പെട്രോളിന് സൗദിയേയും റഷ്യയേയും ആശ്രയിക്കുന്നത് കുറയ്ക്കാന്‍ ഇന്ത്യ: ബ്രസീലുമായി ചേർന്ന് പുതിയ നീക്കം

Updated: Saturday, October 14, 2023, 22:05 [IST]

ഡല്‍ഹി: അടുത്ത രണ്ട് ദശാബ്ദങ്ങളില്‍ ലോകത്ത് ഏറ്റവും കൂടുതല്‍ ക്രൂഡ് ഓയില്‍ ആവശ്യമായി വന്നേക്കാവുന്ന രാജ്യം ഇന്ത്യയായിരിക്കുമെന്ന് കഴിഞ്ഞ ദിവസം ഒപെക്ക് തന്നെ അഭിപ്രായപ്പെട്ടത്. ആവശ്യമായതിന്റെ 80 ശതമാനത്തിലേറേ ക്രൂഡ് ഓയില്‍ ഇറക്കുമതി ചെയ്യുന്ന രാജ്യവും ഇന്ത്യ തന്നെ. അതുകൊണ്ട് ആഗോള എണ്ണ വിപണിയിലെ നേരിയ ചലനങ്ങള്‍ പോലും ഇന്ത്യയെ സംബന്ധിച്ച് വലിയ ആശങ്കയാണ് സൃഷ്ടിക്കുന്നത്. സൗദി, റഷ്യ, ഇറാന്‍ തുടങ്ങിയ രാജ്യങ്ങളില്‍ നിന്നാണ് ഇന്ത്യ പ്രധാനമായും എണ്ണ ഇറക്കുമതി ചെയ്യുന്നതും.

ഈ സാഹചര്യത്തില്‍ ഭാവിയില്‍ ക്രൂഡ് ഓയില്‍ ഇറക്കുമതി കുറയ്ക്കാനുള്ള ശ്രമങ്ങള്‍ ഇന്ത്യ വലിയ തോതില്‍ നടത്തി വരുന്നുണ്ട്. ക്രൂഡ് ഓയില്‍ ഇറക്കുമതി കുറയ്ക്കുക എന്ന് പറയുമ്പോള്‍ സ്വാഭാവികമായും അതിന് പകരം വെക്കാവുന്ന ഇന്ധനമോ സങ്കേതിക വിദ്യയോ കണ്ടുപിടിക്കേണ്ടതും അത്യാവശ്യമാണ്. അത്തരത്തില്‍ ഇന്ത്യ ലക്ഷ്യം വെക്കുന്ന ഒരു സാങ്കേതിക വിദ്യയാണ് ബ്രസീലിന്റെ എഥനോള്‍ മിശ്രിത സാങ്കേതിക വിദ്യ.

എഥനോൾ മിശ്രിതത്തിനായി ബ്രസീൽ വിന്യസിച്ച നൂതന സാങ്കേതിക വിദ്യകൾ പഠിച്ച് അവലംബിച്ച് ക്രൂഡ് ഓയിൽ ഇറക്കുമതിയെ ആശ്രയിക്കുന്നത് കുറയ്ക്കാനാണ് ഇന്ത്യ ലക്ഷ്യമിടുന്നത്. ഈ സാഹചര്യത്തില്‍ ബ്രസീലുമായി നിലവിലെ 15.2 ബില്യൺ ഡോളറിൽ നിന്ന് 2030 ഓടെ 50 ബില്യൺ ഡോളറിന്റെ വ്യാപാരം ഇരട്ടിയാക്കാനും ഇരു രാജ്യങ്ങളും തീരുമാനിച്ചിട്ടുണ്ട്.

'ബ്രസീലിനും ഇന്ത്യയ്ക്കും പരസ്പരം പഠിക്കാൻ കഴിയുമെന്ന് തോന്നുന്ന സഹകരണത്തിന്റെ ഒരു പ്രധാന മേഖലയാണ് എഥനോൾ, ജൈവ ഇന്ധന മിശ്രിതം. വാസ്‌തവത്തിൽ, പെട്രോളിലും ഡീസലിലും എഥനോൾ കലർത്തുന്നതിൽ ബ്രസീലിന് വളരെ നൂതനമായ സാങ്കേതികവിദ്യകൾ ലഭ്യമാണ്. ഇത് ക്രൂഡ്, പെട്രോളിയം ഇറക്കുമതിയെ ആശ്രയിക്കുന്നത് കുറയ്ക്കാൻ ഞങ്ങളെ സഹായിക്കും,' വാണിജ്യ സെക്രട്ടറി സുനിൽ ബർത്ത്‌വാൾ കഴിഞ്ഞ ദിവസം വ്യാപാര ഡാറ്റയുടെ പ്രകാശന വേളയിൽ പറഞ്ഞു.

അസംസ്‌കൃത എണ്ണ ഇറക്കുമതിയെ ആശ്രയിക്കുന്നത് കുറയ്ക്കുന്നതിനായി 2025 ഓടെ പെട്രോളുമായി 20 ശതമാനം എഥനോൾ കലർത്താനുള്ള ശ്രമങ്ങൾ ഇന്ത്യ ത്വരിതപ്പെടുത്തുകയാണ്. നിലവില്‍ പെട്രോളിൽ 10 ശതമാനം എഥനോൾ എന്ന നിരക്കിലാണ് ചേർക്കുന്നത്. കരിമ്പിന്റെയും എഥനോളിന്റെയും മുൻനിര നിർമ്മാതാക്കളായ ബ്രസീൽ, ജൈവ ഇന്ധനങ്ങളെ അതിന്റെ ഇന്ധന സമ്പദ്‌വ്യവസ്ഥയിലേക്ക് സംയോജിപ്പിക്കുന്നതിൽ പ്രധാനിയാണ്. ലാറ്റിനമേരിക്കൻ രാഷ്ട്രം എഥനോൾ മിശ്രിതത്തിനായി ഉപയോഗിക്കുന്ന സാങ്കേതിക വിദ്യ കൂടുതലായി ഉപയോഗപ്പെടുത്താനാണ് ഇന്ത്യയുടേയും ശ്രമം.

ജൈവ ഇന്ധനം, പുനരുപയോഗം എന്നിവയിൽ സഹകരിക്കാനും ഇരു രാജ്യങ്ങളും ശ്രമിക്കുന്നു. "ഇരു രാജ്യങ്ങളിലെയും എംഎസ്എംഇകളെ എങ്ങനെ ശക്തിപ്പെടുത്താം എന്നതിനെക്കുറിച്ചും ഞങ്ങൾ സംസാരിക്കുന്നു. വിനോദസഞ്ചാരത്തിൽ മേഖലാ സഹകരണത്തിനും വലിയ സാധ്യതയുണ്ട്, "സെക്രട്ടറി കൂട്ടിച്ചേർത്തു.

ജൈവ ഇന്ധനങ്ങളുടെ സ്വീകാര്യത സുഗമമാക്കുന്നതിന് ഗവൺമെന്റുകളുടെയും അന്താരാഷ്ട്ര സംഘടനകളുടെയും വ്യവസായത്തിന്റെയും ഒരു സഖ്യം വികസിപ്പിക്കുക എന്ന ലക്ഷ്യത്തോടെ ഇന്ത്യ നിർദ്ദേശിച്ച ആഗോള ജൈവ ഇന്ധന സഖ്യത്തിൽ ബ്രസീലും അടുത്തിടെ ചേർന്നിരുന്നു.

പെട്രോളിയം ഉപഭോഗത്തിന്റെ 70 ശതമാനവും ഇറക്കുമതി ചെയ്യുന്ന രാജ്യമാണ് ബ്രസീല്‍. ഈ സാഹചര്യത്തിലാണ് ഫോസിൽ ഇന്ധനങ്ങളിലുള്ള രാജ്യത്തിന്റെ ആശ്രിതത്വം ലഘൂകരിക്കുകയും തൊഴിലവസരങ്ങൾ സൃഷ്ടിക്കുകയും സാങ്കേതികവിദ്യയുടെ വികസനം പ്രോത്സാഹിപ്പിക്കുകയും ചെയ്യുന്നത്. അതേസമയം രാജ്യത്തിന്റെ മൊത്തത്തിലുള്ള ക്രൂഡ് ഓയിൽ ഇറക്കുമതി ഈ സാമ്പത്തിക വർഷത്തിൽ 162.2 ബില്യൺ ഡോളറായി ഉയർന്നിട്ടുണ്ട്. വാണിജ്യ വകുപ്പിന്റെ കണക്കുകൾ അനുസരിച്ച് മുൻ വർഷം ഇത് 107.5 ബില്യൺ ഡോളറായിരുന്നു.