കറുത്തവനെ വെടിവച്ച് കൊന്ന് 'നീതി' നടപ്പാക്കുന്ന അമേരിയ്ക്കന്‍ പൊലീസ്

കാലിഫോര്‍ണിയ: മനുഷ്യന്റെ അവകാശങ്ങള്‍ക്കും സ്വാതന്ത്ര്യങ്ങള്‍ക്കും വിലങ്ങിടുന്ന സദാചാര പൊലീസിംഗിനെചിരെ കേരളത്തില്‍ പ്രതിഷേധം നടക്കുമ്പോള്‍ അവകാശ ലംഘനങ്ങള്‍ക്കെതിരെ വലിയ പ്രതിഷേധങ്ങള്‍ നടക്കുകയാണ് അമേരിയ്ക്കയില്‍ . ചുംബിയ്ക്കാനോ ആശ്ലേഷിയ്ക്കാനോ വേണ്ടിയല്ല സമരം. ഇനിയും അവസാനിച്ചിട്ടില്ലാത്ത വര്‍ണ വിവേചനത്തിനെതിരായ സമരമാണ് യുഎസില്‍ നടക്കുന്നത്. ലോകം വീണ്ടുമൊരു മനുഷ്യവാകാശ ദിനം ആഘോഷിയ്ക്കുന്ന വേളയില്‍ അമേരിയ്ക്കയിലെ നൂറുകണക്കിന് ആളുകളാണ് തെരുവിലിറങ്ങുന്നത് .കറുത്തവനെ വേട്ടയാടുന്ന കിരാത നീതിയ്‌ക്കെതിരെ .

അമേരിയ്ക്ക, ഓസ്‌ട്രേലിയ തുടങ്ങിയ പല രാജ്യങ്ങളിലും കറുത്ത വര്‍ഗക്കാരെന്ന് മുദ്ര കുത്തപ്പെട്ടവര്‍ക്കെതിരെയുള്ള അതിക്രമങ്ങള്‍ പെരുകുകയാണ്. അമേരിയ്ക്കയില്‍ നിന്നുള്ള റിപ്പോര്‍ട്ടുകളാണ് ഏറ്റവും കൂടുതല്‍ .

നിരായുധരായവരെപ്പോലും പൊലീസുകാര്‍ കശാപ്പ് ചെയ്യുകയാണെന്ന് പ്രതിഷേധക്കാര്‍ ആരോപിയ്ക്കുന്നു. ആഫ്രിയ്ക്കന്‍-അമേരിക്കന്‍സാണ് രാജ്യത്ത് പലതരം മനുഷ്യാവകാശ ലംഘനങ്ങള്‍ക്കും ഇരയാകുന്നത് . നിരത്തില്‍ സ്വതന്ത്രമായി നടക്കാനും പൊലീസിന്‍റെ വേട്ടയാടിലില്‍ നിന്ന് രക്ഷപ്പെടാനും വേണ്ടിയാണ് ആയിരക്കണക്കിന് ആളുകള്‍ അമേരിയ്ക്കന്‍ തെരുവുകളില്‍ പ്രതിഷേധിയ്ക്കുന്നത് . സമാധാനപരമായ പ്രതിഷേധങ്ങള്‍ക്ക് നേരെ പോലും പൊലീസ് അതിക്രമങ്ങള്‍ ഉണ്ടാകാറുള്ളതായി റിപ്പോര്‍ട്ടുണ്ട് . വരും ദിവസങ്ങളില്‍ പ്രതിഷേധം കൂടുതല്‍ നഗരങ്ങളിലേയ്ക്ക് വ്യാപിയ്ക്കുമെന്നാണ് അറിയുന്നത്‌.

English summary

Hundreds of demonstrators have taken to the streets of California to continue protests against racial profiling and police killings of unarmed black men in the United States