പിഎം കിസാന് സമ്മാന് നിധി: കര്ഷകര്ക്കായി 18000 രൂപ കൂടി, വിതരണം ഡിസംബര് 25 ന്
ദില്ലി: കര്ഷക ബില്ലിനെതിരെ രാജ്യതലസ്ഥാനത്ത് പ്രക്ഷോഭം ശക്തമായി തുടരുന്നതിനിടെ പിഎം കിസാന് പദ്ധതി വഴി 18000 കോടി രൂപകൂടി കേന്ദ്ര സര്ക്കാര് വിതരണം ചെയ്യുന്നു. കര്ഷക പ്രതിഷേധം ഒരു മാസം തികയുന്ന ഡിസംബര് 25 നാണ് പ്രധാൻ മന്ത്രി കിസാൻ സമ്മാൻ നിധിയുടെ അടുത്ത ഘഡു സര്ക്കാര് വിതരണം ചെയ്യുന്നത്. കർഷകർക്ക് നേരിട്ട് പണം കൈമാറ്റം ചെയ്യുന്ന പദ്ധതിയായ പിഎം-കിസാൻ സമ്മാൻ നിധി സ്കീമിന് കീഴിലുള്ള ഏഴാമത്തെ ഘഡുവാണിത്.
രാജ്യത്തെ ഒൻപത് കോടിയിലധികം വരുന്ന ഗുണഭോക്തൃ കർഷക കുടുംബങ്ങൾക്ക് ഡിസംബര് 25 ന് 18,000 കോടിയിലധികം രൂപ കൈമാറ്റം ചെയ്യുമെന്ന് പ്രധാനമന്ത്രി ഓഫീസ് (പിഎംഒ) ആണ് അറിയിച്ചത്. അന്നേദിവസം തന്നെ ആറ് സംസ്ഥാനങ്ങളിൽ നിന്നുള്ള കർഷകരുമായി പ്രധാനമന്ത്രി വീഡിയോ കോണ്ഫറന്സ് വഴി സംസാരിക്കുകയും ചെയ്യും. കർഷകർ അവരുടെ അനുഭവങ്ങളും പിഎം-കിസാൻ പദ്ധതിയിലൂടെ കർഷകരുടെ ക്ഷേമത്തിനായി സർക്കാർ സ്വീകരിച്ച മറ്റ് പല സംരംഭങ്ങളും ചര്ച്ചാ വിഷയമാവും. കേന്ദ്ര കൃഷി മന്ത്രി നരേന്ദ്ര സിംഗ് തോമറും ചടങ്ങിൽ പങ്കെടുക്കും.
കഴിഞ്ഞ വർഷം ഫെബ്രുവരിയിലാണ് പ്രധാനമന്ത്രി-കിസാൻ സമൻ നിധി പദ്ധതി ആരംഭിച്ചത്. സർക്കാരിൽ നിന്ന് 100 ശതമാനം ധനസഹായമുള്ള കേന്ദ്ര പദ്ധതിയാണിത്. പിഎം-കിസാൻ പദ്ധതി പ്രകാരം, അർഹരായ ഗുണഭോക്തൃ കർഷകർക്ക് പ്രതിവർഷം 6,000 രൂപയുടെ സാമ്പത്തിക ആനുകൂല്യം നൽകുന്നു. മൂന്ന് തുല്യമായ നാല് പ്രതിമാസ ഗഡുക്കളായി 2,000 രൂപ വീതമാണ് വിതരണം ചെയ്യുന്നത്.
പദ്ധതി ആരംഭിച്ചപ്പോള് ആനുകൂല്യങ്ങൾ ചെറുകിട കർഷകരുടെ കുടുംബങ്ങൾക്ക് മാത്രമേ അനുവദിച്ചിരുന്നുള്ളൂ. കൂടാതെ 2 ഹെക്ടർ വരെ ഭൂമിയുള്ളവർക്കാണ് തുക അനുവദിച്ചിരുന്നത്. എന്നാല് പിന്നീട് ഈ പദ്ധതി 2019 ജൂണിൽ പരിഷ്കരിക്കുകയും ഭൂവുടമകളുടെ വലിപ്പം കണക്കിലെടുക്കാതെ എല്ലാ കർഷക കുടുംബങ്ങളിലേയ്ക്കും പദ്ധതി വ്യാപിപ്പിക്കുകയായിരുന്നു. നേരിട്ടുള്ള ആനുകൂല്യ കൈമാറ്റ രീതി അനുസരിച്ച് തുക നേരിട്ട് ഗുണഭോക്താക്കളുടെ ബാങ്ക് അക്കൗണ്ടുകളിലേക്കാണ് കൈമാറുന്നത്.
Click it and Unblock the Notifications
Sign in with Google