കോണ്‍ഗ്രസ് പിന്തുണയോടെ സര്‍ക്കാരിനില്ലെന്ന് ആപ്പ്

ദില്ലി: ദില്ലിയില്‍ കോണ്‍ഗ്രസിന്റെ പിന്തുണയോടെ സര്‍ക്കാര്‍ രൂപീകരിക്കാനില്ലെന്ന് ആം ആദ്മി പാര്‍ട്ടി വ്യക്തമാക്കി. രണ്ടാമതും തിരഞ്ഞെടുപ്പ് നടത്തണം എന്നതാണ് പാര്‍ട്ടിയുടെ തീരുമാനമെന്നും ആം ആദ്മി പാര്‍ട്ടി വ്യക്തമാക്കി.

ദില്ലിയില്‍ സര്‍ക്കാര്‍ രൂപീകരിക്കാന്‍ ആം ആദ്മി പാര്‍ട്ടിക്ക് നിരുപാധിക പിന്തുണ കോണ്‍ഗ്രസ് നല്‍കുമെന്ന് നേരത്തെ വാര്‍ത്തകള്‍ ഉണ്ടായിരുന്നു. കോണ്‍ഗ്രസ് തന്നെ ഇക്കാര്യം പിന്നീട് നിഷേധിച്ചു.

നേരത്തെ കോണ്‍ഗ്രസിന്റെ പിന്തുണയോടെയാണ് ആം ആദ്മി പാര്‍ട്ടി അരവിന്ദ് കെജ്രിവാളിന്റെ നേതൃത്വത്തില്‍ ദില്ലിയില്‍ സര്‍ക്കാര്‍ രൂപീകരിച്ചത്. എന്നാല്‍ ജന ലോക്പാല്‍ ബില്ലില്‍ തട്ടി ആ ബന്ധം ഉലഞ്ഞു. ഇതോടെ കെജ്രിവാള്‍ സര്‍ക്കാര്‍ രാജിവക്കുകയായിരുന്നു.

ലോക്‌സഭ തിരഞ്ഞെടുപ്പില്‍ ബിജെപി സര്‍വ്വാധിപത്യം നേടിക്കഴിഞ്ഞപ്പോഴാണ് കോണ്‍ഗ്രസിന് പുനര്‍വിചിന്തനം ഉണ്ടായത്. ഏത് വിധേനയും ദില്ലി ഭരണത്തില്‍ പങ്കാളിയാവുക എന്നത് പാര്‍ട്ടിയുടെ നിലനില്‍പിന്റെ കൂടി പ്രശ്‌നമാണെന്ന് ഒരു വിഭാഗം പറയുന്നുണ്ട്.

എന്നാല്‍ ഒരിക്കല്‍ രാജിവച്ച് പുറത്ത് പോയവര്‍ക്ക് വീണ്ടും സര്‍ക്കാരുണ്ടാക്കാനുള്ള യോഗ്യതയില്ലെന്നാണ് ഏറ്റവും ഒടുവല്‍ കോണ്‍ഗ്രസ് വ്യക്തമാക്കുന്നത്. പുതിയ സര്‍ക്കാര്‍ രൂപീകരിക്കാന്‍ തിരഞ്ഞെടുപ്പിനെ നേരിടണം എന്ന് തന്നെയാണ് കോണ്‍ഗ്രസും ഇപ്പോള്‍ പറയുന്നത്. ഇക്കാര്യത്തില്‍ ബിജെപിക്കും അഭിപ്രായ വ്യത്യാസം ഇല്ലെന്നാണ് റിപ്പോര്‍ട്ട്.

English summary

Will not form Government with the support of Congress: AAP.