ഹിന്ദുവികാരത്തെയും ദൈവത്തേയും നിന്ദിച്ചാല്‍ ഒരു കുഴപ്പവുമില്ലേ? ട്വിറ്ററിനോട് ദല്‍ഹി ഹൈക്കോടതി

Updated: Tuesday, March 29, 2022, 16:26 [IST]

ന്യൂദല്‍ഹി: ഹിന്ദു ദൈവത്തെ നിന്ദിക്കുന്ന ഉള്ളടക്കം ആവര്‍ത്തിച്ച് പോസ്റ്റ് ചെയ്തതായി ആരോപിക്കപ്പെടുന്ന നിരീശ്വരവാദി സംഘടനയുടെ അക്കൗണ്ട് ബ്ലോക്ക് ചെയ്യാന്‍ വേണ്ടത്ര വേഗത്തില്‍ പ്രവര്‍ത്തിക്കാത്തതിന് ട്വിറ്ററിന് ഡല്‍ഹി ഹൈക്കോടതിയുടെ വിമര്‍ശനം. 'മറ്റൊരു മതം' ആയിരുന്നെങ്കില്‍ ട്വിറ്റര്‍ കൂടുതല്‍ സെന്‍സിറ്റീവ് ആകുമായിരുന്നുവെന്ന് നിരീക്ഷിച്ച കോടതി, കുറ്റകരമായ ട്വീറ്റുകള്‍ക്കെതിരെ കോടതി ഉത്തരവിന് ശേഷം മാത്രമേ നടപടിയെടുക്കൂ എന്ന നിയമം കാണിക്കൂവെന്നും കമ്പനിയോട് ആവശ്യപ്പെട്ടു.

ആത്യന്തികമായി, ഉള്ളടക്കത്തെക്കുറിച്ച് നിങ്ങള്‍ക്ക് സെന്‍സിറ്റീവ് ആയി തോന്നുന്ന ആളുകളെ നിങ്ങള്‍ തടയും. എന്നാല്‍ ലോകത്തിലെ മറ്റ് പ്രദേശങ്ങളിലെ മറ്റ് ആളുകളുടെ, മറ്റ് വംശങ്ങളുടെ സംവേദനക്ഷമതയെക്കുറിച്ച് നിങ്ങള്‍ക്ക് വിഷമമില്ല. മറ്റൊരു മതവുമായി ബന്ധപ്പെട്ട് സമാനമായ കാര്യങ്ങള്‍ ചെയ്യുകയാണെങ്കില്‍, നിങ്ങള്‍ കൂടുതല്‍ ജാഗ്രതയും സംവേദനക്ഷമതയുമുള്ളവരായിരിക്കുമെന്ന് ഞങ്ങള്‍ പറയാന്‍ ധൈര്യപ്പെടുന്നു, എന്നായിരുന്നു ഹൈക്കോടതി പറഞ്ഞത്. ആക്ടിംഗ് ചീഫ് ജസ്റ്റിസ് വിപിന്‍ സംഘി, ജസ്റ്റിസ് നവിന്‍ ചൗള എന്നിവരടങ്ങിയ ഡിവിഷന്‍ ബെഞ്ചിന്റേതായിരുന്നു പരാമര്‍ശം.

വിവരസാങ്കേതിക നിയമത്തിലെ സെക്ഷന്‍ 69 എ പ്രകാരം അവ തടയാന്‍ കഴിയുമോയെന്നറിയാന്‍ സംശയാസ്പദമായ ട്വീറ്റുകളും ഉപയോക്താവിന്റെ മറ്റ് ആക്ഷേപകരമായ പോസ്റ്റുകളും പരിശോധിക്കാന്‍ കേന്ദ്രത്തോട് നിര്‍ദ്ദേശിച്ചു. എത്തിസ്റ്റ് റിപ്പബ്ലിക് എന്ന അക്കൗണ്ടിനെ കുറിച്ചുള്ള മറ്റ് വിവരങ്ങളും വെളിപ്പെടുത്താനും ബെഞ്ച് ഉത്തരവിട്ടു. എത്തിസ്റ്റ് റിപ്പബ്ലിക് എന്ന അക്കൗണ്ട് പോസ്റ്റ് ചെയ്ത കാളി ദേവിയെക്കുറിച്ചുള്ള ആക്ഷേപകരമായ ഉള്ളടക്കം നീക്കം ചെയ്യണമെന്ന് ആവശ്യപ്പെട്ട് സമര്‍പ്പിച്ച ഹര്‍ജി പരിഗണിച്ചായിരുന്നു കോടതയുടെ നിര്‍ദ്ദേശം. ഉപയോക്താക്കളെ നിരീക്ഷിക്കാനും അവര്‍ കുറ്റകരമായ എന്തെങ്കിലും പോസ്റ്റുചെയ്യുന്നുണ്ടോയെന്ന് കണ്ടെത്താനും ട്വിറ്ററിന്റെ ഭാഗത്ത് നിന്ന് എന്തെങ്കിലും ചെയ്യുന്നുണ്ടോ എന്ന് കോടതി ചോദിച്ചു.

ആവര്‍ത്തിച്ചുള്ള പരാതികള്‍ ഉണ്ടായാല്‍ അക്കൗണ്ട് ബ്ലോക്ക് ചെയ്യണോ അതോ പരാതി വരുമ്പോഴെല്ലാം ഉള്ളടക്കം നീക്കം ചെയ്യുകയാണോ ചെയ്യേണ്ടത് എന്നും കോടതി ആരാഞ്ഞു. ഇതിന് മറുപടിയായി, അക്കൗണ്ടിലെ ആറ് ട്വീറ്റുകള്‍ നീക്കം ചെയ്തതായും കര്‍ണാടക പോലീസ് എഫ് ഐ ആര്‍ രജിസ്റ്റര്‍ ചെയ്തതായും ട്വിറ്റര്‍ അറിയിച്ചു. എന്നാല്‍, കോടതി ഉത്തരവില്ലാതെ അക്കൗണ്ട് ബ്ലോക്ക് ചെയ്യാന്‍ കഴിയില്ലെന്ന ട്വിറ്ററിന്റെ മറുപടിചാദ്യം ചെയ്ത ഡിവിഷന്‍ ബെഞ്ച്, 'ഇതാണ് യുക്തിയെങ്കില്‍, നിങ്ങള്‍ എന്തിനാണ് ട്രംപിനെ ബ്ലോക്ക് ചെയ്തത് എന്നും ചോദിച്ചു. ഒരു കോടതി ഉത്തരവ് ഉള്ളപ്പോള്‍ മാത്രമേ നിങ്ങള്‍ക്ക് പ്രവര്‍ത്തിക്കാന്‍ കഴിയൂ എന്ന് നിങ്ങള്‍ കാണിക്കുന്നു.

അതേസമയം ഒരു ഉപയോക്താവ് തുടര്‍ച്ചയായി കുറ്റകരമായ ഉള്ളടക്കം പോസ്റ്റുചെയ്യുമ്പോള്‍ ട്വീറ്റുകള്‍ ബ്ലോക്ക് ചെയ്യാനുള്ള ഉത്തരവുകള്‍ പുറപ്പെടുവിക്കുമെന്ന് കേന്ദ്രം ബെഞ്ചിനെ അറിയിച്ചു. ഉപയോക്താക്കളുടെ പരാതിയുടെ അടിസ്ഥാനത്തില്‍ ട്വിറ്റര്‍ സ്വന്തം അക്കൗണ്ടുകള്‍ ബ്ലോക്ക് ചെയ്യുന്നതായും സര്‍ക്കാര്‍ വാദിച്ചു. ഏറ്റവും പുതിയ ഐടി നിയമങ്ങള്‍ ജുഡീഷ്യറിയുടെ മുമ്പാകെയാണെന്നും വിഷയം കോടതിയുടെ പരിഗണനയിലാകുന്നതുവരെ സമാനമായ കുറ്റകരമായ വസ്തുക്കള്‍ അക്കൗണ്ടില്‍ പോസ്റ്റ് ചെയ്യില്ലെന്നും എത്തിസ്റ്റ് റിപ്പബ്ലികിനെ പ്രതിനിധീകരിച്ച് ഒരു അഭിഭാഷകന്‍ കോടതിയെ അറിയിച്ചു.

ഒക്ടോബര്‍ 29-ന് ആക്ഷേപകരമായ ഉള്ളടക്കം നീക്കം ചെയ്യാന്‍ ട്വിറ്ററിനോട് കോടതി ആദ്യം നിര്‍ദ്ദേശിച്ചിരുന്നു. ആ സമയത്ത്, അന്നത്തെ ചീഫ് ജസ്റ്റിസ് ഡിഎന്‍ പട്ടേലിന്റെ നേതൃത്വത്തിലുള്ള ഡിവിഷന്‍ ബെഞ്ച് ജനങ്ങളുടെ വികാരങ്ങള്‍ക്ക് പ്രാധാന്യം നല്‍കാനും ഉള്ളടക്കം നീക്കം ചെയ്യാനും ട്വിറ്ററിനോട് പറഞ്ഞിരുന്നു. സെപ്തംബര്‍ ആറിന് കേസ് വീണ്ടും പരിഗണിക്കും.