ഹരിഹരവര്‍മ്മ സുകുമാരക്കുറുപ്പ് തന്നെയോ?

By Soorya Chandran

Updated: Wednesday, May 14, 2014, 11:12 [IST]

തിരുവനന്തപുരം: രത്‌ന വ്യാപാരത്തിനനിടെ കൊല്ലപ്പെട്ട ഹരിഹരവര്‍മ്മ ആരെന്ന് പോലീസിന് ഇതുവരെ കണ്ടെത്താനായിട്ടില്ല. ഇതുപോലെ കണ്ടെത്താനാകാതെ പോയ മറ്റൊരാളിലേക്കാണ് ഇപ്പോള്‍ സംശയങ്ങള്‍ നീളുന്നത്. അത് മറ്റാരുമല്ല. പിടികിട്ടാപ്പുള്ളി സുകുമാരക്കുറുപ്പ് തന്നെ.

ഫിലിം റെപ്രസെന്റേറ്റീവ് ചാക്കോയെ കൊലപ്പെടുത്തി അപ്രത്യക്ഷനായ ആ പഴയ സുകുമരക്കുറിപ്പ് തന്നെയാണോ പിന്നീട് ഹരിഹരവര്‍മ്മയായി രംഗപ്രവേശനം ചെയ്തത് എന്നാണ് ഇപ്പോള്‍ പോലീസ് സംശയിക്കുന്നത്. ഇത് സ്ഥിരീകരിക്കാന്‍ പോലീസ് ഡിഎന്‍എ പരിശോധന അടക്കമുള്ള നടപടികളിലേക്ക് നീങ്ങുകയാണ്.

ഹരിഹരി വര്‍മ്മയുടെ ചിത്രങ്ങള്‍ പുറത്ത് വിട്ടിട്ടും അദ്ദേഹത്തെ തേടി രക്ത ബന്ധുക്കള്‍ ആരും തന്നെ എത്തിയിരുന്നില്ല. രണ്ട് ഭാര്യമാരാണ് എത്തിയത്. അവര്‍ക്കാണെങ്കില്‍ ഹരിഹര വര്‍മ്മ എവിടത്തുകാരനാണെന്ന് പോലും കൃത്യമായി അറിയുമായിരുന്നില്ല. ഹരിഹരവര്‍മ്മ ആരാണെന്ന് കണ്ടെത്താന്‍ കഴിയാത്തതിന് പോലീസിന് കോടതിയുടെ വിമര്‍ശനും ഏറ്റുവാങ്ങേണ്ടിയും വന്നു.

വര്‍ഷങ്ങള്‍ക്ക് മുമ്പ് നാട് വിട്ടുപോയ ഒരാള്‍... അങ്ങനെ ഒരു സംശയമാണ് പോലീസിനുള്ളത്. അത് സുകുമാരക്കുറുപ്പ് ആകണമെന്ന് ഒരു നിര്‍ബന്ധവുമില്ല. ഒരു സംശയത്തിന്റെ പേരില്‍ സുകുമാരക്കുറുപ്പിന്റെ ബന്ധുക്കളുടെ ഡിഎന്‍എയുമായി സാദൃശ്യമുണ്ടോ എന്ന് പരിശോധിക്കുകയാണ് പോലീസിന്റെ ലക്ഷ്യം.

1984 ജനുവരിയിലാണ് ഇന്‍ഷുറന്‍സ് തുക വെട്ടിക്കാന്‍ വേണ്ടി സുകുമാരക്കുറുപ്പ് ചാക്കോയെ വധിച്ച് മുങ്ങിയത്. മാവേലിക്കര സ്വദേശിയായിരുന്നു കുറുപ്പ്. ഹരിഹരവര്‍മ്മ ആളുകളോട് പറഞ്ഞിരുന്നത് താന്‍ മാവേലിക്കര കോവിലകത്തെ അംഗമാണെന്നാണ്. ഇതാണ് പോലീസിന്റെ സംശയത്തിന് ബലം നല്‍കുന്നത്.