പ്രളയം മനുഷ്യനിര്മിതം: യുഡിഎഫ് അധികാരത്തിലെത്തിയാല് ജുഡീഷ്യല് അന്വേഷണമെന്ന് ചെന്നിത്തല
കേരളത്തില് 2018ല് ഉണ്ടായ മഹാപ്രളയത്തിന്റെ രൂക്ഷത വര്ധിച്ചത് ഡാമുകളിലെ ജലനിരപ്പ് കൈകാര്യം ചെയ്യുന്നതിലുണ്ടായ വീഴ്ച്ച മൂലമാണെന്ന് ഐഐഎസ്സിയുടെ പഠനത്തില് നേരത്തെ കണ്ടെത്തിയിരുന്നു. ഇത് വലിയ വിവാദമായി രാഷ്ട്രീയ കേരളത്തില് മാറിയിരിക്കുകയാണ്. ഇപ്പോഴിതാ ഈ വിഷയത്തില് കടുത്ത നിലപാടുമായി രംഗത്ത് വന്നിരിക്കുകയാണ് പ്രതിപക്ഷ നേതാവ് രമേശ് ചെന്നിത്തല. പ്രളയം മനുഷ്യനിര്മിതമാണെന്ന് താന് അന്ന് തന്നെ ചൂണ്ടിക്കാണിച്ചതാണെന്നും, യുഡിഎഫ് അധികാരത്തില് വന്നാല് ഈ വിഷയത്തില് ജുഡീഷ്യല് അന്വേഷണം നടത്തുമെന്നും ചെന്നിത്തല ഫേസ്ബുക്ക് പോസ്റ്റില് വ്യക്തമാക്കി. പോസ്റ്റ് വായിക്കാം.
കേരളത്തിന്റെ അടിത്തറ തകര്ത്ത 2018 ലെ മഹാപ്രളയം മനുഷ്യനിര്മ്മിതമാണെന്ന് ഞാന് അന്ന് തന്നെ ചൂണ്ടിക്കാട്ടിയതാണ്. ബാംഗ്ലൂരിലെ ഇന്ത്യന് ഇന്സ്റ്റിറ്റ്യൂട്ട് ഓഫ് സയന്സും (ഐഐഎസ്സി) ശാസ്ത്രീയപഠനങ്ങളിലൂടെ അത് ശരിവച്ചിരിക്കുകയാണ്.നേരത്തേ ഹൈക്കോടതി നിയോഗിച്ച അമിക്കസ് ക്യൂറിയും ഇതേ നിഗമനത്തിലെത്തിച്ചേര്ന്നിരുന്നു.
കനത്ത മഴയില് മുന്നൊരുക്കങ്ങളില്ലാതെ ഡാമുകള് കൂട്ടത്തോടെ തുറന്നു വിട്ടതും ഡാമുകളിലെ വെള്ളം മാനേജ് ചെയ്യുന്നതിലുണ്ടായ പിഴവുമാണ് ഈ വന്ദുരന്തത്തിന് കാരണമെന്നാണ് ഇപ്പോള് പഠനങ്ങളില് നിന്ന് വ്യക്തമായിരിക്കുന്നത്. 54 ലക്ഷം പേരെ ബാധിക്കുകയും 14 ലക്ഷം പേര് ഭവനരഹിതരാവുകയും 433 പേര് മരിക്കുകയും ചെയ്ത ഈ മഹാദുരന്തത്തിന് ഉത്തരവാദി സംസ്ഥാന സര്ക്കാരാണെന്ന് തെളിഞ്ഞിരിക്കുന്നു.
തികഞ്ഞ ലാഘവത്തോടെ ഡാമുകള് മാനേജ് ചെയ്തതാണ് പ്രളയത്തിന് കാരണമെന്ന് ചൂണ്ടിക്കാട്ടിയപ്പോള് കുറ്റപ്പെടുത്താനാണ് ഭരണപക്ഷം ശ്രമിച്ചത്. ഡാം മാനേജ്മെന്റിലെ പിഴവ് ഇപ്പോള് ശാസ്ത്രീയമായി തെളിയിക്കപ്പെട്ടിരിക്കുന്നു. ലക്ഷക്കണക്കിന് പേരുടെ സമ്പാദ്യങ്ങളെ നശിപ്പിച്ച 433 പേര് മരിച്ച മഹാപ്രളയത്തെക്കുറിച്ച് ജുഡീഷ്യല് അന്വേഷണം അനിവാര്യമാണ്. യുഡിഎഫ് സര്ക്കാര് അധികാരത്തിലെത്തുമ്പോള് മഹാപ്രളയത്തെക്കുറിച്ചും അതിന്റെ കാരണങ്ങളെക്കുറിച്ചും ജുഡീഷ്യല് അന്വേഷണം നടത്തും.
Click it and Unblock the Notifications
Sign in with Google