റിസര്വ് ബാങ്കിന്റെ കൈയില് എത്ര രൂപയുടെ സ്വര്ണമുണ്ടെന്നോ..? വില കേട്ടാല് കണ്ണ് തള്ളും!
ആഗോള വിപണിയിലും ആഭ്യന്തര വിപണിയിലുമെല്ലാം സ്വര്ണ വില പിടിവിട്ട് കുതിക്കുകയാണ്. ആഗോള വിപണിയില് ഒൗണ്സിന് 3300 ഡോളര് എന്ന നിരക്കിലും ആഭ്യന്തര വിപണിയില് പവന് 70000 ത്തിന് മുകളിലുമാണ് സ്വര്ണ വില. യു എസ് - ചൈന വ്യാപാര യുദ്ധത്തിന്റെ പശ്ചാത്തലത്തില് ആണ് സ്വര്ണ വില കുതിച്ചുയരുന്നത്. സാമ്പത്തിക പ്രതിസന്ധിക്കാലത്ത് നിക്ഷേപകര് സ്വര്ണത്തിലേക്ക് തിരിയുന്നത് സ്വാഭാവികമാണ്.
എന്നാല് വ്യക്തികള് മാത്രമല്ല, കേന്ദ്ര ബാങ്കുകളും സ്വര്ണത്തിലേക്കാണ് തിരിഞ്ഞിരിക്കുന്നത്. പല കേന്ദ്ര ബാങ്കുകളും അവരുടെ സ്വര്ണത്തിന്റെ കരുതല് ശേഖരം കുത്തനെ വര്ധിപ്പിച്ചിരിക്കുകയാണ്. റിസര്വ് ബാങ്ക് കൈവശം വച്ചിരിക്കുന്ന സ്വര്ണത്തിന്റെ ഗണ്യമായ ശേഖരം നിലവിലെ വിലയായ ട്രോയ് ഔണ്സിന് 3,300 ഡോളറില് ഏകദേശം 97 ബില്യണ് ഡോളര് വിലമതിക്കുന്നതാണ്.
അതായത് ഏകദേശം 8 ലക്ഷം കോടി രൂപ! 2025 ഫെബ്രുവരിയിലെ കണക്ക് അനുസരിച്ച് റിസര്വ് ബാങ്കിന്റെ മൊത്തം സ്വര്ണ ശേഖരം 879 ടണ് ആണ്. ആര്ബിഐ അതിന്റെ സ്വര്ണ ശേഖരം സജീവമായി വര്ധിപ്പിച്ച് കൊണ്ടിരിക്കുകയാണ്. 2024 ല് ആഗോള സെന്ട്രല് ബാങ്കുകളില് രണ്ടാമത്തെ വലിയ സ്വര്ണ്ണ വാങ്ങുന്ന ബാങ്കായും റിസര്വ് ബാങ്ക് ഉയര്ന്നുവന്നിരുന്നു. 2024 ല് 72.6 ടണ് സ്വര്ണമാണ് റിസര്വ് ബാങ്ക് കൂട്ടിച്ചേര്ത്തത്.
2025 ജനുവരി മുതല് ഫെബ്രുവരി വരെ, ആര്ബിഐ അതിന്റെ കരുതല് ശേഖരത്തില് 2.8 ടണ് സ്വര്ണമാണ് കൂട്ടിച്ചേര്ത്തിരിക്കുന്നത്. ഒരു നീണ്ട ഇടവേളയ്ക്ക് ശേഷം 2017 ല് ആണ് റിസര്വ് ബാങ്ക് വീണ്ടും സ്വര്ണം സ്ഥിരമായി ശേഖരിക്കാന് തുടങ്ങിയത്. ആഗോളതലത്തില് മറ്റ് കേന്ദ്ര ബാങ്കുകളും തങ്ങളുടെ കരുതല് ശേഖരത്തില് വന് തോതില് സ്വര്ണം കൂട്ടിച്ചേര്ക്കുന്നുണ്ട്. കഴിഞ്ഞ മൂന്ന് വര്ഷമായി പ്രതിവര്ഷം 1000 ടണ്ണിലധികം സ്വര്ണമാണ് കേന്ദ്ര ബാങ്കുകള് വാങ്ങുന്നത്.
2022-ല് 1,082 ടണ്, 2023-ല് 1,037 ടണ്, 2024-ല് 1,045 ടണ് എന്നിങ്ങനെയായിരുന്നു റെക്കോര്ഡ് വാങ്ങലുകള്. 2025 ജനുവരി, ഫെബ്രുവരി മാസങ്ങളില് ആഗോള കേന്ദ്ര ബാങ്കിന്റെ വാങ്ങലുകള് ആകെ 44 ടണ് ആണ്. അതിനിടെ ആഗോള വിപണിയില് സ്വര്ണ വില ഔണ്സിന് ഏകദേശം 3300 ഡോളര് എന്ന എക്കാലത്തെയും ഉയര്ന്ന നിരക്കിലേക്ക് എത്തിയിരിക്കുകയാണ്. കഴിഞ്ഞ വര്ഷത്തെ അപേക്ഷിച്ച് 40% വര്ധനവാണ് ഇത്.
2024 ല് 28% വര്ധനവും 2023 ല് 15% വര്ധനവും ആണ് സ്വര്ണത്തിന് ഉണ്ടായത്. എന്നാല് 2025 ല് ഇതുവരെ മാത്രം 25% ആണ് വില വര്ധിച്ചത്. കഴിഞ്ഞ വര്ഷത്തേക്കാള് വളരെ പെട്ടെന്നാണ് സ്വര്ണം ഔണ്സിന് 1000 ഡോളര് വര്ധിച്ചത്. സമീപകാല ചരിത്രത്തിലെ ഏറ്റവും വേഗതയേറിയ വര്ധനവാണ്. മുന് വര്ഷങ്ങളിലെ മന്ദഗതിയിലുള്ളതും സ്ഥിരവുമായ വളര്ച്ച പ്രവണതയുമായി താരതമ്യപ്പെടുത്തുമ്പോള് ഇത് വളരെ വേഗത്തിലാണ്.
താരിഫ് മൂലമുണ്ടാകുന്ന മാന്ദ്യം, ദുര്ബലമാകുന്ന യുഎസ് ഡോളര് സൂചിക, തുടര്ച്ചയായ ഭൗമരാഷ്ട്രീയ സംഘര്ഷങ്ങള് എന്നിവയെക്കുറിച്ചുള്ള ആശങ്കകള്ക്കിടയില്, നിക്ഷേപ ആവശ്യകതയും ആഗോള കേന്ദ്ര ബാങ്ക് സ്വര്ണ്ണ വാങ്ങലുകളും ഭാവിയില് നിലനില്ക്കുമെന്ന് പ്രതീക്ഷിക്കുന്നു. അതിനാല് തന്നെ സ്വര്ണത്തിന്റെ വില ഇനിയും വര്ധിക്കാന് തന്നെയാണ് സാധ്യത.
കഴിഞ്ഞ രണ്ട് ദിവസത്തെ വിലയിടിവിന് ശേഷം സ്വര്ണ വില ഇന്ന് വീണ്ടും തിരിച്ചുകയറിയിരുന്നു. ഇന്ന് ഒരു പവന് സ്വര്ണത്തിന് കേരളത്തില് 760 രൂപയോളമാണ് കൂടിയത്. ഇതോടെ ഇടവേളയ്ക്ക് ശേഷം പവന് വില 70000 എന്ന മാന്ത്രിക സംഖ്യ ഇന്ന് പിന്നിട്ടിരുന്നു. ഇന്ന് ഒരു പവന് സ്വര്ണത്തിന് 70520 രൂപയാണ് വില.
Click it and Unblock the Notifications
Sign in with Google