മുഖ്യമന്ത്രിക്ക് കത്തയച്ച് വിഎം സുധീരന്; നിയമത്തെ വെല്ലുവിളിക്കാന് വെള്ളാപ്പള്ളിയെ അനുവദിക്കരുത്
തിരുവനന്തപുരം: എസ്എന്ഡിപി യോഗം കണിച്ചുകുളങ്ങര യൂണിയന് സെക്രട്ടറിയായിരുന്ന കെകെ മഹേശന്റെ മരണത്തില് വിശദമായ അന്വേഷണം ആവശ്യപ്പെട്ട് മുതിര്ന്ന കോണ്ഗ്രസ് നേതാവ് വിഎം സുധീരന്. മഹേശന്റെ ഭാര്യ ഉഷാദേവി നല്കിയ സങ്കടഹര്ജി ഉള്പ്പെടുന്ന കത്ത് സുധീരന് മുഖ്യമന്ത്രി വിഡി സതീശനും ആഭ്യന്തര മന്ത്രി രമേശ് ചെന്നിത്തലയ്ക്കും അയച്ചു.
മഹേശന്റെ ആത്മഹത്യയിലേക്ക് നയിച്ച കാര്യങ്ങള് എന്തെല്ലാം, കാരണക്കാര് ആര് തുടങ്ങിയ കാര്യങ്ങള് അറിയാന് നിരവധി പരാതികള് നല്കിയിട്ടും നടപടിയുണ്ടായിട്ടില്ല. ഈ മാസം ആദ്യവാരത്തില് മുഖ്യമന്ത്രിക്ക് നല്കിയ പരാതിയിലും കാര്യമായ നടപടിയെടുത്തിട്ടില്ല. പിണറായി സര്ക്കാര് സ്വീകരിച്ച സമീപനം സതീശന് സര്ക്കാരിന്റെ ഭാഗത്ത് നിന്നുണ്ടാകില്ല എന്ന പ്രതീക്ഷയിലാണ് കുടുംബം എന്നും വിഎം സുധീരന് ഫേസ്ബുക്കില് എഴുതിയ കുറിപ്പില് വ്യക്തമാക്കി.
വിഎം സുധീരന്റെ ഫേസ്ബുക്ക് കുറിപ്പ് വായിക്കാം: ''പ്രിയപ്പെട്ട മുഖ്യമന്ത്രി,
എസ്.എന്.ഡി.പി. യോഗം ജനറല് സെക്രട്ടറിസ്ഥാനത്തിരിക്കുന്ന വെള്ളാപ്പള്ളി നടേശന്റെയും കൂട്ടരുടേയും മാനസിക പീഢനത്തിന്റെയും ഭീഷണിയുടേയും ഫലമായി ജീവന് വെടിയേണ്ടിവന്ന എസ്.എന്.ഡി.പി.യോഗം കണിച്ചുകുളങ്ങര യൂണിയന് സെക്രട്ടറികൂടിയായിരുന്ന കെ.കെ.മഹേശന്റെ ഭാര്യ ഉഷാദേവിയുടെ സങ്കടഹര്ജി അടിയന്തിര നടപടികള്ക്കായി ഇതോടൊപ്പം അയയ്ക്കുന്നു.
മഹേശനെ ആത്മഹത്യയിലേയ്ക്ക് എത്തിച്ചതിന്റെ കാരണക്കാരായവര്ക്കെതിരെ നിയമ നടപടികള് സ്വീകരിക്കുന്നതിനുവേണ്ടി സംസ്ഥാന ഭരണാധികാരികള്ക്കു മുന്നില് നിരവധി പരാതികള് നല്കിയിട്ടും ഇതേവരെ ഫലപ്രദമായ യാതൊരു നടപടിയും ഉണ്ടായിട്ടില്ല. ഏറ്റവുമൊടുവില് 06.06.2026-ല് ബഹു.മുഖ്യമന്ത്രിക്ക് പരാതി നല്കിയെങ്കിലും കാര്യമായ നടപടികളൊന്നും ഉണ്ടായതായി കാണുന്നില്ല.
വെള്ളാപ്പള്ളി പ്രീണനവുമായി മുന്നോട്ടുപോയ പിണറായി സര്ക്കാരിന്റെ ഭാഗത്തുനിന്നുണ്ടായ നിഷ്ക്രിയമായ സമീപനം ഈ സര്ക്കാരിന്റെ ഭാഗത്തുനിന്നും ഉണ്ടാകില്ലെന്ന ഉറച്ച വിശ്വാസത്തിലാണ് ഇപ്പോഴും മഹേശന്റെ കുടുംബം. ഇനിയെങ്കിലും ആ കുടുംബത്തിന് നീതി ലഭിക്കുന്നതിനുവേണ്ടി സത്യസന്ധരായ ഉന്നത പോലീസ് ഉദ്യോഗസ്ഥന്മാരുടെ ഒരു പ്രത്യേക അന്വേഷണ സംഘത്തെ നിയോഗിക്കണമെന്ന് അഭ്യര്ത്ഥിക്കുന്നു.
ഹതഭാഗ്യനായ മഹേശനെതിരെ മനുഷ്യത്വരഹിതമായ അധിക്ഷേപങ്ങള് ഇപ്പോഴും വെള്ളാപ്പള്ളി പറഞ്ഞുകൊണ്ടിരിക്കുകയാണ്. നിയമ സംവിധാനത്തെ വെല്ലുവിളിക്കുന്ന സമീപനമാണ് വെള്ളാപ്പള്ളി സ്വീകരിച്ചുവരുന്നത്. ഒരു നിയമവും തങ്ങള്ക്ക് ബാധകമല്ലെന്ന മട്ടിലാണ് വെള്ളാപ്പള്ളിയുടെ പോക്ക്. നിയമവാഴ്ച ഉറപ്പുവരുത്താന് ബാധ്യതപ്പെട്ട ഭരണസംവിധാനം ഉണര്ന്നു പ്രവര്ത്തിക്കാന് ഇനിയും വൈകരുതെന്നാണ് എന്റെ അപേക്ഷ. ഉഷാദേവിയുടെ സങ്കടഹര്ജിയില് എത്രയും വേഗത്തില്ത്തന്നെ ഫലപ്രദമായ നടപടികള് സ്വീകരിക്കണമെന്ന് താല്പര്യപ്പെടുന്നു.''
Click it and Unblock the Notifications
Sign in with Google