'മൂത്ത മകനെ ജീവനോടെ കെട്ടിത്തൂക്കി, രണ്ട് മക്കളെ കൊന്നശേഷവും'; പോസ്റ്റ്‌മോർട്ടം റിപ്പോർട്ട് പുറത്ത്

Updated: Thursday, May 25, 2023, 12:44 [IST]

ചെറുപുഴ: ചെറുപുഴ പാടിയോട്ടും ചാലില്‍ ഒരു വീട്ടിലെ അഞ്ച് പേരെ മരിച്ചനിലയില്‍ കണ്ടെത്തിയ സംഭവത്തിലെ പോസ്റ്റ് മോര്‍ട്ടം റിപ്പോര്‍ട്ട് പുറത്ത്. മൂന്ന് മക്കളെയയും കൊലപ്പെടുത്തി അമ്മയും രണ്ടാം ഭര്‍ത്താവും ആത്മഹത്യ ചെയ്യുകയായിരുന്നു.
കഴിഞ്ഞ ദിവസം കേരളത്തെ ഞെട്ടിച്ച സംഭവങ്ങളില്‍ ഒന്നായിരുന്നു ഇത്.

മൂത്ത മകനെ ജീവനോടെ കെട്ടിത്തൂക്കുകയായിരുന്നെന്നാണ് പോസ്റ്റ് മോർട്ടം റിപ്പോര്‍ട്ടില്‍ പറയുന്നത്. മറ്റ് രണ്ട് പേരെ കൊലപ്പെടുത്തിയ ശേഷമാണ് കെട്ടിത്തൂക്കിയത്. ഇതിന് ശേഷമാണ് ശ്രീജയും ഷാജിയും ആത്മഹത്യ ചെയ്തത്. മൂന്ന് കുട്ടികളായ സൂരജ്, സുരഭി, സുജിന്‍ എന്നിവരാണ് മരിച്ചത്. പൊലീസ് സ്റ്റേഷനിലേക്ക് വിളിച്ച് പറഞ്ഞ ശേഷമായിരുന്നു കുടുംബം ജീവനൊടുക്കിയത്.

ശ്രീജയുടെ ആദ്യ ഭര്‍ത്താവ് സുനില്‍ നല്‍കിയ പരാതിയെ കുറിച്ച് സംസാരിക്കാൻ പൊലീസ് ഇവരെ സ്റ്റേഷനിലേക്ക് വിളിപ്പിച്ചിരുന്നു. രണ്ടാഴ്ച മുമ്പാണ് ശ്രീജ ആദ്യ ഭര്‍ത്താവ് സുനിലിനെ ഉപേക്ഷിച്ച് ഷാജിക്കൊപ്പം താമസം ആരംഭിച്ചത്. ശ്രീജയുടെ ആദ്യ ഭര്‍ത്താവിന്റെ പേരിലുള്ള വീട്ടിലായിരുന്നു താമസം. ഈ വീട്ടില്‍ നിന്നും ഇറങ്ങാന്‍ സുനില്‍ ആവശ്യപ്പെട്ടതോടെയാണ് തര്‍ക്കങ്ങള്‍ ആരംഭിച്ചത്.

ഷാജിയുടെ വീട് നിര്‍മ്മാണവുമായി ബന്ധപ്പെട്ട് സഹായത്തിന് എത്തിയതോടെയാണ് ശ്രീജയും ഷാജിയും അടുപ്പത്തിലാകുന്നത്. ഈ ബന്ധം പിന്നീട് വിവാഹത്തിലേക്ക് എത്തുകയായിരുന്നു. കഴിഞ്ഞ 16ന് ക്ഷേത്രത്തില്‍ വച്ചായിരുന്നു ഇവര്‍ വിവാഹിതരായത്. തുടര്‍ന്ന് ഒരുമിച്ച് താമസിച്ചുവരികയായിരുന്നു.

മരിച്ച അഞ്ച് പേരുടെയും പോസ്റ്റ് മോര്‍ട്ടം റിപ്പോര്‍ട്ടാണ് ഇപ്പോള്‍ പുറത്തുവന്നത്. മൂന്ന് മക്കളെയും കെട്ടിത്തൂക്കി മരണം ഉറുപ്പുവരുത്തിയ ശേഷമാണ് ശ്രീജയും ഷാജിയും തൂങ്ങിമരിച്ചതെന്നാണ് പോസ്റ്റ് മോര്‍ട്ടം റിപ്പോര്‍ട്ടില്‍ വ്യക്തമാക്കുന്നു. ഷാജിക്ക് ഭാര്യയും രണ്ട് മക്കളുമുണ്ട്. എന്നാല്‍ കഴിഞ്ഞ കുറച്ച് കാലങ്ങളായി ഇവരുമായി അകന്നു കഴിയുകയായിരുന്നു.

കഴിഞ്ഞ ദിവസം പുലര്‍ച്ചെയാണ് ശ്രീജ ചെറുപുഴ പൊലീസ് സ്റ്റേഷനിലേക്ക് വിളിച്ച് കൂട്ടത്തോടെ ആത്മഹത്യ ചെയ്യുകയാണെന്ന് അറിയിച്ചത്. സംഭവം അറിഞ്ഞയുടന്‍ പാടിയോട്ടുചാലിനടുത്ത വാച്ചാലിലേക്ക് പൊലീസ് എത്തിയിരുന്നു. എന്നാല്‍ വാതില്‍ തകര്‍ത്ത് അകത്ത് കയറിയപ്പോഴാണ് മൃതദേഹങ്ങൾ കണ്ടത്.

മൂന്ന് കുട്ടികളെ സ്റ്റെയര്‍ കേസിന്റെ കമ്പിയിലും ശ്രീജയെയും ഷാജിയെയും കിടപ്പുമുറിയിലുമാണ് കണ്ടെത്തിയത്. ആ സമയത്താണ് അയല്‍വാസികള്‍ വിവരം അറിയുന്നത്. മൃതദേഹങ്ങള്‍ പോസ്റ്റ് മോര്‍ട്ടത്തിന് ശേഷം ബുധനാഴ്ച വൈകിട്ടോടെ സംസ്‌കരിച്ചു.