യൂസഫലിയുടെ അഭിപ്രായത്തിനനുസരിച്ച് കോണ്ഗ്രസ് നിലപാട് മാറ്റില്ല; പ്രതികരിച്ച് കെ മുരളീധരന്
കോഴിക്കോട്: ലോക കേരള സഭയില് പങ്കെടുക്കാത്ത പ്രതിപക്ഷത്തിനെതിരെ വിമര്ശനം ഉന്നയിച്ച വ്യവസായി എം എ യൂസഫലിക്ക് മറുപടിയുമായി കെ മുരളീധരന് എം പി. ലോക കേരള സഭയില് എം എ യൂസഫലി പ്രതിപക്ഷത്തിനെതിരെ വിമര്ശനം ഉന്നയിച്ചത് കാര്യങ്ങള് മനസിലാക്കാതെയാണെന്ന് കെ മുരളീധരന് പറഞ്ഞു. പ്രവാസികള് ഭക്ഷണം കഴിച്ചതിനെ ആരും ധൂര്ത്താണെന്ന് പറഞ്ഞിട്ടില്ലെന്ന് കെ മുരളീധരന് വാര്ത്താ സമ്മേളനത്തില് പറഞ്ഞു.
കോണ്ഗ്രസിന് പ്രവാസികളോട് സ്നേഹമുണ്ട്. എന്നാല് സര്ക്കാരിന്റെ ലോക കേരള സഭ കൊണ്ട് ഒരു ഉപകാരവും പ്രവാസികള്ക്കില്ലെന്നും കെ.മുരളീധരന് പറഞ്ഞു. യൂസഫലിയുടെ അഭിപ്രായത്തിനനുസരിച്ച് കോണ്ഗ്രസ് നിലപാട് മാറ്റില്ലെന്ന് കെ മുരളീധരന് വ്യക്തമാക്കി. കഴിഞ്ഞ ദിവസം പ്രതിപക്ഷ നേതാവ് വി ഡി സതീശനും എം എ യൂസഫലിയുടെ പരാമര്ശത്തിന്റെ പശ്ചാത്തലത്തില് പ്രതികരിച്ചിരുന്നു.
വ്യവസായ പ്രമുഖനായ യൂസഫലി ലോക കേരള സഭയില് നടത്തിയ പരാമര്ശം അങ്ങേയറ്റം ദൗര്ഭാഗ്യകരമാണെന്നാണ് വി ഡി സതീശന് പറഞ്ഞത്. രാഷ്ട്രീയ കാരണങ്ങളാലാണ് പങ്കെടുക്കേണ്ടെന്ന് യു ഡി എഫ് തീരുമാനിച്ചത്. ഇക്കാര്യം പ്രതിപക്ഷ നേതാവെന്ന നിലയില് യൂസഫലിയെ അറിയിച്ചതുമാണ്. കെ പി സി സി ഓഫീസുകളും കോണ്ഗ്രസ് ഓഫീസുകളും തകര്ക്കുകയും കന്റോണ്മെന്റ് ഹൗസില് അക്രമികളെ വിടുകയും പ്രവര്ത്തകരെ ക്രൂരമായി ആക്രമിക്കുകയും ചെയ്ത പശ്ചാത്തലത്തില് മുഖ്യമന്ത്രിയുമായി വേദി പങ്കിടുന്നതിലുള്ള പ്രയാസം യൂസഫലിയോട് പ്രകടിപ്പിച്ചിരുന്നു.
ഇതെല്ലാം അറിഞ്ഞിട്ടും പ്രവാസികള്ക്ക് ഭക്ഷണം നല്കുന്നതും താമസം ഒരുക്കുന്നതുമാണ് യു ഡി എഫ് എതിര്ക്കുന്നതെന്ന രീതിയില് യൂസഫലി നടത്തിയ പരാമര്ശം നിര്ഭാഗ്യകരമാണ്. നിയമസഭയിലെ ശങ്കരനാരായണന് തമ്പി ഹാളിന്റെ ഇന്റീരിയര് നവീകരണം 16 കോടി രൂപയ്ക്ക് ഊരാളുങ്കലിനെ ഏല്പ്പിച്ചതിന് പിന്നില് അഴിമതിയും ധൂര്ത്തുമുണ്ട്. അല്ലാതെ പ്രവാസികള്ക്ക് ഭക്ഷണം കൊടുക്കുന്നതോ താമസം നല്കുന്നതോ ധൂര്ത്തായി ഒരു പ്രതിപക്ഷ നേതാവും പറഞ്ഞിട്ടില്ല.
ഹോളിവുഡ് താരങ്ങള് തോറ്റുപോകും; ഗ്ലാമറസ് ആന്ഡ് ഹോട്ട്, നിങ്ങള് പൊളിയാണ് മാളവിക
ഇതിനെ ആ രീതിയിലേക്ക് വളച്ചൊടിക്കാന് സി പി എം കേന്ദ്രങ്ങള് ശ്രമിക്കുന്നുണ്ട്. യു ഡി എഫ് സംഘടനകളുമായി ബന്ധപ്പെട്ട് നില്ക്കുന്ന പ്രവാസി പ്രതിനിധികള് സമ്മേളനത്തില് പങ്കെടുക്കണമെന്ന നിര്ദ്ദേശം നല്കിയിരുന്നു. രണ്ട് ലോക കേരള സഭകള് നടന്നിട്ടും എന്തൊക്കെ പ്രഖ്യാപനങ്ങള് നടപ്പാക്കിയെന്നത് സംബന്ധിച്ച് പ്രോഗ്രസ് റിപ്പോര്ട്ട് ഇറക്കണമെന്ന് മുഖ്യമന്ത്രിയോട് ആവശ്യപ്പെട്ടിരുന്നു. ഇക്കാര്യത്തിലും സര്ക്കാരിന്റെ ഭാഗത്ത് നിന്നും നടപടിയുണ്ടായില്ലെന്നും പ്രതിപക്ഷ നേതാവ് വ്യക്തമാക്കിയിരുന്നു.
അതേസമയം, ലോക കേരള സഭയില് പുരാവസ്തു തട്ടിപ്പ് കേസില് ആരോപണ വിധേയയായ പ്രവാസി വനിത അനിത പുല്ലയില് എത്തിയതിനെയും കെ മുരളീധരന് വിമര്ശിച്ചു. ഒരു കേസിലെ കുറ്റാരോപിത എത്തിയത് നിയമസഭയുടെ സുരക്ഷയെ തന്നെ ബാധിക്കുന്ന കാര്യമാണെന്ന് അദ്ദേഹം പറഞ്ഞു . സംഭവത്തില് സ്പീക്കര് മറുപടി പറയണമെന്നും കുറ്റാരോപിതരും പൊലീസും തമ്മിലുള്ള ബന്ധങ്ങള് പല വേളകളില് പുറത്ത് വന്നതാണെന്നും അദ്ദേഹം പറഞ്ഞു .
അതേസമയം, അനിത പുല്ലയില് ലോക കേരള സഭയില് എത്തിയതില് അന്വേഷണം നടത്തില്ലെന്ന് നോര്ക്ക വൈസ് ചെയര്മാന് പി ശ്രീരാമകൃഷ്ണന് അറിയിച്ചു. അനിതയ്ക്ക് ക്ഷണമില്ലായിരുന്നെന്നും ഓപ്പണ് ഫോറത്തിലായിരിക്കും അനിത പങ്കെടുത്തതെന്നും അദ്ദേഹം വ്യക്തമാക്കി. നോര്ക്കയുടെ പട്ടികയില് അനിതയുടെ പേരില്ലാത്ത സ്ഥിതിക്കും ലോക കേരള സഭയില് പങ്കെടുക്കാത്ത സ്ഥിതിക്കും അന്വേഷണം ആവശ്യമില്ലെന്ന് ശ്രീരാമകൃഷ്ണന് വ്യക്തമാക്കി .
Click it and Unblock the Notifications
Sign in with Google