അർബുദരോഗിയോട് പരാക്രമം കാട്ടി അഭിഭാഷകൻ; ഒത്തുകളിച്ച് പൊലീസ്

തിരുവനന്തപുരം: വഞ്ചിയൂരിൽ അഭിഭാഷകൻ്റെ ആക്രമണത്തിൽ പരിക്കേറ്റ അർബുദരോഗി ദയനീയാവസ്ഥയിൽ കഴിയുന്നു. രണ്ടര മാസം മുൻപ് നടന്ന സംഭവത്തിൻ്റെ ദൃശ്യങ്ങൾ സാമൂഹിക മാധ്യമങ്ങളിൽ പ്രചരിച്ചതോടെയാണ് സംഭവം പുറംലോകമറിയുന്നത്. തിരുവനന്തപുരം വിളവൂർക്കൽ കുണ്ടമൺഭാഗം മൂലത്തോപ്പ് സ്വദേശി ഷിബുവിനാണ് അഭിഭാഷകൻ്റെ ആക്രമണത്തിൽ റോഡിൽ തലയടിച്ച് വീണ് പരിക്കേറ്റത്.

ആറ് മാസം മുൻപാണ് കേസിനാസ്പദമായ സംഭവം. 2021 ജനുവരി 12 ന് വഞ്ചിയൂർ മള്ളിയൂർ റോഡിൽ വച്ചാണ് അഭിഭാഷകൻ ഷിബുവിനെ ആക്രമിച്ചത്. വഞ്ചിയൂർ മള്ളിയൂരിൽ എയർ കണ്ടീഷണറുകൾ റിപ്പയറിംഗ് നടത്തുന്ന കടയുടമ കൂടിയായ ഷിബുവിൻ്റെ വാഹനം റോഡരികിൽ പാർക്ക് ചെയയ്തത് ഇതു വഴി വന്ന അഭിഭാഷകൻ ചോദ്യം ചെയ്യുകയായിരുന്നു.

ഇതേ തുടർന്ന്, ഷിബു വാഹനം മാറ്റിക്കൊടുത്തെങ്കിലും അഭിഭാഷകൻ തൻ്റെ കാർ ഷിബുവിൻ്റെ വാഹനത്തിൽ മനപ്പൂർവ്വം കൊണ്ട് ഇടിപ്പിച്ച് വെറുതേ പ്രശ്നങ്ങൾ സൃഷ്ടിക്കുകയായിരുന്നു. പ്രകോപനരമായി, കാറിൻ്റെ വാതിലിൽ വാഹനം കൊണ്ട് വീണ്ടും ഇടിപ്പിക്കുകയും ചെയ്തു. ഇത് ചോദ്യം ചെയ്ത് വാഹനം നിർത്താൻ ഷിബു ആവശ്യപ്പെട്ടെങ്കിലും അഭിഭാഷകൻ്റെ പരാക്രമം തുടരുകയായിരുന്നു.

വാഹനം നിർത്തി പുറത്തേക്കിറങ്ങി വന്ന ഇയാൾ ഷിബുവിനെ പിടിച്ചു തള്ളി.റോഡിൽ തലയടിച്ചു വീണ ഇദ്ദേഹം രക്തം വാർന്ന് കിടന്നപ്പോൾ വീണ്ടും അഭസ്യവർഷവുമായി അഭിഭാഷകൻ ഇയാൾക്കു നേരെ തട്ടിക്കയറി. ആളുകൾ ഓടിക്കൂടിയതോടെ രംഗം വഷളായെന്ന് കണ്ടതോടെ അഭിഭാഷകൻ വാഹനമെടുത്ത് സ്ഥലംവിടുകയായിരുന്നു.

സ്ഥലത്ത് ഓടിക്കൂടിയ നാട്ടുകാരാണ് ഷിബുവിനെ ആശുപത്രിയിൽ പ്രവേശിപ്പിച്ചത്. അർബുദരോഗിയായ ഇദ്ദേഹത്തിൻ്റെ തലയ്ക്ക് രണ്ട് ശസ്ത്രക്രിയകൾ നടത്തി തയ്യലിട്ടിരിക്കുകയായിരുന്നു. വീണ്ടും, പരിക്കേറ്റതോടെ നിലവിലുണ്ടായിരുന്ന തയ്യലുകൾ പൊട്ടി. പിന്നീട്, അതിനു മേൽ വീണ്ടും തയ്യലുകളിടേണ്ടിവന്നു.ഷിബു രണ്ടരമാസത്തോളം ആശുപത്രിയിൽ ചികിത്സയിലായിരുന്നു. പിന്നീടാണ് ആശുപത്രി വിട്ടത്.

എന്നാൽ, ദുർബലമായ വകുപ്പുകൾ ചേർത്താണ് അഭിഭാഷകനെതിരെ വഞ്ചിയൂർ പൊലീസ് കേസെടുത്തതെന്നാണ് ഉയരുന്ന ആക്ഷേപം. ഇയാൾക്ക് ജാമ്യം ലഭിക്കാൻ പൊലീസിൻ്റെ സഹായവും ലഭിച്ചതായും ഷിബു ആരോപിക്കുന്നു. മൂന്നരലക്ഷത്തോളം രൂപ ചികിത്സയുടെ ഭാഗമായി വന്നതോടെ എന്ത് ചെയ്യണമെന്നറിയാതെ കുഴങ്ങുകയാണ് ഇദ്ദേഹം.

ലോക്ക്ഡൗണും കൊവിഡും കാരണം പൂർണമായും കടക്കണിയിലാണ് കുടുംബം.അതേ സമയം, കേസ് എങ്ങനെയെങ്കിലും ഒതുക്കി തീർക്കാൻ പല കോണുകളിൽ നിന്നായി ശ്രമങ്ങൾ നടക്കുന്നതായും ആക്ഷേപമുണ്ട്. സംഭവത്തിലൂടെ തനിക്ക് നീതി നിഷേധിക്കപ്പെടുകയാണുണ്ടായതെന്ന് 'വൺ ഇന്ത്യ മലയാള'ത്തോട് ഷിബു പ്രതികരിച്ചു.

English summary

A cancer patient who was injured in an attack by a lawyer in Vanchiyoor is in a miserable condition. The incident came to the notice of the outside world after the footage of the incident which took place two and a half months ago was spread on social media. Shibu, a native of Moolathoppu, Kundamonbhagam, Vilavoorkal, Thiruvananthapuram, was hit on the head by a lawyer and fell on the road.