മഴക്കെടുതിക്ക് ശേഷം എലിപ്പനി! പകര്ച്ച വ്യാധിയെ എങ്ങനെ പ്രതിരോധിക്കാം?
പ്രളയബാധിത പ്രദേശങ്ങളില് എലിപ്പനി പടര്ന്നു പിടിക്കുകയാണെന്നാണ് ഇപ്പോള് വന്നുകൊണ്ടിരിക്കുന്ന റിപ്പോര്ട്ട്, ചില ജീവികളുടെ വിസര്ജ്യം അടങ്ങിയ മലിനജലവുമായുള്ള സമ്പര്ക്കമാണ് ഇതിന് പ്രധാനകാരണമായി ചൂണ്ടിക്കാണിക്കപ്പെടുന്നത്. ലെപ്ടോസ്പൈറ ജനുസില്പ്പെട്ട ഒരിനം സ്പൈറോകീറ്റ മനുഷ്യരില് ഉണ്ടാക്കുന്ന ജന്തുജന്യരോഗമാണ് എലിപ്പനി. പ്രളയബാധിത മേഖലകളിലെ പകര്ച്ച വ്യാധികളില് ഏറ്റവും പ്രധാനമാണിത്. ജീവികളുടെ മലമൂത്ര വിസര്ജ്യം ജലത്തില് കലര്ന്നാണ് എലിപ്പനി പടരുന്നത്.
രോഗവ്യാപനം
രോഗാണുവാഹകരായ എലി, അണ്ണാന്, പശു, ആട്, നായ എന്നിവയുടെ മൂത്രം, വിസര്ജ്ജ്യം മുതലായവ കലര്ന്ന വെള്ളവുമായി സമ്പര്ക്കം വരുന്നവരെയാണ് രോഗം പിടികൂടുന്നത്. തൊലിയിലുള്ള മുറിവുകളില് കൂടിയോ കണ്ണ്, മൂക്ക്, വായ വഴിയോ രോഗാണു മനുഷ്യ ശരീരത്തില് പ്രവേശിക്കുന്നു. രോഗാണു ശരീരത്തില് പ്രവേശിച്ച് കഴിഞ്ഞാല് 4 മുതല് 20 ദിവസത്തിനുള്ളില് രോഗലക്ഷണങ്ങള് പ്രകടമാകും.
ലക്ഷണങ്ങള്
പനി, പേശി വേദന (കാല്വണ്ണയിലെ പേശികളില്) തലവേദന, വയറു വേദന, ഛര്ദ്ദി, കണ്ണ് ചുവപ്പ് എന്നിവയാണ് എലിപ്പനിയുടെ പ്രാരംഭ ലക്ഷ
ണങ്ങള്. തുടക്കത്തില് തന്നെ ശരിയായ ചികിത്സ നല്കുകയാണെങ്കില് രോഗം പൂര്ണ്ണമായും ഭേദമാക്കാം.
ചികിത്സ വൈകരുത്
ആരംഭത്തില് തന്നെ ചികിത്സ ലഭിക്കാത്ത അവസ്ഥയില് രോഗം മൂര്ച്ഛിച്ച് കരള്, വൃക്ക, തലച്ചോര്, ശ്വാസകോശം തുടങ്ങിയ ആന്തരാവയവങ്ങളെ ബാധിക്കുകയും രോഗിയുടെ ജീവന് തന്നെ അപകടത്തിലാവുകയും ചെയ്യും. എലിപ്പനിയുടെ പ്രാരംഭ ലക്ഷണങ്ങള് കണ്ടാല് ഉടന്തന്നെ, ആരോഗ്യപ്രവര്ത്തകരുമായി ബന്ധപ്പെടുകയോ ആശുപത്രികളെ സമീപിക്കുകയോ ചെയ്യണം. ഒരു കാരണവശാലും സ്വയം ചികിത്സ ചെയ്യരുത്.
സൂക്ഷിച്ചാല് ദുഖിക്കേണ്ട
മലിനജലവുമായി സമ്പര്ക്കം വരുന്ന അവസരങ്ങളില് കയ്യുറ, മുട്ട് വരെയുള്ള പാദരക്ഷകള്, മാസ്ക് തുടങ്ങിയ വ്യക്തി സുരക്ഷാ ഉപാധികള് ഉപയോഗിക്കുക.
ശുചീകരണ പ്രവര്ത്തനങ്ങളില് ഏര്പ്പെട്ടിരിക്കുന്നവരും, മലിനജലവുമായി സമ്പര്ക്കം വന്നവരും ഡോക്സിസൈക്ലിന് ഗുളിക 200 മില്ലിഗ്രാം (100 മില്ലി ഗ്രാമിന്റെ രണ്ട് ഗുളികകള്) ആഴ്ചയിലൊരിക്കല് കഴിക്കണം. മലിനജലവുമായി സമ്പര്ക്കം തുടരുന്നത്രയും കാലം ഗുളികയും തുടരണം.
ചികില്സാ സംവിധാനം എല്ലായിടത്തും
താലൂക്ക് ആശുപത്രികള് മുതല് മുകളിലേക്കുള്ള എല്ലാ ആരോഗ്യ സ്ഥാപനങ്ങളിലും എലിപ്പനിക്ക് കിടത്തി ചികിത്സാ സംവിധാനം ഉണ്ട്. പ്രധാന ചികിത്സാ മാര്ഗങ്ങളായ ഡോക്സിസൈക്ലിന് ഗുളിക, പെന്സിലിന് ഇഞ്ചക്ഷന് എന്നിവയുടെ ലഭ്യത ഉറപ്പ് വരുത്തിയിട്ടുണ്ട്
ആരോഗ്യ പ്രവര്ത്തകര് രോഗനിരീക്ഷണം ശക്തിപ്പെടുത്തേണ്ടതും എല്ലാ പനിരോഗികളുടെയും വിവരങ്ങള് ശേഖരിക്കുകയും കൃത്യമായ ചികിത്സ ഉറപ്പാക്കുകയും ചെയ്യണം.
സര്ക്കാര് ആശുപത്രികള്, സ്വകാര്യ ആശുപത്രികള്, ക്ലിനിക്കുകള്, സ്വതന്ത്ര പ്രാക്ടീഷണര്മാര് ഉള്പ്പെടെ എല്ലാവരും സാംക്രമിക രോഗങ്ങളുടെ ദൈനംദിന റിപ്പോര്ട്ടിംഗ് കൃത്യമായി ജില്ലാ സര്വെയ്ലന്സ് ഓഫീസര്ക്ക് ലഭ്യമാക്കണം.
Click it and Unblock the Notifications
Sign in with Google