180 ഡിഗ്രി കറങ്ങുന്ന കസേര, സ്പ്ലിറ്റ് എസിക്ക് പുറത്ത് നിന്ന് വൈദ്യുതി; കളർ കോഡും വേണ്ട
തിരുവനന്തപുരം: നവകേരള സദസിന് മുഖ്യമന്ത്രിയും മന്ത്രിമാരും സഞ്ചരിക്കുന്ന കെഎസ്ആർടിസി ആഡംബര ബസിന് ഇളവുകള് പ്രഖ്യാപിച്ച് സര്ക്കാര് വിജ്ഞാപനം. കോണ്ട്രാക്ട് കാര്യേജ് വാഹനങ്ങള്ക്കു നിര്ദേശിച്ചിരിക്കുന്ന കളര്കോഡ് ഉൾപ്പെടെയുള്ള കാര്യങ്ങൾക്ക് ഇളവുകൾ വരുത്തിയാണ് വിജ്ഞാപനം.കെഎസ്ആര്ടിസി എംഡി നല്കിയ ശുപാര്ശയുടെ അടിസ്ഥാനത്തിലാണ് ഇളവുകള് നല്കിയിരിക്കുന്നതെന്നാണ് വിജ്ഞാപനത്തില് പറയുന്നത്.
മുന്നിരയിലെ കസേര 180 ഡിഗ്രി കറക്കാനുള്ള അനുമതി വിജ്ഞാപനത്തിൽ പറയുന്നുണ്ട്. കൂടാതെ വാഹനം നിര്ത്തുമ്പോള് പുറത്തുനിന്നും വൈദ്യുതി ജനറേറ്റര് വഴിയോ ഇന്വെട്ടര് വഴിയോ വൈദ്യുതി നല്കാനും അനുമതിയുണ്ട്. വെള്ളം നിറമാണ് കോൺട്രാക്ട് കാര്യേജ് ബസുകൾക്ക് വേണ്ടതെന്നാണ് നിയമം. ആഡംബര ബസിന് ബ്രൗൺ നിറമാണ് നൽകിയിരിക്കുന്നത്. കെഎസ്ആര്ടിസി വാങ്ങിയ ബസ് സര്ക്കാര് വിവിഐപികള്ക്കു വേണ്ടിയും ടൂറിസം ആവശ്യങ്ങള്ക്കായും ഉപയോഗിക്കുമെന്നും സര്ക്കാര് ആവശ്യപ്പെടുമ്പോള് വാഹനം വില്ക്കണമെന്നും സര്ക്കാര് വിജ്ഞാപനത്തിൽ പറയുന്നുണ്ട്.
ബെംഗളൂരുവിലെ എസ്.എം കണ്ണപ്പ ഓട്ടോമൊബൈല്സ് പ്രൈവറ്റ് ലിമിറ്റഡ് (പ്രകാശ്) ആണ് അത്യാധുനിക സൗകര്യങ്ങളുള്ള ബസിന്റെ ബോഡി നിര്മിച്ചത്. ബസ് നാളെ രാവിലെ 6.30 ഓടെയാണ് നവകേരള സദസ് തുടങ്ങുന്ന കാസർഗോഡ് എത്തുക.
നവകേരള സദസിന് നാളെ തുടക്കം
നവകേരള സദസിന് നാളെ (നവംബർ 18) കാസർകോട് മഞ്ചേശ്വരം മണ്ഡലത്തിലെ പൈവളിഗെയിൽ തുടക്കമാവും. വൈകിട്ട് 3.30ന് നടക്കുന്ന ചടങ്ങിൽ മുഖ്യമന്ത്രി പിണറായി വിജയൻ നവകേരള സദസ് ഉദ്ഘാടനം ചെയ്യും. റവന്യു മന്ത്രി കെ. രാജൻ അധ്യക്ഷത വഹിക്കും. ഡിസംബർ 23ന് വൈകിട്ട് ആറിന് തിരുവനന്തപുരം വട്ടിയൂർക്കാവിലാണ് സമാപനം.
മുഖ്യമന്ത്രിയും മന്ത്രിമാരും കേരളത്തിലെ 140 മണ്ഡലങ്ങളിലും നവകേരള സദസിന്റെ ഭാഗമായി പര്യടനം നടത്തും. സ്വാതന്ത്ര്യസമര സേനാനികൾ, വെറ്ററൻസ്, വിവിധ മേഖലകളിലെ പ്രമുഖർ, തെരഞ്ഞെടുക്കപ്പെട്ട മഹിളാ, യുവജന, കോളേജ് യൂണിയൻ ഭാരവാഹികൾ, പട്ടികജാതി പട്ടികവർഗ വിഭാഗങ്ങളിലെ പ്രതിഭകൾ, കലാകാരൻമാർ, സെലിബ്രിറ്റികൾ, അവാർഡ് ജേതാക്കൾ, തെയ്യം കലാകാരൻമാർ, സാമുദായിക സംഘടനാ നേതാക്കൾ, മുതിർന്ന പൗരൻമാരുടെ പ്രതിനിധികൾ, വിവിധ സംഘടനാ പ്രതിനിധികൾ, ആരാധനാലയങ്ങളുടെ പ്രതിനിധികൾ തുടങ്ങിയവർ മണ്ഡലം സദസിലെ പ്രത്യേക ക്ഷണിതാക്കളാകും.
മന്ത്രിസഭായോഗം നടക്കുന്നതൊഴികെയുള്ള ദിവസങ്ങളിൽ രാവിലെ 9 മണിക്ക് ഓരോ മണ്ഡലത്തിലെയും പ്രത്യേക ക്ഷണിതാക്കളുമായി കൂടിക്കാഴ്ച നടക്കും. തുടർന്ന് വിവിധ മണ്ഡലങ്ങളിലെ സദസുകളിലേക്ക് മുഖ്യമന്ത്രിയും മന്ത്രിമാരും യാത്രതിരിക്കും. ജനങ്ങളിൽ നിന്ന് പരാതികൾ സ്വീകരിക്കുന്നതിന് ഓരോ വേദിയിലും സംവിധാനമുണ്ടാവും.
നവകേരള സദസ് ആരംഭിക്കുന്നതിന് മൂന്നു മണിക്കൂർ മുമ്പ് മുതൽ പരാതികൾ സ്വീകരിച്ചു തുടങ്ങും. മുഴുവൻ പരാതികളും സ്വീകരിക്കുന്നതു വരെ കൗണ്ടറുകൾ പ്രവർത്തിക്കും. പരാതികൾ സമർപ്പിക്കുന്നത് സംബന്ധിച്ച മാർഗനിർദ്ദേശങ്ങൾ കൗണ്ടറുകളിൽ പ്രദർശിപ്പിക്കും. മുതിർന്ന പൗരൻമാർ, ഭിന്നശേഷിക്കാർ, സ്ത്രീകൾ എന്നിവർക്ക് പ്രത്യേകം കൗണ്ടറുകൾ ഒരുക്കും. ലഭിക്കുന്ന പരാതികൾ വേഗത്തിൽ തീർപ്പാക്കാനുള്ള സംവിധാനമാണ് നിശ്ചയിച്ചിട്ടുള്ളത്. എല്ലാ പരാതികൾക്കും കൈപ്പറ്റ് രസീത് നൽകും. പരാതി തീർപ്പാകുന്ന മുറയ്ക്ക് തപാലിൽ അറിയിക്കുകയും ചെയ്യും. പരാതികളുടെ സ്ഥിതി www.navakeralasadas.kerala.gov.inൽ നിന്ന് അറിയാനാകും. രസീത് നമ്പരോ പരാതിയിലുള്ള മൊബൈൽ നമ്പറോ നൽകിയാൽ മതി.
പരാതികളിൽ രണ്ടാഴ്ചയ്ക്കുള്ളിലും കൂടുതൽ നടപടിക്രമം ആവശ്യമെങ്കിൽ പരമാവധി നാലാഴ്ചയ്ക്കുള്ളിലും ജില്ലാതല ഉദ്യോഗസ്ഥർ തീരുമാനം എടുക്കും. സംസ്ഥാനതലത്തിൽ തീരുമാനമെടുക്കേണ്ട വിഷയങ്ങളിൽ ജില്ലാ ഓഫീസർമാർ വകുപ്പ്തല മേധാവി മുഖേന റിപ്പോർട്ട് സമർപ്പിക്കും. ഇത്തരം പരാതികൾ 45 ദിവസത്തിനകം തീർപ്പാക്കും. അപേക്ഷകന് ഇടക്കാല മറുപടിയും നൽകും.
ഓരോ നിയമസഭാ മണ്ഡലത്തിലും എ. എൽ. എമാരുടെയും സർക്കാർ ഉദ്യോഗസ്ഥരുടെയും നേതൃത്വത്തിലുള്ള സംഘാടക സമിതികൾ പ്രവർത്തിക്കുന്നുണ്ട്. ഇതോടൊപ്പം തദ്ദേശസ്ഥാപന പ്രതിനിധികൾക്കും ചുമതല നൽകിയിട്ടുണ്ട്.
Click it and Unblock the Notifications
Sign in with Google