കൊട്ടാരക്കരയിലെ സ്വകാര്യ ബാറിൽ കണക്ക് നോക്കിയപ്പോൾ ലക്ഷങ്ങൾ കുറവ്; രണ്ട് ജീവനക്കാർ പിടിയിൽ

കൊട്ടാരക്കര: കൊല്ലം കൊട്ടാരക്കരയിലെ സ്വകാര്യ ബാർ ഹോട്ടലിൽ ലക്ഷങ്ങളുടെ തട്ടിപ്പ് നടത്തിയ ജീവനക്കാർ പിടിയിൽ. രതിവ്‍, ശ്രീരാജ്. എന്നിവരെയാണ് കൊട്ടാരക്കര പോലീസ് അറസ്റ്റ് ചെയ്തത് സ്ഥാപനത്തിലെ ഓഡിറ്റ് വിഭാ​ഗം നടത്തിയ പരിശോധനയിലാണ് തട്ടിപ്പ് നടന്നതായി കണ്ടെത്തിയത്.

കൊട്ടാരക്കരയിൽ പ്രവർത്തിക്കുന്ന അമ്പലക്കര ​ഗ്രൂപ്പ് ഓഫ് കമ്പനീസിന്റെ ബാർ ഹോട്ടലിലാണ് സാമ്പത്തിക തിരിമറി നടന്നത്. സ്ഥാപനത്തിലെ ക്യാഷർമാരായ നെല്ലിക്കുന്നം സ്വദേശി രതിൻ, വിളങ്ങര സ്വദേശി ശ്രീരാജ് എന്നിവർ ചേർന്ന് മൂന്നര ലക്ഷത്തോളം രൂപയാണ് തട്ടിയെടുത്തത്. അടുത്തിടെ ബാർ ഹോട്ടലിലെ കണക്ക് വിവരങ്ങൾ ഓഡിറ്റ് വിഭാ​ഗം പരിശോധിച്ചപ്പോഴാണ് ക്രമക്കേട് നടന്നതായി കണ്ടെത്തിയത്.

സംശയത്തിന്റെ അടിസ്ഥാനത്തിൽ പ്രതികളുടെ ബാങ്ക് അക്കൗണ്ട് രേഖകൾ രഹസ്യമായി പരിശോധിച്ചു. തട്ടിപ്പ് നടന്ന 2024 ഏപ്രിൽ മുതൽ ആ​ഗസ്റ്റ് 12 വരെയുള്ള കാലയളവിൽ രതിന്റെ അക്കൗണ്ടിൽ‌ വൻ തുക നിക്ഷേപിച്ചതായി സ്ഥിരീകരിച്ചു.

ശ്രീരാജിനും മറ്റ് രണ്ട് സ്റ്റാഫുകൾക്കുമായി ഈ അക്കൗണ്ടിൽ നിന്ന് പണം കൈമാറിയിട്ടുമുണ്ട്. തുടർന്ന് ബാർ ഹോട്ടൽ ഉടമ നൽകിയ പരാതിയുടെ അടിസ്ഥാനത്തിൽ രതിനെയും ശ്രീരാജിനെയും കൊട്ടാരക്കര പോലീസ് അറസ്റ്റ് ചെയ്തു. പ്രതികൾ‌ കൂടുതൽ ക്രമക്കേടുകൾ നടത്തിയിട്ടുണ്ടോ എന്നും അന്വേഷിക്കുന്നുണ്ട്.