സംസ്ഥാനത്ത് സിക്ക വൈറസും, തിരുവനന്തപുരത്ത് 13 പേർക്കെന്ന് സംശയം, ആശങ്ക വേണ്ടെന്ന് ആരോഗ്യവകുപ്പ്
തിരുവനന്തപുരം: കൊവിഡ് കേസുകള് കുറയാത്തതിന്റെ ആശങ്ക നിലനില്ക്കേ സംസ്ഥാനത്ത് ഭീതി പരത്തി സിക്ക വൈറസും. കേരളത്തില് ആദ്യമായി സിക്ക വൈറസിന്റെ സാന്നിധ്യം തിരുവനന്തപുരത്ത് കണ്ടെത്തിയിരിക്കുകയാണ്. തലസ്ഥാന ജില്ലയില് 13 പേരിലാണ് സിക്ക വൈറസ് കണ്ടെത്തിയിരിക്കുന്നത്. എന്നാല് ആശങ്കപ്പെടേണ്ട സാഹചര്യം നിലവില് ഇല്ലെന്ന് ആരോഗ്യവകുപ്പ് വ്യക്തമാക്കുന്നു.
തിരുവനന്തപുരത്ത് സ്വകാര്യ ആശുപത്രിയില് ചികിത്സയിലുള്ള പാറശാല സ്വദേശിയായ 24 കാരിയായ ഗര്ഭിണിയിലാണ് രോഗം റിപ്പോര്ട്ട് ചെയ്തത്. ജൂണ് 28നാണ് യുവതി പനി, തലവേദന, ചുവന്ന പാടുകള് എന്നീ ലക്ഷണങ്ങളോടെ ആശുപത്രിയില് ചികിത്സ തേടിയത്. ആശുപത്രിയില് നടത്തിയ ആദ്യ പരിശോധനയില് ചെറിയ തോതിലുള്ള പോസിറ്റീവ് കാണിച്ചു. തുടര്ന്ന് സിക്ക വൈറസ് ആണോയെന്നറിയാന് എന്.ഐ.വി. പൂനയിലേക്ക് സാമ്പിളുകള് അയച്ചിട്ടുണ്ട്. അതേസമയം തിരുവനന്തപുരം ജില്ലയിലെ ചില പ്രദേശങ്ങളില് നിന്നുമയച്ച 19 സാമ്പിളുകളില് 13 പേര്ക്ക് സിക്ക പോസിറ്റീവാണെന്ന് സംശയമുണ്ട്. എന്നാല് എന്.ഐ.വി. പൂനയില് നിന്നും ഇതിന് സ്ഥിരീകരണം ലഭിച്ചിട്ടില്ലെന്ന് ആരോഗ്യ മന്ത്രി വീണ ജോർജ് വ്യക്തമാക്കി.
സിലിണ്ടറുകളുമായി കർഷകർ, ഇന്ധന വില വർധനവിനെതിരെ പ്രതിഷേധം- ചിത്രങ്ങൾ
നിലവില് യുവതിയുടെ ആരോഗ്യനില തൃപ്തികരമാണ്. ജൂലൈ 7ന് യുവതിയുടെ പ്രസവം സാധാരണ നിലയില് നടന്നു. കേരളത്തിന് പുറത്തുള്ള യാത്രാ ചരിത്രമൊന്നുമില്ല. പക്ഷെ അവരുടെ വീട് തമിഴ്നാട് അതിര്ത്തിയിലാണ്. ഒരാഴ്ച മുമ്പ് അവരുടെ അമ്മയ്ക്കും സമാനമായ രോഗ ലക്ഷണങ്ങള് ഉണ്ടായിരുന്നു.
പ്രാഥമികമായി സിക്ക വൈറസാണെന്ന് കണ്ടപ്പോള് തന്നെ ആരോഗ്യ വകുപ്പ് കൃത്യമായ നടപടികള് സ്വീകരിച്ചു. ജില്ലാ സര്വൈലന്സ് ടീം, ജില്ലാ വെക്ടര് കണ്ട്രോള് യൂണിറ്റ്, സംസ്ഥാന എന്റമോളജി ടീം എന്നിവര് പാറശാലയിലെ രോഗബാധിത പ്രദേശം സന്ദര്ശിക്കുകയും നിയന്ത്രണ നടപടികള് ആരംഭിക്കുകയും ചെയ്തു. ദുരിതബാധിത പ്രദേശത്തു നിന്നും സമീപ പ്രദേശങ്ങളില് നിന്നും ശേഖരിച്ച ഈഡിസ് കൊതുകിന്റെ സാമ്പിളുകള് പിസിആര് പരിശോധനയ്ക്കായി അയയ്ക്കാനുള്ള നടപടി സ്വീകരിച്ചിട്ടുണ്ട്. പ്രദേശത്ത് പ്രതിരോധ പ്രവര്ത്തനങ്ങള് ശക്തിപ്പെടുത്തും. എല്ലാ ജില്ലകള്ക്കും ജാഗ്രത നിര്ദേശം നല്കിയിട്ടുണ്ട്.
ഇതെങ്ങനെയുണ്ട്? ഇതോ? കിടിലൻ ഫോട്ടോസുമായി സോഷ്യൽ മീഡിയ കീഴടക്കി ഭാവന