ശബരിമല: കരിമല വഴിയുള്ള കാനന പാത തുറക്കുന്നതിനുള്ള നടപടി പുരോഗമിക്കുന്നു, എഡിഎം പരിശോധിച്ചു
പത്തനംതിട്ട : ശബരിമല കരിമല വഴിയുള്ള കാനന പാത തുറക്കുന്നതിനുള്ള നടപടിയുടെ ഭാഗമായി എ.ഡി.എം അര്ജുന് പാണ്ഡ്യന്റെ നേതൃത്വത്തിലുള്ള സംഘം പാതയില് പരിശോധന നടത്തി. ബുധനാഴ്ച ഉച്ചയോടെയാണ് ഉദ്യോഗസ്ഥ സംഘം കാനനപാതയിലൂടെ നടന്ന് സ്ഥിതിഗതികള് വിലയിരുത്തിയത്.മകരവിളക്ക് തീര്ത്ഥാടനത്തോടനുബന്ധിച്ച് ഡിസംബര് മുപ്പതോടെ പാത സഞ്ചാരയോഗ്യമാക്കാനാകുമെന്ന് എ.ഡി.എം പറഞ്ഞു. വനം വകുപ്പിന്റെ നേതൃത്വത്തില് പാത തെളിച്ചെടുക്കുന്ന ജോലി ആരംഭിച്ചുകഴിഞ്ഞു.
അയ്യപ്പന്മാര്ക്ക് സുരക്ഷിതമായ യാത്ര ഉറപ്പാക്കാന് മുക്കുഴിയിലും കരിമലയിലും ആശുപത്രി സംവിധാനമൊരുക്കും. 4 എമര്ജന്സ് മെഡിക്കല് കെയര് സെന്ററുകളുണ്ടാകും. വനം വകുപ്പിന്റെ കീഴിലുള്ള ഇക്കോ ഡവലപ്മെന്റ് കമ്മിറ്റികള് ഒരുക്കുന്ന എട്ട് ഇടത്താവളങ്ങളുമുണ്ടാകും. രാത്രി വൈകി വനപാതയിലൂടെയുള്ള സഞ്ചാരം ഒഴിവാക്കും വിധം സമയം ക്രമീകരിക്കും. വൈകിയെത്തുന്നവര്ക്ക് ഇടത്താവളങ്ങളില് വിശ്രമിക്കാന് സൗകര്യം നല്കും. അയ്യപ്പ സേവാസംഘത്തിന്റെ അന്നദാന കേന്ദ്രങ്ങളുണ്ടാകും.
ശുചിമുറികള് സ്ഥാപിക്കുകയും നിലവിലുള്ളവ നവീകരിക്കുകയും ചെയ്യും. വന്യമൃഗങ്ങളില് നിന്ന് തീര്ഥാടകര്ക്ക് സംരക്ഷണം നല്കുന്നതിന് രണ്ട് കിലോമീറ്റര് ഇടവിട്ട് നിരീക്ഷണ സംവിധാനവും ഒരുക്കും. 18 കിലോമീറ്റര് പൂര്ണമായും പെരിയാര് വന്യജീവി സങ്കേതത്തിലൂടെ കടന്നുപോകുന്ന പാത 35 കിലോമീറ്റര് ദൈര്ഘ്യമുണ്ട്. പമ്പാ സ്പെഷല് ഓഫീസര് അജിത് കുമാര് ഐ.പി.എസ്, വനം വകുപ്പ് ഉദ്യോഗസ്ഥര് തുടങ്ങിയവര് പരിശോധനാസംഘത്തിലുണ്ടായിരുന്നു.
ജോസിനെതിരായ യുഡിഎഫ് നീക്കത്തെ പ്രതിരോധിക്കാനിയില്ല, വീഴ്ച: എന്നിട്ടും നടപടിയില്ലാതെ സിപിഎം
കോവിഡ് വ്യാപനം കുറഞ്ഞുവരുന്ന സാഹചര്യത്തില് ശബരിമല തീര്ഥാടന നിയന്ത്രണങ്ങളില് കൂടുതല് ഇളവുകള് അനുവദിക്കാന് മുഖ്യമന്ത്രിയും ദേവസ്വം മന്ത്രിയും നടത്തിയ ചര്ച്ചയില് തീരുമാനമായതിനെ തുടര്ന്ന് പരമ്പരാഗത വഴി യാത്ര ചെയ്യാനും പമ്പയില് സ്നാനം ചെയ്യാനും നേരത്തെ തന്നെ തീർത്ഥാടകർക്ക് അനുമതി നല്കിയിരുന്നു. ത്രിവേണി മുതല് നടപ്പാലം വരെയുള്ള 150 മീറ്ററിലും പാലത്തിനു ശേഷമുള്ള 170 മീറ്റര് സ്ഥലത്തുമാണ് സ്നാനം അനുവദിക്കുക. തീര്ഥാടകര്ക്ക് പ്രവേശിക്കാന് നാല് പ്രവേശന കവാടങ്ങളാണുണ്ടാവുക. ഇവയിലൂടെ മാത്രമേ സ്നാനം അനുവദിക്കുകയുള്ളു. അപകടങ്ങള് ഒഴിവാക്കുന്നതിനായുള്ള എല്ലാ വിധ സുരക്ഷാ ക്രമീകരണങ്ങളും ഒരുക്കിയിട്ടുണ്ട്. ഏതെങ്കിലും പ്രതികൂല സാഹചര്യമുണ്ടായാല് ശബരിമല എഡിഎമ്മിന് സ്നാനം നിര്ത്തിവയ്ക്കുവാനുള്ള അധികാരമുണ്ട്.
പമ്പയില് നിന്നും നീലിമല, അപ്പാച്ചിമേട്, മരക്കൂട്ടം വഴിയുള്ള പരമ്പരാഗത പാത പത്ത് ദിവസങ്ങള്ക്ക് മുന്പ് തുറന്ന് കൊടുത്തത്. പുലര്ച്ചെ രണ്ടു മുതല് രാത്രി എട്ടു വരെയാണ് ഇതുവഴി തീര്ഥാടകരെ കടത്തിവിടുക. തീര്ഥാടകര്ക്ക് നീലിമല വഴിയും, സ്വാമി അയ്യപ്പന് റോഡു വഴിയും സന്നിധാനത്തേക്ക് പോകാം. തീര്ഥാടകരുടെ ആവശ്യാനുസരണം തീര്ഥാടന പാത തെരഞ്ഞെടുക്കാവുന്നതാണ്. പരമ്പരാഗത പാതയില് മരാമത്ത്, ഇലക്ട്രിക്കല് പ്രവര്ത്തനങ്ങള് പൂര്ത്തിയായിയിരുന്നു. പാതയില് ഏഴ് എമര്ജന്സി മെഡിക്കല് സെന്ററുകളും നീലിമല, അപ്പാച്ചിമേട് എന്നിവിടങ്ങളിലായി രണ്ട് കാര്ഡിയോളജി സെന്ററുകളും പ്രവര്ത്തിക്കും. കുടിവെള്ളത്തിനായി 44 കിയോസ്കുകളും, ചുക്കുവെള്ള വിതരണ സംവിധാനവും തയാറാക്കിയിട്ടുണ്ട്. 56 ടോയ്ലറ്റ് യൂണിറ്റുകളും തയാറായി. അയ്യപ്പസേവാസംഘത്തിന്റെ 40 വോളണ്ടിയര്മാര് അടങ്ങുന്ന സ്ട്രച്ചര് യൂണിറ്റുകളും സജ്ജമാക്കിയിട്ടുണ്ട്.
Recommended Video