് മന്ത്രി കെ എൻ ബാല​ഗോപാൽ കൈമാറി. കാരുണ്യ പദ്ധതിയുടെ ഭാഗമായുള്ള ചികിത്സ സഹായങ്ങൾക്കാണ് തുക വിനിയോഗിക്കുക.

സംസ്ഥാന ഭാ​ഗ്യക്കുറി വകുപ്പ് ഡയറക്ടർ എബ്രഹാം റെൻ, പബ്ലിസിറ്റി ഓഫീസർ ജി ബിൻസിലാൽ, ജില്ലാ ലോട്ടറി ഓഫീസർ ആനന്ദ് എസ് കുമാർ, സ്റ്റേറ്റ് ഹെൽത്ത് ഏജൻസി ജോയിന്റ് ഡയറക്ടർമാരായ അല്ലി റാണി എം എം, ഡോയ ബിജോയ് ഇ എന്നിവരും പരിപാടിയിൽ പങ്കെടുത്തു.

സർക്കാര്‌ പൊതുജനാരോ​ഗ്യ സംരക്ഷണ പദ്ധതിയിലൊന്നാണ് കാരുണ്യ ആരോ​ഗ്യ സുരക്ഷ പദ്ധതി ( കെ എ എസ് പി ). കേരള ജനസംഖ്യയുടെ ഏറ്റവും താഴെയുള്ള 40 ശതമാനം വരുന്ന 42 ലക്ഷത്തിലധികം ദരിദ്രരും ദുർബലരുമായ കുടുംബങ്ങൾക്ക് ( ഏകദേശം 64 ലക്ഷം ​ഗുണഭോക്താക്കൾ ) ദ്വിതീയ, ത്രിതീയ തല പരിചരണത്തിനും ചികിത്സയ്ക്കുമായി ആശുപത്രിയിൽ പ്രവേശിക്കേണ്ടി വന്നാൽ പ്രതിവർഷം 5 ലക്ഷം രൂപ ചികിത്സക്കായി കൊടുക്കുന്ന ആരോ​ഗ്യ സംരക്ഷണ പദ്ധതിയാണ് കാരുണ്യ ആരോ​ഗ്യ സുരക്ഷ പദ്ധതി അഥവാ ( കെ എ എസ് പി)

വ്യാഴാഴ്ചകളിൽ നറുക്കെടുക്കുന്ന കാരുണ്യ പ്ലസിനും ശനിയാഴ്ചകളിൽ നറുക്കെടുക്കുന്ന കാരുണ്യ ഭാ​ഗ്യക്കുറിക്കും 80 ലക്ഷം രൂപയാണ് ഒന്നാം സമ്മാനമായി നൽകുന്നത്. 40 രൂപയാണ് ടിക്കറ്റ് വിലയ ഒന്നാം സമ്മാനമായ ഇരുപത് കോടി നൽകുന്ന ക്രിസ്മസ് നവവത്സര ടിക്കറ്റാണ് ഇപ്പോൾ ബമ്പർ ടിക്കറ്റായി വിപണിയിൽ ഉള്ളത്.