സിക വൈറസ്: ഗര്ഭിണികളില് ഗുരുതരമാകാന് സാധ്യത, മുന്നറിയിപ്പുമായി ആലപ്പുഴ മെഡിക്കല് ഓഫീസര്
ആലപ്പുഴ: സിക വൈറസ് രോഗം ഗര്ഭിണികളില് ഗുരുതരമാകാന് സാധ്യതയുള്ളതിനാല് ശ്രദ്ധപാലിക്കണമെന്ന് ജില്ല മെഡിക്കല് ഓഫീസര് അറിയിച്ചു. ഈഡിസ് കൊതുകുകള് പരത്തുന്ന രോഗമാണ് സിക വൈറസ് രോഗം. ആശുപത്രികളില് പ്രവേശിപ്പിക്കേണ്ട രീതിയില് രോഗം ഗുരുതരമാകാനും മരണപ്പെടാനുമുളള സാധ്യത താരതമ്യേന കുറവാണ്. ഗര്ഭിണികളില് രോഗം ഗുരുതരമാകാനിടയുണ്ട്.
ഗര്ഭിണികളില് ആദ്യത്തെ നാല് മാസത്തില് വൈറസ് ബാധയുണ്ടായാല് ഗര്ഭസ്ഥ ശിശുവിന്റെ തലയുടെ വലിപ്പം കുറയുന്ന വൈകല്യം (മൈക്രോസെഫാലി), ഗര്ഭഛിദ്രം, ചാപിളള, മാസം തികയാതെയുളള ജനനം തുടങ്ങിയ സങ്കീര്ണ്ണതകള്ക്കിടയുണ്ട്. ഗര്ഭിണികളില് നിന്നും ഗര്ഭസ്ഥ ശിശുവിനും രോഗം പകരുമെന്നതിനാല് കൃത്യമായി രോഗനീരീക്ഷണം നടത്തുക.
പനി, തലവേദന, ശരീര വേദന, സന്ധിവേദന തൊലിപ്പുറത്തുണ്ടാകുന്ന ചെറിയ പാടുകള്, ശരീരത്തില് തിണര്പ്പ്, കണ്ണുകള് ചുവക്കുക തുടങ്ങിയവയാണ് സാധാരണ കണ്ടു വരുന്ന ലക്ഷണങ്ങള്. അണുബാധയുളള എല്ലാവരിലും രോഗലക്ഷണങ്ങള് കാണണമെന്നില്ല. ലക്ഷണങ്ങള്ക്കനുസൃതമായ രോഗപരിചരണം കൊണ്ട് രോഗം ഭേദമാക്കാം. രോഗം പരത്തുന്ന കൊതുകുകള് പകല്സമയത്താണ് കടിക്കുന്നത്. ഗര്ഭിണികളും ഗര്ഭത്തിനായി തയാറെടുക്കുന്ന സ്ത്രീകളും കൊതുക് കടിയേല്ക്കാതെ ശ്രദ്ധിക്കുക.
പകല് സമയത്ത് ഉറങ്ങുമ്പോള് കൊതുക് വല ഉപയോഗിക്കുക. കൊതുക് കടക്കാത്ത വിധം ജനലുകളും വാതിലുകളും വലയടിക്കുക. കൊതുക് വളരാനിടയുളള ശുദ്ധജലം കെട്ടിക്കിടക്കാനിടയുളള ഉറവിടങ്ങള് വീടിനും പരിസരത്തുമുളളത് കണ്ടെത്തി ഒഴിവാക്കുക. വീടിനുളളില് വളര്ത്തുന്ന ചെടികള്, വെള്ളം നിറച്ച പാത്രങ്ങളില് വളര്ത്തുന്ന ചെടികള് എന്നിവ ഒഴിവാക്കുക. ആഴ്ചയിലൊരിക്കല് വെള്ളം മാറ്റുകയോ മണ്ണില് നട്ടുവളര്ത്തുകയോ ചെയ്യുക. ലൈംഗികബന്ധത്തിലൂടെ സിക രോഗം പകരുമെന്നതിനാല് രോഗബാധിത പ്രദേശങ്ങളില് നിന്നും യാത്ര ചെയ്തു വന്നവര് സുരക്ഷിത ലൈംഗികബന്ധം പുലര്ത്തുക.
ഗര്ഭിണികള് സുരക്ഷിതമായി വീട്ടില് കഴിയുക. ഗര്ഭിണിയാകാന് സാധ്യതയുളള സ്ത്രീകളും അനിവാര്യമല്ലാത്ത യാത്രകള് ഒഴിവാക്കുക. ഗര്ഭിണികള് ചെറിയ പനി, ശരീരവേദന എന്നിവ അനുഭവപ്പെട്ടാല് ചികിത്സ തേടണം.
Click it and Unblock the Notifications
Sign in with Google