ആശുപത്രികളില് സിസിടിവി, സുരക്ഷയ്ക്കായി വിമുക്ത ഭടന്മാര്; പുതിയ ഉത്തരവ് പുറപ്പെടുവിച്ച് ആരോഗ്യവകുപ്പ്
തിരുവനന്തപുരം: ഡോക്ടര്മാര്ക്കും മറ്റ് ആരോഗ്യ പ്രവര്ത്തകര്ക്കുമെതിരെയുള്ള അക്രമങ്ങളില് നടപടികള് ശക്തമാക്കുന്നതിന്റെ ഭാഗമായി ആരോഗ്യ വകുപ്പ് ഡയറക്ടര്ക്കും ആരോഗ്യ വിദ്യാഭ്യാസ വകുപ്പ് ഡയറക്ടര്ക്കും പൊതു നിര്ദേശങ്ങള് നല്കി ഉത്തരവ് പുറപ്പെടുവിച്ചതായി ആരോഗ്യ വകുപ്പ് മന്ത്രി വീണാ ജോര്ജ് അറിയിച്ചു.
ഡോക്ടര്മാര്ക്കെതിരെ നടന്ന അക്രമങ്ങളെക്കുറിച്ച് ചര്ച്ച ചെയ്യാന് ആഗസ്റ്റ് 9ന് മുഖ്യമന്ത്രിയുടെ നേതൃത്വത്തില് കൂടിയ ഉന്നതതല യോഗത്തിന്റെ അടിസ്ഥാനത്തിലാണ് ഉത്തരവ് പുറപ്പെടുവിച്ചത്. അടുത്തിടെ ഡോക്ടര്മാര്ക്കും മറ്റ് ആരോഗ്യ പ്രവര്ത്തകര്ക്കുമെതിരെയുള്ള അക്രമങ്ങള് കൂടുതലായി റിപ്പോര്ട്ട് ചെയ്തിരുന്നു. ഡോക്ടര്മാര്ക്ക് ജോലി നിര്വഹിക്കാന് എല്ലാ സൗകര്യവും സര്ക്കാര് ഒരുക്കുമെന്നും മന്ത്രി വ്യക്തമാക്കി.
ആശുപത്രികളിലെ കാഷ്വാലിറ്റി, ഒ.പി. പരിസരങ്ങളില് സിസിടിവി സ്ഥാപിക്കുന്നതാണ്. പോലീസ് എയ്ഡ് പോസ്റ്റ് ഉള്ള ആശുപത്രികളിലെ സിസിടിവി സംവിധാനം എയിഡ് പോസ്റ്റുമായി ബന്ധപ്പെടുത്തും. സി.സി.ടി.വി. കാര്യക്ഷമായി പ്രവര്ത്തിക്കുന്നുണ്ടോയെന്ന് ഉറപ്പ് വരുത്തും. സെക്യൂരിറ്റി ജീവനക്കാരുടെ പ്രവര്ത്തനങ്ങള് നിരീക്ഷിക്കുന്നതിന് ഒരു ഓഫീസര്ക്ക് സൂപ്രണ്ട് പ്രത്യേക ചുമതല നല്കും. പാരാമെഡിക്കല് ജീവനക്കാര്ക്കും മറ്റുള്ളവര്ക്കും സെക്യൂരിറ്റി സംബന്ധമായ പരിശീലനം ആശുപത്രി സൂപ്രണ്ട് ഉറപ്പ് വരുത്തുന്നതാണ്.
ഒ.പി., കാഷ്വാലിറ്റി പരിസരത്ത് സെക്യൂരിറ്റി ഉദ്യോഗസ്ഥരെ ഇനി മുതല് വിമുക്തഭടന്മാരുടെ സൊസൈറ്റി/സംഘടന എന്നിവയില് നിന്നും മാത്രം നിയമിക്കുന്നതാണ്. ആശുപത്രി വികസന സമിതികള് അല്ലെങ്കില് മാനേജ്മെന്റ് കമ്മിറ്റികള് ഇനിമുതല് വിമുക്തഭടന്മാരെ മാത്രമേ നിയമിക്കാവൂ.
അതേസമയം, ആശുപത്രി ജീവനക്കാരുടെയും രോഗികളുടെയും സാന്നിധ്യത്തില് രോഗിയുടെ ഭര്ത്താവ് ഡോക്ടറെ കൈയേറ്റം ചെയ്തിട്ടും പ്രതിയെ അറസ്റ്റ് ചെയ്യാത്തത് സംബന്ധിച്ച് അടിയന്തിരമായി അന്വേഷണം നടത്തി റിപ്പോര്ട്ട് സമര്പ്പിക്കണമെന്ന് സംസ്ഥാന മനുഷ്യാവകാശ കമ്മീഷന് അറിയിച്ചു.
അധ്യക്ഷന് ജസ്റ്റിസ് ആന്റണി ഡൊമിനിക് എറണാകുളം റൂറല് ജില്ലാ പോലീസ് മേധാവിക്കാണ് ഉത്തരവ് നല്കിയത്. രണ്ടാഴ്ചക്കകം അന്വേഷണ റിപ്പോര്ട്ട് സമര്പ്പിക്കണം. ഐ എം എ കൊച്ചി ബ്രാഞ്ച് സമര്പ്പിച്ച പരാതിയിലാണ് ഉത്തരവ്. എടത്തലയിലെ സ്വകാര്യ ആശുപത്രിയിലെ ഡോക്ടറെയാണ് മര്ദ്ദിച്ചത്. ഓഗസ്റ്റ് 3 ന് ഉച്ചയ്ക്കായിരുന്നു സംഭവം.
കോവിഡ് രോഗലക്ഷണങ്ങളുമായി എത്തിയ സ്ത്രീയെ കോവിഡ് പരിശോധനക്ക് നിര്ദ്ദേശിച്ച ശേഷം വനിതാ ജീവനക്കാരുടെ സാന്നിധ്യത്തില് പരിശോധിക്കുമ്പോഴാണ് രോഗിയുടെ ഭര്ത്താവ് ഡോക്ടറെ കൈയേറ്റം ചെയ്യുകയും അസഭ്യം വിളിക്കുകയും ചെയ്തതെന്ന് പരാതിയില് പറയുന്നു. ആശുപത്രി അധികൃതരും ഡോക്ടറും എടത്തല പോലീസ് സ്റ്റേഷനില് അപ്പോള് തന്നെ പരാതി നല്കിയെങ്കിലും ഫലപ്രദമായ ഒരു നടപടിയും ഉണ്ടായില്ലെന്ന് പരാതിയില് പറയുന്നു. എഫ്. ഐ. ആര്. ഇട്ടത് പിറ്റേന്നാണ്. കൈയേറ്റം ചെയ്തയാളെ ഉടന് പിടികൂടണമെന്നാണ് ആശുപത്രി സംരക്ഷണ നിയമത്തില് പറയുന്നത്.
തുടര്ന്ന് കൈയേറ്റം ചെയ്തയാള് ഡോക്ടര്ക്കെതിരെ പോലീസില് വ്യാജ പരാതി നല്കിയതായി ഐ എം എ അറിയിച്ചു. കൈയേറ്റം ചെയ്തയാള് ആശുപത്രി ഉടമയുടെ ബന്ധുവാണെന്ന് മനസിലാക്കിയപ്പോള് പരാതിയില് നിന്നും ആശുപത്രി പിന്നാക്കം പോയതായി പരാതിയില് പറയുന്നു.
ഡോക്ടര്ക്കെതിരെ രജിസ്റ്റര് ചെയ്ത കള്ള കേസ് റദ്ദാക്കണമെന്ന് പരാതിക്കാര് ആവശ്യപ്പെട്ടു. കള്ളക്കേസ് നല്കിയവര്ക്കെതിരെ നിയമപരമായ നടപടി സ്വീകരിക്കണം. പ്രതിക്ക് ആശുപത്രി സംക്ഷണ നിയമപ്രകാരം കടുത്ത ശിക്ഷ നല്കണം. സംഭവ സമയത്തെ സി സി റ്റി വി ദൃശ്യങ്ങള് പരിശോധിക്കണം. സ്വന്തം ഡോക്ടറെ സംരക്ഷിക്കാത്ത ആശുപത്രി മാനേജ്മെന്റിനെതിരെ നടപടി വേണമെന്നും പരാതിക്കാരായ ഐ എം എ കൊച്ചി സെക്രട്ടറി ഡോ. അതുല് ജോസഫ് മാനുവലും പ്രസിഡന്റ് ഡോ. റ്റി വി രവിയും ആവശ്യപ്പെട്ടു.
Click it and Unblock the Notifications
Sign in with Google