പാര്‍ലമെന്റ് ചര്‍ച്ചയ്ക്കിടെ വനിതാ എം പി മടിയില്‍

ഡബ്ലിന്‍: പാര്‍ലമെന്റില്‍ വനിതാ എം പിയെ ബലം പ്രയോഗിച്ച് മടിയില്‍ പിടിച്ചിരുത്തിയ അയര്‍ലാന്റ് എം പിക്ക് പണികിട്ടി. ഗര്‍ഭഛിദ്രത്തിന് അനുമതി നല്‍കുന്നതിനുള്ള ചര്‍ച്ചയ്ക്കിടെയാണ് നേരം പോക്കിനായി വനിതാ എം പിയെ അയര്‍ലാന്റ് പാര്‍ലമെന്റ് അംഗമായ ടോം ബാരി മടിയില്‍ പിടിച്ചിരുത്തിയത്.

വനിതാ എം പിയായ ഐന്‍ കോളിസിനെയാണ് ബാരി ബലം പ്രയോഗിച്ച് മടിയിലിരുത്തിയത്. ഏതാനും നിമിഷങ്ങള്‍ ബാരിയുടെ മടിയില്‍ ഇരുന്ന കോളിന്‍സ് കുതറിമാറി എഴുന്നേല്‍ക്കുകയായിരുന്നു. പാര്‍ലമെന്റിലെ മറ്റംഗങ്ങളെ വിളിച്ച് കാഴ്ച കാണിച്ച് ചിരിക്കാനും ബാരി മറന്നില്ല.

ദൃശ്യങ്ങള്‍ രാജ്യത്തെ ടി വി ചാനലുകള്‍ ആഘോഷിക്കാന്‍ തുടങ്ങിയതോടെ സംഭവം വിവാദമായി. ലാപ് ഗേറ്റ് എന്നാണ് ഐറിഷ് വിവാദത്തിന് മാധ്യമങ്ങള്‍ നല്‍കിയിരിക്കുന്ന പേര്. മദ്യലഹരിയിലായിരുന്ന താന്‍ അറിയാതെ ചെയ്തുപോയതാണ് എന്നാണ് ബാരിയുടെ വിശദീകരണം.

എന്നാല്‍ സംഭവദിവസം പാര്‍ലമെന്റിലെ ബാര്‍ അവധിയായിരുന്നു എന്നും ബാരി കള്ളം പറയുകയാണ് എന്നും റിപ്പോര്‍ട്ടുകളുണ്ട്. എന്തായാലും കോളിന്‍സിനോട് ബാരി മാപ്പ് പറഞ്ഞിട്ടുണ്ട്. മാപ്പ് പറയേണ്ടി വന്നത് മാത്രമല്ല, ബാരിയുടെ കുസൃതിക്ക് ഭാര്യയുടെ കയ്യില്‍ നിന്നും കണക്കിന് കിട്ടുകയും ചെയ്തത്രെ. വനിതാ എം പിയെ മടിയില്‍ പിടിച്ചിരുത്തിയത് വഴി ലോകത്തുള്ള മുഴുവന്‍ പെണ്ണുങ്ങളെയും അയര്‍ലാന്റ് എം പി അപമാനിച്ചു എന്നാണ് വ്യാപകമായ പരാതി.

വെള്ളിയാഴ്ചയാണ് അമ്മയുടെ ജീവന്‍ അപകടത്തിലാവുന്ന സന്ദര്‍ഭങ്ങളില്‍ ഗര്‍ഭച്ഛിദ്ര നിയമവിധേയമാക്കാം എന്ന ബില്ലിന് അയര്‍ലാന്റ് പാര്‍ലമെന്റ് അനുകൂല വോട്ട് നല്‍കിയത്. കത്തോലിക്കാ സഭയുടെ ശക്തമായ എതിര്‍പ്പിനിടയില്‍ 31ന് എതിരെ 127 വോട്ടുകള്‍ക്കാണ് ബില്‍ പാസായത്.

English summary

Amid the debate over that new law in the Irish Parliament, MP Tom Barry was caught on camera pulling a female member of Parliament, Aine Collins, onto his lap for several seconds.