കൊവിഡ് വ്യാപനത്തിൽ കുറവ്; പൂര്ണമായും ആശ്വസിക്കാവുന്ന നിലയായിട്ടില്ലെന്ന് മുഖ്യമന്ത്രി
തിരുവനന്തപുരം; കൊവിഡ് വ്യാപനത്തിൽ കുറവുണ്ടെങ്കിലും പൂര്ണമായും ആശ്വസിക്കാവുന്ന നിലയായിട്ടില്ലെന്ന് മുഖ്യമന്ത്രി പിണറായി വിജയൻ.ദൈനംദിനം രോഗവിമുക്തി നേടുന്നവരുടെ എണ്ണം രോഗികളാകുന്നവരുടെ എണ്ണത്തേക്കാള് കൂടുതലാണെന്നത് ആശ്വാസകരമാണ്. നിയന്ത്രണങ്ങളോട് പൊതുസമൂഹം ക്രിയാത്മകമായി പ്രതികരിച്ചതിന്റെ ഗുണഫലമാണ് രോഗവ്യാപനത്തില് കാണുന്ന ഈ കുറവ്. പക്ഷേ, ജാഗ്രതയില് തരിമ്പും വീഴ്ച വരുത്താന് പറ്റാത്ത സാഹചര്യം തുടരുകയാണെന്നും വാർത്താസമ്മേളനത്തിൽ മുഖ്യമന്ത്രി പറഞ്ഞു.
ആശുപത്രികളില് ചികിത്സയില് കഴിയുന്നവരുടെ എണ്ണത്തില് കുറവുണ്ടായിട്ടില്ല. ഐസിയു ബെഡുകളിലും വെന്റിലേറ്ററുകളിലും ഇപ്പോള് അനുഭവപ്പെടുന്ന തിരക്ക് കുറച്ചു നാളുകള് കൂടി നീണ്ടു നില്ക്കും. അതിനാല് ആശുപത്രികളില് കൂടുതല് തിരക്കുണ്ടാകാതിരിക്കുക എന്നത് അനിവാര്യമാണ്. മനുഷ്യജീവനുകള് നഷ്ടപ്പെടാതിരിക്കാന് വേണ്ട ഏറ്റവും പ്രധാന മുന്കരുതലാണത് എന്നോര്ക്കണം.
വാക്സിന് മുന്ഗണനാ പട്ടികയില് ഫീല്ഡില് പ്രവര്ത്തിക്കുന്ന സിവില് സപ്ലൈസ്, സപ്ലൈകോ, ലീഗല് മെട്രോളജി, സര്ക്കാര് പ്രസ്, ടെക്സ്റ്റ് ബുക്ക് അച്ചടി, പാസ്പോര്ട്ട് ഓഫീസ് ജീവനക്കാരെ കൂടി ഉള്പ്പെടുത്തും.
കോവിഡ് പ്രതിരോധ സാമഗ്രികള് പൊതുവിപണിയില് വില്ക്കുന്നതിന് വില നിശ്ചയിച്ച് സര്ക്കാര് ഉത്തരവായിരുന്നു. എന്നാല് മെഡിക്കല് സ്റ്റോറുകള് ഉള്പ്പെടെയുളള പല സ്ഥാപനങ്ങളും കൂടിയ വിലയ്ക്കാണ് ഇവ വില്ക്കുന്നതെന്ന് ശ്രദ്ധയില്പ്പെട്ടിട്ടുണ്ട്.
ഇത്തരം നടപടികള് കണ്ടെത്തുന്നതിനായി സ്പെഷ്യല് ബ്രാഞ്ചിന്റെ പ്രത്യേക സംഘം എല്ലാ ജില്ലകളിലും പരിശോധന ആരംഭിച്ചു. സ്ഥാപനങ്ങള് അടച്ചുപൂട്ടുന്നതുള്പ്പെടെയുളള നിയമ നടപടികള് സ്വീകരിക്കാനാണ് പൊലീസിന് നിര്ദ്ദേശം നല്കിയിട്ടുള്ളത്.
ഗുണനിലവാരമില്ലാത്ത, കമ്പനികളുടെ പേരോ വിലയോ രേഖപ്പെടുത്തിയിട്ടിലാത്ത പള്സ് ഓക്സിമീറ്ററുകള് വിപണിയില് നിന്നു വാങ്ങാതിരിക്കാന് ജനങ്ങള് ശ്രദ്ധിക്കണം. ശരീരത്തിന്റെ ഓക്സിജന് നില കൃത്യമായി മനസ്സിലാക്കേണ്ടത് കോവിഡ് രോഗികളുടെ സുരക്ഷിതത്വത്തിനു അനിവാര്യമാണ്.
ഗുണനിലവാരമില്ലാത്ത പള്സ് ഓക്സിമീറ്ററുകള് നല്കുന്ന തെറ്റായ വിവരങ്ങള് രോഗിയെ അപകടപ്പെടുത്താന് സാധ്യതയുണ്ട്. അതുകൊണ്ട് മെഡിക്കല് സര്വീസ് കോര്പറേഷന് ഗുണനിലവാരം പരിശോധിച്ച് ചുരുക്കപ്പട്ടികയില് ഉള്പ്പെടുത്തിയ കമ്പനികളുടെ പള്സ് ഓക്സിമീറ്ററുകള് മാത്രം വാങ്ങാന് ശ്രദ്ധിക്കണം. ആ പട്ടിക പൊതുജനങ്ങളുടെ അറിവിലേക്കായി സര്ക്കാര് ഉടന് പരസ്യപ്പെടുത്തുമെന്നും മുഖ്യമന്ത്രി പറഞ്ഞു.
Click it and Unblock the Notifications
Sign in with Google