തുലാവര്ഷത്തോടൊപ്പം കേരളത്തിലേക്ക് ചുഴലിക്കാറ്റും..! ആഞ്ഞുവീശാന് 'മോന്ത' വരുന്നു
തിരുവനന്തപുരം: സംസ്ഥാനത്ത് തുലാവര്ഷം കലിതുള്ളി പെയ്യുന്നതിനിടെ ചുഴലിക്കാറ്റ് ഭീഷണിയും. ബംഗാള് ഉള്ക്കടലില് രൂപപ്പെടാന് പോകുന്ന മോന്ത ചുഴലിക്കാറ്റാണ് കേരളത്തിന് ഭീഷണിയാകുന്നത്. മോന്തയുടെ സ്വാധീനവും നിലവിലെ അറബിക്കടലിലെ ന്യൂനമര്ദത്തിന്റെയും ബംഗാള് ഉള്ക്കടലിലെ ന്യൂനമര്ദത്തിന്റെയും സ്വാധീനഫലമായി തുലാവര്ഷ മഴ ശക്തി പ്രാപിക്കുകയാണ്.
ഇതിനിടെയാണ് മോന്തയുടെ വരവ്. ഇത് കേരളത്തിലെ മഴ സാഹചര്യത്തെ രൂക്ഷമാക്കും. നാളെയോടെ തീവ്ര ന്യൂനമര്ദമായും ശേഷം ബംഗാള് ഉള്ക്കടലിന്റെ ഭാഗങ്ങളില് ചുഴലിക്കാറ്റായി ശക്തിപ്രാപിക്കാനും സാധ്യതയുണ്ട് എന്നാണ് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. ഇന്നും നാളെയും സംസ്ഥാനത്ത് പൊതുവേ മഴയുടെ ശക്തി കുറയും. തിങ്കളാഴ്ചയോടെ മഴ വീണ്ടും ശക്തിപ്പെടും.
നിലവില് മധ്യ കിഴക്കന് അറബിക്കടലിനു മുകളിലായി തീവ്രന്യൂനമര്ദം സ്ഥിതി ചെയ്യുന്നുണ്ട്. ഇത് അടുത്ത 24 മണിക്കൂറിനുള്ളില് മധ്യ കിഴക്കന് അറബിക്കടലിലൂടെ വടക്കുകിഴക്കന് ദിശയില് നീങ്ങിയേക്കും. മധ്യ കിഴക്കന് അറബിക്കടലിനും അതിനോട് ചേര്ന്ന കര്ണാടക വടക്കന് കേരള തീരപ്രദേശങ്ങള്ക്കും മേല് നിലനിന്നിരുന്ന ചക്രവാതച്ചുഴി അറബിക്കടല് തീവ്ര ന്യൂനമര്ദവുമായി ചേരും.
പിന്നാലെ തെക്കുകിഴക്കന് ബംഗാള് ഉള്ക്കടലിനും അതിനോട് ചേര്ന്ന തെക്കന് ആന്ഡമാന് കടലിനും മുകളിലായി രൂപപ്പെട്ട ചക്രവാതച്ചുഴി തെക്കുകിഴക്കന് ബംഗാള് ഉള്ക്കടലിന്റെയും അതിനോട് ചേര്ന്ന കിഴക്കന് മധ്യ ബംഗാള് ഉള്ക്കടലിന്റെയും മുകളില് ന്യൂനമര്ദമായി ശക്തി പ്രാപിക്കുയും ചെയ്തു. ഇത് ഒക്ടോബര് 27-നു രാവിലെ തെക്കുപടിഞ്ഞാറന് ബംഗാള് ഉള്ക്കടലിന്റെയും അതിനോട് ചേര്ന്ന പടിഞ്ഞാറന് മധ്യ ബംഗാള് ഉള്ക്കടലിന്റെയും ഭാഗങ്ങളില് ചുഴലിക്കാറ്റായി ശക്തിപ്രാപിച്ചേക്കും എന്നാണ് കാലാവസ്ഥാ കേന്ദ്രം അറിയിച്ചിരിക്കുന്നത്.
അതേസമയം ഇന്ന് സംസ്ഥാനത്ത് രണ്ട് ജില്ലകളില് ആണ് യെല്ലോ അലര്ട്ട് ഉള്ളത്. ഇന്ന് കണ്ണൂര്, കാസര്കോട് ജില്ലകളിലും നാളെ കോഴിക്കോട്, വയനാട്, കണ്ണൂര്, കാസര്ഗോഡ് ജില്ലകളില് യെല്ലോ അലര്ട്ടായിരിക്കും. തിങ്കളാഴ്ച ഇടുക്കി, എറണാകുളം, തൃശൂര്, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്, കാസര്കോട് എന്നീ ജില്ലകളിലും 28 ന് തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം എന്നീ ജില്ലകളിലും യെല്ലോ അലര്ട്ടായിരിക്കും.
ഈ ജില്ലകളില് ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. 24 മണിക്കൂറില് 64.5 മില്ലി മീറ്റര് മുതല് 115.5 മില്ലി മീറ്റര് വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് കേന്ദ്ര കാലാവസ്ഥ വകുപ്പ് അര്ത്ഥമാക്കുന്നത്.
Click it and Unblock the Notifications
Sign in with Google