അജയ് മാക്കനോട് ഷീല ദീക്ഷിതിന് സഹതാപം!

ദില്ലി: നിയമസഭ തിരഞ്ഞെടുപ്പില്‍ സീറ്റൊന്നും കിട്ടാതെ തോറ്റുപോയ കോണ്‍ഗ്രസിനെ നയിച്ച അജയ് മാക്കനോട് മുന്‍ ദില്ലി മുഖ്യമന്ത്രി ഷീല ദീക്ഷിതിന് സഹതാപം. തിരഞ്ഞെടുപ്പ് പ്രചാരണങ്ങള്‍ക്ക് പാര്‍ട്ടിയുടെ മുതിര്‍ന്ന നേതാക്കളെ കൂട്ടാതെയാണ് മാക്കന്‍ പ്രവര്‍ത്തിച്ചത് എന്നാണ് ഷീല ദീക്ഷിത് പറയുന്നത്. അജയ് മാക്കനടക്കം മത്സരിച്ച മുഴുവന്‍ കോണ്‍ഗ്രസ് സ്ഥാനാര്‍ഥികളും തോറ്റിരുന്നു. പലര്‍ക്കും കെട്ടിവെച്ച കാശ് പോലും കിട്ടിയില്ല.

എനിക്ക് മാക്കനോട് സഹതാപമാണ്. അദ്ദേഹത്തിന് ലക്ഷ്യം നഷ്ടപ്പെട്ടു. ഞങ്ങളെ ഒരിക്കലും അദ്ദേഹം കൂടെ കൂട്ടിയില്ല. ദില്ലി തിരഞ്ഞെടുപ്പ് പ്രചാരണങ്ങള്‍ക്ക് കോണ്‍ഗ്രസ് തന്നെ കൂട്ടാത്തതില്‍ ഷീല ദീക്ഷിതിന് നേരത്തെ തന്നെ പരിഭവം ഉണ്ടായിരുന്നു. മത്സരിക്കാനില്ല എന്ന് പറഞ്ഞെങ്കിലും ഷീല ദീക്ഷിത് പ്രചാരണത്തിന് ഇറങ്ങാന്‍ താല്‍പര്യം പ്രകടിപ്പിച്ചിരുന്നു.

ദില്ലി തിരഞ്ഞെടുപ്പില്‍ കോണ്‍ഗ്രസ് വൈസ് പ്രസിഡണ്ട് രാഹുല്‍ ഗാന്ധിയെ പിന്തുണക്കാനാണ് ഷീല ദീക്ഷിത് താല്‍പര്യം കാണിച്ചത്. രാഹുല്‍ ഗാന്ധിയെ കുറ്റപ്പെടുത്തുന്നതില്‍ അര്‍ഥമില്ല. കോണ്‍ഗ്രസ് മാത്രമല്ല, നരേന്ദ്ര മോദിയും അമിത് ഷായും ഈ തിരഞ്ഞെടുപ്പില്‍ തോറ്റു - അവര്‍ പറഞ്ഞു. ആം ആദ്മി പാര്‍ട്ടിക്ക് 67 സീറ്റ് കിട്ടിയപ്പോള്‍ ബി ജെ പിക്ക് 3 സീറ്റുകള്‍ മാത്രമാണ് കിട്ടിയത്.

15 വര്‍ഷം ദില്ലി മുഖ്യമന്ത്രിയായിരുന്ന ഷീല ദീക്ഷിതാണ് ആദ്യമായി കെജ്രിവാളിനോട് തോറ്റത്, കഴിഞ്ഞ തിരഞ്ഞെടുപ്പില്‍. ഭരണകക്ഷിയായിരുന്ന കോണ്‍ഗ്രസ് വെറും 7 സീറ്റിലേക്കും പിന്നീട് ഒന്നുമില്ലായ്മയിലേക്കും പതിക്കുന്ന കാഴ്ചയാണ് ദില്ലിയില്‍ കണ്ടത്. തിരഞ്ഞെടുപ്പില്‍ തോറ്റതിനെ തുടര്‍ന്ന് മാക്കന്‍ പാര്‍ട്ടി സ്ഥാനങ്ങള്‍ രാജിവെച്ചിരുന്നു. എന്നാല്‍ രാജി പാര്‍ട്ടി അംഗീകരിച്ചില്ല.

English summary

I pity Maken; he lost focus, never took us along: Sheila Dikshit