മഹാ വികാസ് അഘാഡിയെ അട്ടിമറിക്കാന് കഴിയാത്തതില് അവര് നിരാശരാണ്; ബിജെപിയ്ക്കെതിരെ പവാര്
മുംബൈ: മഹാരാഷ്ട്രയില് മഹാ വികാസ് അഘാഡി സര്ക്കാരിനെ അട്ടിമറിക്കാനുള്ള ശ്രമങ്ങളാണ് ബി ജെ പി നേതൃത്വത്തില് നടക്കുന്നതെന്ന് എന് സി പി അധ്യക്ഷന് ശരദ് പവാര്. പ്രതിപക്ഷ നേതാവ് ദേവേന്ദ്ര ഫഡ്നാവിസ് ചൊവ്വാഴ്ച പുറത്തുവിട്ട വീഡിയോ റെക്കോര്ഡിംഗുകള് കേന്ദ്ര ഏജന്സികള്ക്ക് പങ്കുണ്ടെന്നാണ് കാണിക്കുന്നതെന്ന് ശരദ് പവാര് പറഞ്ഞു. റെക്കോര്ഡിംഗുകള് 125 മണിക്കൂര് വരെ നീളുമെന്ന് ഞാന് കേട്ടിട്ടുണ്ട്. അത് ശരിയാണെങ്കില്, ഈ നിയമം നടപ്പിലാക്കാന് നിങ്ങള്ക്ക് ശക്തമായ ഏജന്സികളുടെ പിന്തുണ ആവശ്യമാണ്. അത്തരം ഏജന്സികള് കേന്ദ്ര സര്ക്കാരിന്റെ പക്കല് മാത്രമേ ലഭ്യമാകൂ.
ഒരു സംസ്ഥാന സര്ക്കാര് ഓഫീസില് പ്രവേശിച്ച് മണിക്കൂറുകളോളം റെക്കോര്ഡിംഗുകള് നടത്താന് അവര്ക്ക് കഴിഞ്ഞു. ഈ സംഭവവും ടേപ്പുകളുടെ സത്യാവസ്ഥയും സംസ്ഥാന സര്ക്കാര് അന്വേഷിക്കുമെന്ന് എനിക്ക് ഉറപ്പുണ്ട്, ശരദ് പവാര് പറഞ്ഞു. മഹാരാഷ്ട്ര വികാസ് അഘാഡി ഗവണ്മെന്റിന്റെ നേതാക്കള് സംസ്ഥാന ബി ജെ പി നേതാക്കളെ കള്ളക്കേസില് കുടുക്കാന് ശ്രമിക്കുന്നതിന്റെ തെളിവ് ടേപ്പുകളിലുണ്ടെന്ന് അവകാശപ്പെട്ട് ഫഡ്നാവിസ് ചൊവ്വാഴ്ച മഹാരാഷ്ട്ര നിയമസഭാ ഡെപ്യൂട്ടി സ്പീക്കര് നര്ഹരി സിര്വാളിന് മുന്നില് വീഡിയോ റെക്കോര്ഡിംഗുകള് ഹാജരാക്കിയിരുന്നു.
ഇതിന്റെ പശ്ചാത്തലത്തിലാണ് ശരദ് പവാറിന്റെ പ്രതികരണം. മഹാ വികാസ് അഘാഡി സര്ക്കാരിനെ അസ്ഥിരപ്പെടുത്താന് കഴിയാത്തതിനാല് ബി ജെ പി തെറ്റായ ആരോപണങ്ങള് ഉന്നയിക്കുകയാണെന്ന് ശരദ് പവാര് പ്രതികരിച്ചു. ബി ജെ പി നേതാക്കള് പരാതികള് ഉന്നയിക്കുന്നു, തുടര്ന്ന് തിരഞ്ഞെടുക്കപ്പെട്ട ജനപ്രതിനിധികളെ ലക്ഷ്യമിടുന്നു. ഇത് മഹാരാഷ്ട്രയിലും പശ്ചിമ ബംഗാളിലും നടക്കുന്നുണ്ടെന്നും അദ്ദേഹം കൂട്ടിച്ചേര്ത്തു. അനില് ദേശ്മുഖിനും കുടുംബത്തിനും കൂട്ടാളികള്ക്കുമെതിരെ 90 തവണയെങ്കിലും കേന്ദ്ര ഏജന്സികള് റെയ്ഡ് നടത്തിയതായും പവാര് പറഞ്ഞു.
അനില് ദേശ്മുഖ്, അദ്ദേഹത്തിന്റെ കുടുംബം, ബന്ധുക്കള്, പ്രൈവറ്റ് സെക്രട്ടറി, ചാര്ട്ടേഡ് അക്കൗണ്ടന്റ് എന്നിവരെ 90 തവണയെങ്കിലും റെയ്ഡ് ചെയ്തതായി എനിക്ക് വിവരം ലഭിച്ചിട്ടുണ്ട്. ഇദ്ദേഹത്തിന്റെ കേസില് 200 ലധികം പേരുടെ മൊഴി രേഖപ്പെടുത്തിയിട്ടുണ്ട്. എന്ഫോഴ്സ്മെന്റ് ഡയറക്ടറേറ്റ് 50 റെയ്ഡുകളും സെന്ട്രല് ബ്യൂറോ ഓഫ് ഇന്വെസ്റ്റിഗേഷന് 20 റെയ്ഡുകളും ആദായ നികുതി വകുപ്പ് 20 റെയ്ഡുകളും നടത്തി. ഒരു വ്യക്തിയുമായി ബന്ധപ്പെട്ട കേസില് ആകെ 90 റെയ്ഡുകള് നടത്തി. ഒരു അഡ്മിനിസ്ട്രേറ്റര് എന്ന നിലയിലുള്ള എന്റെ അനുഭവത്തില് താന് ഇത് മുമ്പ് കേട്ടിട്ടില്ലെന്നും അദ്ദേഹം കൂട്ടിച്ചേര്ത്തു.
കേന്ദ്ര ഏജന്സികളെ എങ്ങനെ ഉപയോഗിക്കുന്നു എന്നതിന്റെ പ്രതീകമാണ് ഈ റെയ്ഡുകള്. കേന്ദ്ര ഏജന്സികളെ ഈ രീതിയില് ഉപയോഗിക്കുന്നത് പാര്ലമെന്ററി ജനാധിപത്യത്തില് ലജ്ജാകരമായ കീഴ് വഴക്കമാണെന്നും ശരദ് പവാര് പറഞ്ഞു.
കേന്ദ്ര ഏജന്സികളിലെ ഉദ്യോഗസ്ഥര് ജനങ്ങളില് നിന്ന് പണം തട്ടുന്നത് എങ്ങനെയെന്ന് ചൂണ്ടിക്കാട്ടി ശിവസേന എം പി സഞ്ജയ് റാവത്ത് പ്രധാനമന്ത്രി നരേന്ദ്ര മോദിക്ക് കത്തെഴുതിയിട്ടുണ്ടെന്നും അദ്ദേഹം പറഞ്ഞു. പ്രധാനമന്ത്രി ഈ കത്ത് ശരിയായ അര്ത്ഥത്തില് മനസിലാക്കുമെന്ന് താന് പ്രതീക്ഷിക്കുന്നുവെന്നും അദ്ദേഹം വ്യക്തമാക്കി.
മുന് മുഖ്യമന്ത്രി ദേവേന്ദ്ര ഫഡ്നാവിസിനെയും ബി ജെ പി നേതാവ് ഗിരീഷ് മഹാജനെയും രാഷ്ട്രീയമായി അവസാനിപ്പിക്കാന് ആഗ്രഹിക്കുന്നുവെന്ന് വീഡിയോയിലുണ്ട് എന്നത് കേട്ട് താന് ചിരിച്ചെന്നും റെക്കോഡിംഗില് ചില കോമിക് വിവരങ്ങളും ഉണ്ടെന്ന് തോന്നുന്നുവെന്നും അദ്ദേഹം കൂട്ടിച്ചേര്ത്തു. ശിവസേനയും എന് സി പിയും കോണ്ഗ്രസും അടങ്ങുന്ന മഹാ വികാസ് അഘാഡി എതിരാളികളെ ലക്ഷ്യം വെച്ച് അധികാര ദുര്വിനിയോഗം നടത്തുന്നില്ലെന്നും പവാര് പറഞ്ഞു.
Click it and Unblock the Notifications
Sign in with Google