'സംഭവം അറിഞ്ഞപ്പോൾ തന്നെ ഞങ്ങൾ ഇടപെട്ടു; മാധ്യമങ്ങൾ ഔചിത്യമില്ലാത്ത ചോദ്യം ചോദിച്ച് പോകരുത്'; മുഖ്യമന്ത്രി
മലപ്പുറം: കൊല്ലത്ത് കുട്ടിയെ തട്ടിക്കൊണ്ടുപോയ സംഭവം അറിഞ്ഞപ്പോൾ തന്നെ തങ്ങൾ ഇടപെട്ടിരുന്നുവെന്ന് മുഖ്യമന്ത്രി പിണറായി വിജയൻ. കുട്ടിയെ സുരക്ഷിതമായി കണ്ടെത്താന് സാധ്യമായ എല്ലാ നടപടികളും സ്വീകരിക്കാന് പോലീസ് മേധാവിക്കും മറ്റ് ബന്ധപ്പെട്ടവര്ക്കും നിര്ദ്ദേശവും നല്കിയിരുന്നുവെന്നും മുഖ്യമന്ത്രി പറഞ്ഞു.
'സംഭവം അറിഞ്ഞ നിമിഷം മുതല് കുട്ടിയെ കണ്ടെത്താന് ജാഗ്രതയോടെ അഹോരാത്രം പ്രവര്ത്തിച്ച പോലീസ് സേനാംഗങ്ങളേയും, നാട്ടുകാരെയും മറ്റെല്ലാവരെയും അഭിനന്ദിക്കുകയാണ്. പരിഭ്രാന്തമായ ഘട്ടത്തിലും ധൈര്യം ചോര്ന്ന് പോകാതെ അന്വേഷണ സംഘത്തിന് കൃത്യമായി വിവരങ്ങള് നല്കിയ അബിഗേലിന്റെ സഹോദരന് ജോനാഥന് പ്രത്യേകം അഭിനന്ദങ്ങള്', അദ്ദേഹം പറഞ്ഞു. സംഭവത്തിലെ മാധ്യമ ഇടപെടലിനെ മുഖ്യമന്ത്രി വിമർശിച്ചു. ഇത്തരം സംഭവങ്ങള് ഉണ്ടാകുമ്പോള് മാധ്യമങ്ങള്ക്ക് എന്തൊക്കെ കരുതല് ഉണ്ടാകണം എന്ന ചര്ച്ചയും സ്വയംവിമര്ശനവും വേണ്ടതുണ്ടെന്ന് അദ്ദേഹം പറഞ്ഞു.
കുട്ടിയെ തട്ടിക്കൊണ്ടുപോയ സംഭവം അറിഞ്ഞ ഉടന് തന്നെ ഞങ്ങളെല്ലാം ഇടപെട്ടിരുന്നു. കുട്ടിയെ സുരക്ഷിതമായി കണ്ടെത്താന് സാധ്യമായ എല്ലാ നടപടികളും സ്വീകരിക്കാന് പോലീസ് മേധാവിക്കും മറ്റ് ബന്ധപ്പെട്ടവര്ക്കും നിര്ദ്ദേശവും നല്കിയിരുന്നു. അന്വേഷണത്തിന്റെ ഏകോപനത്തിനായി എഡിജിപി അടക്കമുളള മുതിര്ന്ന ഉദ്യോഗസ്ഥരെ ചുമതലപ്പെടുത്തി. നാലുപേര് ചേര്ന്ന് കുട്ടിയെ ബലമായി കാറില് കയറ്റിക്കൊണ്ടുപോയി എന്ന വിവരം ആണ് ആദ്യം ലഭിച്ചത്. അപ്പോള് തന്നെ കൊല്ലം, പത്തനംതിട്ട , ആലപ്പുഴ, തിരുവനന്തപുരം ജില്ലകളില് വാഹനപരിശോധന ആരംഭിച്ചു.
ആയിരക്കണക്കിന് പോലീസുകാരാണ് അന്വേഷണത്തില് പങ്കാളികളായത്. സമീപകാലത്ത് കേരളം കണ്ട ഏറ്റവും വലിയ തിരച്ചില് ആണ് പോലീസ് കുട്ടിക്ക് വേണ്ടി നടത്തിയത്. വ്യാജ നമ്പര് പ്ലേറ്റ് ഉപയോഗിച്ചുള്ള കാര് ആണ് പ്രതികള് ഉപയോഗിച്ചത് എന്ന് കണ്ടെത്തിയിട്ടുണ്ട്. കുറ്റവാളികളെ എത്രയും വേഗം നിയമത്തിന് മുന്നില് കൊണ്ടുവരാനാവുമെന്നാണ് പ്രതീക്ഷിക്കുന്നത്. സ്ത്രീകള്ക്കും, കുട്ടികള്ക്കും നേരെ അതിക്രമം കാട്ടുന്നവര്ക്ക് എതിരെ ഒരു വിട്ടുവീഴ്ച്ചയും ഉണ്ടാകില്ല എന്ന് ആവര്ത്തിച്ച് പറയുകയാണ്. ഈ സന്നിഗ്ദ്ധ ഘട്ടത്തില് അബിഗേലിന്റെ കുടുബത്തിന് ഒപ്പം നിന്ന് കരുത്ത് പകര്ന്ന കേരളീയ സമൂഹത്തെ ഹാർദമായി അഭിവാദ്യം ചെയ്യുന്നു. കേരളത്തിന്റെ മാനവികതയും സാമൂഹ്യ ഐക്യവും പ്രകടമായ സമയം കൂടിയാണിത്. എല്ലാവരും ആ കുഞ്ഞിനെ കിട്ടാനുള്ള ഇടപെടലാണ് നടത്തിയത്. ഈ ഐക്യത്തെക്കുറിച്ചാണ്, സവിശേഷതയെക്കുറിച്ചാണ് കേരളീയം വേളയില് നാം കൂടുതല് ചര്ച്ച ചെയ്തത്.
വിവരങ്ങള് അതാത് സമയം എത്തിക്കുന്നതിലും അതിലൂടെ ജനങ്ങളെ ജാഗരൂകരാക്കുന്നതിലും മാധ്യമങ്ങള് പൊതുവില് നല്ല പങ്കാണ് വഹിച്ചത്. അതേ സമയം ഇത്തരം സംഭവങ്ങള് ഉണ്ടാകുമ്പോള് മാധ്യമങ്ങള്ക്ക് എന്തൊക്കെ കരുതല് ഉണ്ടാകണം എന്ന ചര്ച്ചയും സ്വയംവിമര്ശനവും വേണ്ടതുണ്ട്. അന്വേഷണ പുരോഗതി അതാതു സമയം ജനങ്ങളിലെത്തിക്കുന്നത് നല്ലതാണ്. എന്നാല് അത് കുറ്റവാളികള്ക്ക് രക്ഷപ്പെടാനുള്ള പഴുതായി മാറാതിരിക്കാന് ശ്രദ്ധിക്കണം. വല്ലാതെ ദുഃഖം അനുഭവിക്കുന്നവര്ക്ക് മുന്നിലേക്ക് ഔചിത്യമില്ലാത്ത ചോദ്യങ്ങളുമായി പോകരുത്.
Click it and Unblock the Notifications
Sign in with Google