ചെലവ് വഹിക്കുന്നത് പ്രവാസി മലയാളികള്‍; വിവാദങ്ങള്‍ക്ക് മറുപടിയുമായി മുഖ്യമന്ത്രി

ലണ്ടന്‍: ലോക കേരളസഭ മേഖലാ സമ്മേളനങ്ങളില്‍ മുഖ്യമന്ത്രി പിണറായി വിജയനും മന്ത്രിമാരും കുടുംബവും പങ്കെടുക്കുന്നതിലെ ചെലവിനെ ചൊല്ലിയുടെ ആരോപണങ്ങള്‍ക്ക് പിന്നാലെ വിശദീകരണവുമായി മുഖ്യമന്ത്രി. ലോക കേരളസഭ മേഖലാ സമ്മേളനങ്ങള്‍ സര്‍ക്കാര്‍ ചെലവില്‍ അല്ല നടക്കുന്നത് എന്ന് മുഖ്യമന്ത്രി പിണറായി വിജയന്‍ വ്യക്തമാക്കി.

ഓരോ രാജ്യങ്ങളിലെയും പ്രവാസി മലയാളികളാണ് ചെലവ് വഹിക്കുന്നത് എന്നും അദ്ദേഹം കൂട്ടിച്ചേര്‍ത്തു. ലോക കേരള സഭാ മേഖലാ സമ്മേളനം ലണ്ടനില്‍ ഉദ്ഘാടനം ചെയ്ത് സംസാരിക്കവെ ആയിരുന്നു മുഖ്യമന്ത്രി പിണറായി വിജയന്റെ മറുപടി.

അതേസമയം പ്രവാസികളുടെ എണ്ണം തിട്ടപ്പെടുത്തുന്നതിനും മെച്ചപ്പെട്ട സേവന വേതനം ഉറപ്പാക്കുന്നതിനും ഫലപ്രദമായ കുടിയേറ്റ നിയമം അനിവാര്യമാണ് എന്ന് ഉദ്ഘാടന സമ്മേളനത്തില്‍ സംസാരിച്ച മുഖ്യമന്ത്രി പിണറായി വിജയന്‍ പറഞ്ഞു. മന്ത്രി പി രാജീവും ചീഫ് സെക്രട്ടറി വി പി ജോയി ഉള്‍പ്പെടെയുള്ള ഉദ്യോഗസ്ഥരും ലോക കേരള സഭാ മേഖല യോഗത്തില്‍ പങ്കെടുക്കുന്നുണ്ട്.

ലോക കേരളസഭയുടെ യൂറോപ്പ് - യു കെ മേഖലാ സമ്മേളനമാണ് ലണ്ടനില്‍ നടക്കുന്നത്. കഴിഞ്ഞ ദിവസം ലണ്ടനിലെ കാള്‍ മാര്‍ക്‌സ് സ്മാരകവും മ്യൂസിയവും മുഖ്യമന്ത്രിയും സംഘവും സന്ദര്‍ശിച്ചിരുന്നു. അതേസമയം മുഖ്യമന്ത്രി പിണറായി വിജയനും കുടുംബവും വിദേശത്ത് പോകുന്നതിന്റെ മറവില്‍ സര്‍ക്കാര്‍ ഖജനാവ് ധൂര്‍ത്തടിക്കുകയാണ് എന്ന് കെ പി സി സി അധ്യക്ഷന്‍ കെ സുധാകരന്‍ വിമര്‍ശിച്ചിരുന്നു.

എല്ലാ യാത്രയിലും മുഖ്യമന്ത്രി ഭാര്യയെയും മക്കളെയും കൂട്ടി കൊണ്ടുപോകുന്നത് എന്തിനാണെന്നും അദ്ദേഹം ചോദിച്ചു. അവരുടെ ചെലവ് സ്വന്തമായി എടുക്കുമെന്നാണ് മുഖ്യമന്ത്രി ഓഫീസില്‍ നിന്നും നല്‍കുന്ന വിശദീകരണം എന്നും അതൊക്കെ അങ്ങ് പള്ളിയില്‍ പോയി പറഞ്ഞാല്‍ മതി എന്നും അദ്ദേഹം കൂട്ടിച്ചേര്‍ത്തു.

വിദേശത്ത് പോയാല്‍ എത്ര ചെലവാണെന്ന് എല്ലാവര്‍ക്കുമറിയാമെന്നും സുധാകരന്‍ പരിഹസിച്ചു. മുഖ്യമന്ത്രിയുടെ വിദേശയാത്രയ്ക്ക് ചെലവഴിക്കുന്ന തുക എത്രയാണെന്ന് ജനങ്ങളോട് തുറന്നുപറയാന്‍ സി പി ഐ എം തയ്യാറാകണം എന്നും അദ്ദേഹം വെല്ലുവിളിച്ചിരുന്നു.

English summary

expenditure is borne by non-resident Malayalis; Pinarayi Vijayan on controversies of loka keralasabha