കോണ്ഗ്രസും ലീഗും മാത്രമുള്ള സംവിധാനമായി യുഡിഎഫ് മാറി, ജോസിന്റെ വരവിന് പിറകെ സിപിഎം
തിരുവനന്തപുരം: കേരള കോൺഗ്രസ് ജോസ് കെ മാണി വിഭാഗത്തിന്റെ എൽഡിഎഫിലേക്കുളള വരവിനെ സ്വാഗതം ചെയ്ത് സിപിഎം. 38 വർഷം നീണ്ട് നിന്ന യുഡിഎഫ് ബന്ധം അവസാനിപ്പിച്ചാണ് തദ്ദേശ തിരഞ്ഞെടുപ്പിന് മുന്നോടിയായി ജോസ് പക്ഷം ഇടത് മുന്നണിയിലേക്ക് എത്തിയിരിക്കുന്നത്. കോട്ടയത്ത് 5 സീറ്റടക്കം 12 സീറ്റുകളിൽ ഇരുപക്ഷവും ധാരണയിൽ ആയിട്ടുണ്ട് എന്നാണ് റിപ്പോർട്ടുകൾ. പാലായും കാഞ്ഞിരപ്പളളിയും അടക്കം ഇക്കൂട്ടത്തിലുണ്ടെന്നാണ് വിവരം. എന്നാൽ ഉപാധികൾ ഇല്ലാതെയാണ് ഇടത് മുന്നണി പ്രവേശം എന്നാണ് ജോസ് കെ മാണിയുടെ പ്രതികരണം.
ജോസ് വിഭാഗം എൽഡിഎഫിന്റെ ഭാഗമായതോടെ കോണ്ഗ്രസും ലീഗും മാത്രമുള്ള സംവിധാനമായി ഫലത്തില് ആ മുന്നണി മാറിയെന്ന് സിപിഎം പ്രതികരിച്ചു. സിപിഎം പ്രസ്താവന: 'എല്ഡിഎഫുമായി ചേര്ന്ന് പ്രവര്ത്തിക്കുമെന്ന കേരള കോണ്ഗ്രസ്സ്-എം ൻ്റെ തീരുമാനം സ്വാഗതം ചെയ്യുന്നു. യുഡിഎഫിന്റെ തകര്ച്ചക്ക് ആക്കം കൂട്ടുന്ന ഈ തീരുമാനം കേരള രാഷ്ട്രീയത്തില് ഗുണപരമായ ധ്രുവീകരണത്തെ ശക്തിപ്പെടുത്തുന്നതിനു സഹായകരമായിരിക്കും. യുഡിഎഫ് രൂപികരണത്തിന് നേതൃത്വം നല്കിയ പാര്ടിയാണ് 38 വര്ഷത്തിനു ശേഷം ആ മുന്നണിയില് നിന്നും പുറത്തു വന്നിട്ടുള്ളത്.
കഴിഞ്ഞ നിയമസഭ തെരഞ്ഞെടുപ്പിനു ശേഷം യുഡിഎഫില് നിന്നും പുറത്തു വന്ന എല്ജെഡി, എല്ഡിഎഫിന്റെ ഭാഗമായി. കോണ്ഗ്രസും ലീഗും മാത്രമുള്ള സംവിധാനമായി ഫലത്തില് ആ മുന്നണി മാറി. ഉപാധികളൊന്നുമില്ലാതെ രാഷ്ട്രീയ നിലപാടിന്റെ ഭാഗമായാണ് ഇടതു മുന്നണിയുമായി സഹകരിക്കുകയെന്ന ജോസ് കെ മാണിയുടെ പ്രഖ്യാപനം അഭിനന്ദനാര്ഹമാണ്.
മതനിരപേക്ഷത, കര്ഷക പ്രശനങ്ങള്, വികസനം എന്നീ കാര്യങ്ങളില് എല്ഡിഎഫിന്റേയും സര്ക്കാരിന്റേയും നയങ്ങളെ പിന്തുണച്ചുവെന്നതും ശ്രദ്ധേയം. നാടിന്റെ പൊതുവികാരം തന്നെയാണ് അതില് പ്രതിഫലിക്കുന്നത്. ഇത് എല്ഡിഎഫ് സ്വീകരിക്കുന്ന ശരിയായ സമീപനത്തിനുള്ള അംഗീകാരം കൂടിയാണ്. രാഷ്ട്രീയ നിലപാട് ജോസ് കെ മാണി പ്രഖ്യാപിച്ച സാഹചര്യത്തില് എല്ഡിഎഫ് ചര്ച്ച ചെയ്ത് ഇക്കാര്യത്തില് ക്രിയാത്മക നിലപാട് സ്വീകരിക്കും'.
Click it and Unblock the Notifications
Sign in with Google