പന്ന്യന്‍ പാവ സെക്രട്ടറിയെന്ന് ശശി

തിരുവനന്തപുരം: സിപിഐ സംസ്ഥാന സെക്രട്ടറി പന്ന്യന്‍ രവീന്ദ്രനെതിരെ ഗുരുതര ആരോപണങ്ങളുമായി സ്ഥാനം നഷ്ടപ്പെട്ട തിരുവനന്തപുരം ജില്ലാ സെക്രട്ടറി വെഞ്ഞാറമൂട് ശശി. പന്ന്യന്‍ രവീന്ദ്രന്‍ വെറും പാവ സെക്രട്ടറിയാണെന്ന് ശശി ആരോപിക്കുന്നു.

ബെന്നറ്റ് എബ്രഹാമിനെ സ്ഥാനാര്‍ത്ഥിയാക്കിയതില്‍ പന്ന്യന്‍ രവീന്ദ്രനും ഉത്തരവാദിത്തമുണ്ട്. ബെന്നറ്റിനെ തന്നെ നിര്‍ത്തണം എന്ന കാര്യത്തില്‍ പന്ന്യന് ആയിരുന്നു നിര്‍ബന്ധമെന്നും വെഞ്ഞാറമൂട് ശശി ആരോപിക്കുന്നു.

പന്ന്യന്‍ മറ്റുള്ളവരുടെ നിര്‍ദ്ദേശം അനുസരിച്ച് ചലിക്കുന്ന പാവയാണ്. ബെന്നറിനെ സ്ഥാനാര്‍ത്ഥിയാക്കുന്നതിന് അമിത താപര്യം കാണിച്ചത് പന്ന്യന്‍ രവീന്ദ്രനാണ്. പികെവിയും വെളിയവും അച്യുത മേനോനും ഒക്കെ ഇരുന്ന കസേരയിലാണ് പന്ന്യന്‍ ഇപ്പോള്‍ ഇരിക്കുന്നത്- ശശി പറയുന്നു.

പാര്‍ട്ടിയില്‍ നിന്ന് വാര്‍ത്തകള്‍ ചോര്‍ത്തുന്നത് സംസ്ഥാന സെക്രട്ടറിയായ പന്ന്യന്‍ രവീന്ദ്രന്റെ അറിവോടെയാണെന്നും വെഞ്ഞാറമൂട് ശശി ആരോപിക്കുന്നു. അടുത്ത സമ്മേളനത്തോടെ പാര്‍ട്ടി വിഭാഗീയതക്കാരുടെ കൈയ്യിലാകുമെന്നും ശശി പറയുന്നു. പന്ന്യന്‍സംസ്ഥാന സെക്രട്ടറി സ്ഥാനം ഒഴിയണമെന്ന ആവശ്യവും ശശി ഉന്നയിക്കുന്നു.

കമ്യൂണിസ്റ്റുകാരനായി തുടരും എന്നാണ് ശശി പറയുന്നത്. എന്നാല്‍ സിപിഐക്കൊപ്പം ഉണ്ടാകില്ല. സിപിഎംപിയിലെ അരവിന്ദാക്ഷന്‍ വിഭാഗവുമായി വെഞ്ഞാറമൂട് ശശി ചര്‍ച്ചകള്‍ നടത്തിയതായി റിപ്പോര്‍ട്ടുകളുണ്ട്. ഇക്കാര്യത്തില്‍ സ്ഥിരീകരണം ലഭിച്ചിട്ടില്ല.

English summary

Pannya Raveendran is a puppet secreatry: Venjaramoodu Shasi.