ഹൈദരലി ശിഹാബ് തങ്ങള്ക്ക് വിട; ഖബറടക്കം പാണക്കാട് ജുമാ മസ്ജിദില് നടന്നു, ഒഴുകിയെത്തിയത് ആയിരങ്ങള്
മലപ്പുറം: പാണക്കാട് ശിഹാബ് അലി തങ്ങൾ ഇനി ഓർമ്മ. അന്തരിച്ച മുസ്ലീം ലീഗ് സംസ്ഥാന അധ്യക്ഷന് പാണക്കാട് ഹൈദരലി ശിഹാബ് തങ്ങളുടെ ഖബറടക്കം പാണക്കാട് ജുമാ മസ്ജിദില് നടന്നു. മൃതദേഹം ഏറെ നേരം വയ്ക്കാന് പറ്റാത്ത സാഹചര്യം കണക്കിലെടുത്താണ് പുലര്ച്ചെ തന്നെ മൃതദേഹം ഖബറടക്കാന് തീരുമാനിച്ചത്. പുലർച്ചെ 2.30നായിരുന്നു ഖബറടക്കൽ ചടങ്ങ് നടന്നത്. പാണക്കാട് ജുമാമസ്ജിദില് അവസാന മയ്യിത്ത് നമസ്കാരങ്ങള്ക്ക് പാണക്കാട് സയ്യിദ് സാദിഖലി ശിഹാബ് തങ്ങള്, ഹൈദരലി തങ്ങളുടെ മകന് മുഈനലി ശിഹാബ് തങ്ങള് എന്നിവര് നേതൃത്വം നല്കി .
ശിഹാബ് തങ്ങളുടെ പൊതുദര്ശനത്തിനിടെ പി കെ അബ്ദുറബ്ബ് കുഴഞ്ഞുവീണു, ആശുപത്രിയില് പ്രവേശിപ്പിച്ചു
മതപരമായ ചടങ്ങുകള് പൂര്ത്തിയാക്കി സംസ്ഥാന സര്ക്കാരിന്റെ ഔദ്യോഗിക ബഹുമതികളോടെയാണ് ഖബറടക്കം പൂര്ത്തിയാക്കിയത്. ഇന്ന് രാവിലെ 9 മണിക്ക് ഖബറടക്കം എന്നാണ് നേരത്തെ പ്രഖ്യാപിച്ചിരുന്നത്. എന്നാല് ഭൗതിക ശരീരം ഏറെനേരം വയ്ക്കാന് സാധിക്കാത്തതിനാലാണ് ഇത്തരം ഒരു തീരുമാനം എന്നാണ് കുടുംബാഗങ്ങള് അറിയിക്കുന്നത്.
പാണക്കാട് ഹൈദരലി ശിഹാബ് തങ്ങളെ കാണാന് ആയിരങ്ങലാണ് മലപ്പുറത്തേക്ക് ഓടിയെത്തിയത്. കേരളത്തിന്റെ വിവിധ ഭാഗങ്ങളില് നിന്നുള്ള പാര്ട്ടി പ്രവര്ത്തകര് മലപ്പുറം ടൗണ് ഹാളിലേക്ക് എത്തിയിരുന്നു. മുഖ്യമന്ത്രി പിണറായി വിജയന്, പ്രതിപക്ഷ നേതാവ് വിഡി സതീശന്, കാന്തപുരം അബൂബക്കര് മുസ്ലിയാര്, മന്ത്രിമാരായ മുഹമ്മദ് റിയാസ്, വി അബ്ദുറഹ്മാന്, എ.കെ ശശീന്ദ്രന് മുന് മന്ത്രി ആര്യാടന് മുഹമ്മദ് അടക്കമുള്ള പ്രമുഖരെത്തി അന്ത്യോപചാരം അര്പ്പിക്കാന് എത്തി.
മുസ്ലീം ലീഗ് പ്രവര്ത്തകരടക്കം ആയിരക്കണക്കിന് പേരാണ് കിലോമീറ്ററുകളോളം ക്യൂവില് നിന്ന് ഹൈദരലി തങ്ങള്ക്ക് അന്തിമോപചാരം അര്പ്പിച്ചത്. ടൗണ് ഹാളിനുള്ളിലും വലിയ തിരക്കാണ് അനുഭവപ്പെട്ടത്. തിക്കിലും തിരക്കിലും ഒരാള് കുഴഞ്ഞുവീണു. ഇദ്ദേഹത്തെ ആശുപത്രിയിലേക്ക് മാറ്റി. മലപ്പുറം ടൗണ്ഹാളില് പൊതുദര്ശനത്തിന് വെയ്ക്കുന്ന സാഹചര്യത്തിലെ തിരക്ക് കണക്കിലെടുത്ത് ഗതാഗത നിയന്ത്രണമേര്പ്പെടുത്തിയിരുന്നു.
പുതിയ മാളിയേക്കല് സയ്യിദ് അഹ്മദ് പൂക്കോയ തങ്ങളുടെയും ഹാമിദ് കുഞ്ഞി സീതിക്കോയ തങ്ങളുടെ മകള് ആയിശ ചെറുകുഞ്ഞിബീവിയുടെയും മൂന്നാമത്തെ മകനായി 1947 ജൂണ് 15നായിരുന്നു ഹൈദരലി ശിഹാബ് ജനനം. കൊയിലാണ്ടി അബ്ദുള്ള ബാഫഖിയുടെ മകള് ശരീഫ ഫാത്തിമ സുഹ്റയാണ് ഭാര്യ. മക്കള്: ഇരട്ട സഹോദരങ്ങളായ സാജിദ-വാഹിദ, നഈം അലി ശിഹാബ്, മുഈന് അലി ശിഹാബ്. സഹോദരങ്ങള്: സാദിഖലി ശിഹാബ് തങ്ങള്, അബ്ബാസലി ശിഹാബ് തങ്ങള്, മുല്ല ബീവി, പരേതരായ മുഹമ്മദലി ശിഹാബ് തങ്ങള്, ഉമറലി ശിഹാബ് തങ്ങള്, ഖദീജ ബീ കുഞ്ഞിബീവി.
കോഴിക്കോട് എം എം ഹൈസ്കൂളില് വെച്ച് 1959 ല് എസ് എസ് എല് സി പഠനം പൂര്ത്തിയാക്കി. തുടര്ന്ന് തിരുന്നാവായക്കടുത്ത കോന്നല്ലൂരില് മൂന്ന് വര്ഷം ദര്സ പഠനം നടത്തി. പൊന്നാനി മഊനത്തുല് ഇസ്ലാം അറബി കോളജിലും അല്പകാലം പഠിച്ചു. പട്ടിക്കാട് ജാമിഅഃ നൂരിയ്യഃ അറബി കോളേജില് ചേര്ന്ന ഹൈദരലി തങ്ങള് 1974 ലാണ് മൗലവി ഫാസില് ഫൈസി ബിരുദം കരസ്ഥമാക്കിയത്. സൂഫിവര്യനായ ചാപ്പനങ്ങാടി ബാപ്പു മുസ്ലിയാരുടെ കൈകളില് നിന്നായിരുന്നു സനദ് ഏറ്റുവാങ്ങിയത്.
Recommended Video