'നിങ്ങള് സൂപ്പര് മുഖ്യമന്ത്രിചമയുന്നോ?' മുഖ്യമന്ത്രിയുടെ ചോദ്യത്തില് പതറി ചീഫ് സെക്രട്ടറി
വിശ്വാസമില്ലെങ്കില് സ്ഥാനമൊഴിയാമെന്ന് യോഗശേഷം ചീഫ് സെക്രട്ടറി മുഖ്യമന്ത്രിയെ അറിയിച്ചു.
തിരുവനന്തപുരം: മുഖ്യമന്ത്രി പിണറായി വിജയന് കീഴ് ഉദ്യോഗസ്ഥരുടെ സാന്നിദ്ധ്യത്തില് ചീഫ് സെക്രട്ടറിയോട് ക്ഷുഭിതനായെന്ന് റിപ്പോര്ട്ട്. വിജിലന്സ് ഡയറക്ടര് ജേക്കബ് തോമസ് വേട്ടയാടുന്നുവെന്ന് ആരോപിച്ച് ഐഎഎസ് ഉദ്യോഗസ്ഥര് പ്രഖ്യാപിച്ച കൂട്ട അവധിയെടുക്കല് സമരത്തിന് മുന്നോടിയായി നടന്ന ചര്ച്ചയിലാണ് ചീഫ് സെക്രട്ടറി എസ്എം വിജയാനന്ദിനോട് മുഖ്യമന്ത്രി രോക്ഷാകുലനായത്.
'നിങ്ങള് സൂപ്പര് മുഖ്യമന്ത്രി ചമയുകയാണോ?' എന്ന് ക്ഷുഭിതനായ മുഖ്യമന്ത്രി ചീഫ് സെക്രട്ടറിയോട് ചോദിച്ചു. മാതൃഭൂമിയാണ് ഇക്കാര്യം റിപ്പോര്ട്ട് ചെയ്തിരിക്കുന്നത്. എന്നാല് വിശ്വാസമില്ലെങ്കില് സ്ഥാനമൊഴിയാമെന്ന് യോഗശേഷം ചീഫ് സെക്രട്ടറി മുഖ്യമന്ത്രിയെ അറിയിച്ചു.താന് അങ്ങനെയൊന്നും ഉദ്ദേശിച്ചില്ല പറഞ്ഞതെന്നായിരുന്നു മുഖ്യമന്ത്രിയുടെ മറുപടി.
അംഗീകരിക്കാന് കഴിയില്ല
സര്ക്കാര് നല്ലനിലയില് മുന്നോട്ട് പോകുമ്പോള് സമരം സര്ക്കാരിനെതിരെയുള്ള ആയുധമായെന്നും ഈ രീതി അംഗീകരിക്കാന് കഴിയില്ലെന്നുമായിരുന്നു മുഖ്യമന്ത്രിയുടെ നിലപാട്.
രോഷാകുലനായി
വിജിലന്സ് ഡയറക്ടര്ക്കെതിരായ പരാതിയില് ചീഫ് സെക്രട്ടറി കൊല്ലം ടികെഎം മാനേജ്മെന്റില് അന്വേഷണം നടത്തിയതാണ് മുഖ്യമന്ത്രിയെ രോഷാകുലനാക്കിയത്.
അതൃപ്തി
ചിലകാര്യങ്ങളില് നടപടി സ്വീകരിച്ചശേഷം മാത്രം ജേക്കബ് തോമസ് സര്ക്കാരിന്റെ ശ്രദ്ധയില്പ്പെടുത്തിയതിലുള്ള അതൃപ്തിയും മുഖ്യമന്ത്രി യോഗത്തില് വ്യക്തമാക്കിയെന്നും മാതൃഭൂമി റിപ്പോര്ട്ട് ചെയ്യുന്നു.
ചീഫ് സെക്രട്ടറി
മുന്മന്ത്രി ജയരാജന് ഉള്പ്പെട്ട ബന്ധുനിയമന കേസില് അഡീഷണല് ചീഫ് സെക്രട്ടറി പോള് ആന്റണിയെ പ്രതിയാക്കിയ ശേഷമാണ് വിവരമറിഞ്ഞതെന്ന് ചൂണ്ടിക്കാട്ടിയാണ് മുഖ്യമന്ത്രി ഇക്കാര്യം പറഞ്ഞത്.
സര്ക്കാര് നിലപാട്
സര്വീസിലിരിക്കെ ജേക്കബ് തോമസ് ടികെഎം കോളേജില് അധ്യാപകനായി വേതനം കൈപറ്റിയെന്നായിരുന്നു കേസ്. എന്നാല് ശമ്പളം തിരിച്ചടച്ചതിനാല് കേസുമായി മുന്നോട്ടു പോകേണ്ടതില്ലെന്നായിരുന്നു സര്ക്കാര് നിലപാട്.
സത്യവാങ്മൂലം
എന്നാല് മാനേജ്മെന്റില് നിന്നും കടമില്ലെന്ന സര്ട്ടിഫിക്കറ്റാണ് ജേക്കബ് തോമസ് ഹാജരാക്കിയതെന്ന പരാതിയില് നല്കേണ്ട സത്യവാങ്മൂലത്തിന്റ കൃത്യതയ്ക്കാണ് കേസ് നേരിട്ട് അന്വേഷിച്ചതെന്ന് ചീഫ് സെക്രട്ടറി മറുപടി നല്കിയിരുന്നു.
Click it and Unblock the Notifications
Sign in with Google