ചന്ദ്രഗ്രഹണം എങ്ങനെ സംഭവിക്കുന്നു? അടുത്ത ചന്ദ്രഗഹണം എന്ന്; ചോദ്യങ്ങളും ഉത്തരങ്ങളും

ദില്ലി: ഈ വര്‍ഷത്തെ രണ്ടാമത്തേയും അവസാനത്തേയും ചന്ദ്രഗ്രഹണത്തിലൂടെയാണ് ഇപ്പോള്‍ കടന്ന് പോയിക്കൊണ്ടിരിക്കുന്നത്. അഞ്ച് നൂറ്റാണ്ടുകൾക്കിടയിലെ ഏറ്റവും ദൈർഘ്യമേറിയ ചന്ദ്രഗ്രഹണത്തിനാണ് ഇന്ന് സാക്ഷ്യം വഹിക്കുക. 1440 ഫെബ്രുവരി മാസം 18ആം തീയതിയാണ് ഇതിന് മുൻപ് ഇത്രയും ദൈർഘ്യമേറിയ ചന്ദ്രഗ്രഹണം ഉണ്ടായത്. ഇന്ത്യയിൽ പകൽ 12.48നും വൈകീട്ട് 4.17നും ഇടയിലാണ് ഗ്രഹണം സംഭവിക്കുക. ഏകദേശം 2.34ഓടെ ചന്ദ്രന്റെ 97 ശതമാനവും ഭൂമിയുടെ നിഴലിലാകുമെന്നാണ് ശാസ്ത്രജ്ഞര്‍ വ്യക്തമാക്കിയത്.

അരുണാചൽ പ്രദേശിന്റെ കിഴക്കൻ ഭാഗങ്ങളിലും അസമിലും ഗ്രഹണം ദൃശ്യമാകും. അമേരിക്ക, യൂറോപ്പ്, ഓസ്ട്രേലിയ എന്നിവിടങ്ങളില്‍ നിന്നും ഗ്രഹണം കാണാന്‍ സാധിക്കും. ചന്ദ്രഗ്രഹണം സംബന്ധിച്ചുള്ള ചില സംളയങ്ങളും അതിനുള്ള ഉത്തരങ്ങളും പരിശോധിക്കുകയാണ് ഇവിടെ..

ചന്ദ്രഗ്രഹണം എങ്ങനെ സംഭവിക്കുന്നു?

സൂര്യനും ചന്ദ്രനും ഇടയിലായി ഭൂമി വരുമ്പോഴാണ്‌ ചന്ദ്രഗ്രഹണം സംഭവിക്കുന്നത്‌. ഈ പ്രതിഭാസം നടക്കുമ്പോൾ സൂര്യനും ചന്ദ്രനും നടുവിലായി ഭൂമി വരികയും ചന്ദ്രോപരിതലത്താൽ പ്രതിഫലിക്കുന്ന സൂര്യപ്രകാശത്തിന്‌ തടസ്സം സൃഷ്ടിക്കുകയും ചെയ്യുന്നു. ചന്ദ്രൻ പൂർണമായും ഭൂമിയുടെ നിഴലിലാകുന്നത് പൂർണ ചന്ദ്രഗ്രഹണം. ആ സമയത്ത് ചന്ദ്രനിൽ നിന്നു നോക്കിയാൽ സൂര്യനെ കാണാനേ കഴിയില്ല. ചന്ദ്രൻ ഭൂമിയുടെ നിഴലിൽ ഭാഗികമായി വരുമ്പോഴാണ് ഭാഗികചന്ദ്രഗ്രഹണം ഉണ്ടാകുക. ഭൂമിയുടെ നിഴലിന്റെ നീളത്തേക്കാൾ കുറവാണ് ഭൂമിയും ചന്ദ്രനും തമ്മിലുള്ള ദൂരം എന്നതിനാല്‍ വലയ ചന്ദ്രഗ്രഹണം ഉണ്ടാവാറില്ല.

ചന്ദ്രഗ്രഹണ സമയത്ത് നമുക്ക് എന്ത് കാണാം

അമേരിക്കാന്‍ ബഹിരാകാശ ഏജന്‍സിയയ നാസയുടെ അഭിപ്രായത്തിൽ, ചന്ദ്രഗ്രഹണം സൂര്യഗ്രഹണങ്ങളെപ്പോലെ മനോഹരമല്ല. സൂര്യഗ്രഹണം ഭൂമിയില്‍ ഇരുട്ട് വീഴ്ത്തുന്നു. എന്നാല്‍ ചന്ദ്രഗ്രഹണം സംഭവിക്കുമ്പോള്‍ പകലിന്റെ മധ്യത്തിൽ ഇരുട്ടാകില്ല. ചന്ദ്രഗ്രഹണം സംഭവിക്കുന്നത് ചന്ദ്രൻ ഭൂമിയുടെ നിഴലിലാവുന്നതിനാല്‍ തന്നെ ചന്ദ്രൻ ഒരിക്കലും പൂർണ്ണമായും അപ്രത്യക്ഷമാകുകയുമില്ല.

എന്തുകൊണ്ട് നവംബർ 19 ന് ദൈർഘ്യമേറിയ ചന്ദ്രഗ്രഹണം?

ചന്ദ്രൻ ഭൂമിയിൽ നിന്ന് ഏറ്റവും ദൂരെ എത്തി 41 മണിക്കൂർ കഴിഞ്ഞ് വരുന്നതിനാലാണ് ഈ ചന്ദ്രഗ്രഹണം ഇത്രയും നീണ്ടുനിൽക്കാൻ കാരണം. ചന്ദ്രൻ എത്ര ദൂരെയാണോ അത്രയധികം സമയമെടുക്കും ഗ്രഹണം പൂര്‍ത്തിയാവന്‍. നവംബർ 19 ലെ ചന്ദ്രഗ്രഹണം 4,000 വർഷത്തേക്ക് അതിന്റെ റെക്കോർഡ് നിലനിർത്തും എന്നതാണ് പ്രത്യേകത. അടുത്ത ആറ് മണിക്കൂർ ചന്ദ്രഗ്രഹണം 2489 ഒക്ടോബർ 9 നാണ് നടക്കുക. 2003 നവംബർ 9 നാണ് അവസാനമായി നീണ്ട ചന്ദ്രഗ്രഹണം ഉണ്ടായത്. അന്ന് ആറ് മണിക്കൂറും മൂന്ന് മിനിറ്റും നീണ്ടുനിന്നു. എന്നിരുന്നാലും, ഇത് പൂർണ്ണവും ഭാഗിക ചന്ദ്രഗ്രഹണമായിരുന്നില്ല.

നൂറ്റാണ്ടിലെ ഏറ്റവും ദൈർഘ്യമേറിയ ചന്ദ്രഗ്രഹണം ഇതാണോ?

അതെ, യഥാർത്ഥത്തിൽ ഒരു സഹസ്രാബ്ദത്തിലെ ഏറ്റവും ദൈർഘ്യമേറിയ ഭാഗിക ചന്ദ്രഗ്രഹണമാണിത്. രണ്ട് പ്രധാന കാരണങ്ങളാലാണ് വെള്ളിയാഴ്ചത്തെ ഗ്രഹണം നീണ്ട് നില്‍ക്കുന്നത്. ചന്ദ്രന്റെ പരിക്രമണ വേഗത, ഗ്രഹണത്തിന്റെ പൂർണ്ണത എന്നിവയാണ് ഇതിന് പ്രധാനകാരണങ്ങളായി വിലയിരുത്തുന്നത്.

ചന്ദ്രഗ്രഹണ സമയത്ത് ചന്ദ്രൻ ചുവപ്പായി മാറുന്നത് എന്തുകൊണ്ട്?

ഭൂമിയുടെ അന്തരീക്ഷത്തിലൂടെ കടന്നുപോകുന്ന ചില പ്രകാശം ചന്ദ്രോപരിതലത്തിൽ പതിക്കുമ്പോൾ ചന്ദ്രഗ്രഹണ സമയത്ത് ചന്ദ്രന്റെ മുഖം ചുവപ്പായി മാറുന്നു. പകൽ സമയത്ത് ആകാശം നീലയായി കാണപ്പെടുന്നതും ഇതേ കാരണത്താലാണ്. സൂര്യാസ്തമയ സമയത്ത് ചന്ദ്രൻ ചുവപ്പായി മാറുന്നതാണ് മറ്റൊരു ഉദാഹരണം.

അടുത്ത ചന്ദ്രഗ്രഹണം എപ്പോഴാണ്?

അടുത്ത ചന്ദ്രഗ്രഹണം 2022 നവംബർ 8-ന് ഇന്ത്യയിൽ നിന്ന് ദൃശ്യമാകും. ഇത് പൂർണ ചന്ദ്രഗ്രഹണമായിരിക്കും

English summary

lunar eclipse 2021: How does a lunar eclipse occur? Questions and answers