ഓടുന്ന തീവണ്ടിക്ക് മുന്നില് സെല്ഫി, 3 കൂട്ടുകാര് മരിച്ചു!
ദില്ലി: റിപ്പബ്ലിക് ദിനത്തില് സാഹസിക സെല്ഫി എടുക്കാനുള്ള ശ്രമത്തിനിടെ മൂന്ന് കൂട്ടുകാര് തീവണ്ടിയിടിച്ച് മരിച്ചു. താജ്മഹല് കാണാന് വേണ്ടി ആഗ്രയിലേക്ക് പോകുകയായിരുന്നു മൂവരും. ഓടുന്ന തീവണ്ടിക്ക് മുന്നില് വണ്ടി നിര്ത്തി സെല്ഫി എടുക്കാന് ശ്രമിക്കുന്നതിനിടെയാണ് മൂന്ന് പേരും തീവണ്ടിയിടിച്ച് മരിച്ചത്. തിങ്കളാഴ്ച രാവിലെ 9.30 ഓടെ കോസികലയിലെ മധുര റെയില്വേ ട്രാക്കിലാണ് സംഭവം.
യാക്കൂബ്, ഇഖ്ബാല്, അഫ്സല് എന്നിവരാണ് മരിച്ചത്. 20നും 22നും ഇടയിലാണ് മരിച്ച മൂന്ന് കൂട്ടുകാരുടെയും പ്രായം. റെയില്വേ ട്രാക്കില് തങ്ങളുടെ വണ്ടി നിര്ത്തി സെല്ഫി എടുക്കാന് ശ്രമിച്ചതാണ് എന്ന് ഇവരുടെ കൂട്ടത്തിലുണ്ടായിരുന്ന അനീഷ് എന്ന ചെറുപ്പക്കാരന് പോലീസിനോട് പറഞ്ഞു. അനീഷ് മാത്രമാണ് അപകടത്തില് ജീവനോടെ രക്ഷപ്പെട്ടത്.
ഡെയര്ഡെവിള് സെല്ഫിയെടുത്ത് ഫേസ്ബുക്കില് പോസ്റ്റ് ചെയ്യാനായിരുന്നത്രെ ഇവരുടെ ശ്രമം. വണ്ടിനിര്ത്തിയ ശേഷം ട്രാക്കില് കയറിനിന്ന് ഓരോരുത്തരും ചിത്രമെടുക്കാന് ശ്രമിക്കുകയായിരുന്നു. ട്രെയിന് പരമാവധി അടുത്തെത്തിയ ശേഷം ഫോട്ടോ എടുക്കാനായിരുന്നു ശ്രമം. സെല്ഫി എടുത്തെങ്കിലും തീവണ്ടി എത്തുന്നതിന് മുമ്പേ ട്രാക്കില് നിന്നും മാറാന് ഇവര്ക്ക് കഴിഞ്ഞില്ല.
സംഭവത്തില് എന്തെങ്കിലും അട്ടിമറി നടന്നിട്ടുണ്ടോ എന്നും പോലീസ് സംശയിക്കുന്നുണ്ട്. ചൊവ്വാഴ്ചയോടെ കൂടുതല് വിവരം കിട്ടുമെന്ന പ്രതീക്ഷയിലാണ് പോലീസ്. മൊറാദാബാദ് സ്വദേശിയാണ് യാക്കൂബ്. അഫ്സലിന്റെ വീട് ദില്ലിയിലും ഇഖ്ബാലിന്റെ വീട് മൊറാദാബാദിലുമാണ്. ഇവരുടെ മൃതദേഹങ്ങള് പോസ്റ്റ്മോര്ട്ടത്തിന് അയച്ചിരിക്കുകയാണ്.