അതിജീവിതമാര്ക്ക് നീതി ഉറപ്പാക്കുമെന്ന് ശ്വേത മേനോന്, ആ കേസ് ശരിക്കും പരിഹാസ്യം!
മലയാള സിനിമയിലെ അഭിനേതാക്കളുടെ സംഘടനയായ അമ്മയ്ക്ക് ചരിത്രത്തില് ആദ്യമായി ഒരു വനിതാ പ്രസിഡന്റിനെ ലഭിച്ചിരിക്കുകയാണ്. കഴിഞ്ഞ മാസം നടന്ന തിരഞ്ഞെടുപ്പില് നടി ശ്വേത മേനോനാണ് അമ്മയുടെ പ്രസിഡന്റായി തിരഞ്ഞെടുക്കപ്പെട്ടത്. അമ്മ തിരഞ്ഞെടുപ്പില് ശക്തമായ മത്സരം നടത്താന് സാധിക്കും എന്ന് പ്രതീക്ഷിച്ചിരുന്നു എന്ന് ശ്വേത മേനോന് പറഞ്ഞു. ഖലീജ് ടൈംസിനോടായിരുന്നു ശ്വേതയുടെ പ്രതികരണം.
താന് മത്സരിക്കുമെന്ന് പ്രഖ്യാപിച്ചതിനുശേഷം സംഭവിച്ച കാര്യങ്ങള് മത്സരത്തില് തുടരാനുള്ള തന്റെ തീരുമാനത്തെ ശക്തിപ്പെടുത്തി എന്നും അവര് പറഞ്ഞു. ലാലേട്ടന് പ്രസിഡന്റ് സ്ഥാനത്തേക്കില്ല എന്ന് വ്യക്തമാക്കിയതോടെയാണ് ആ ഉത്തരവാദിത്തം താന് ഏറ്റെടുത്തത് എന്ന് ശ്വേത പറഞ്ഞു. 'കാരണം ഞാന് അദ്ദേഹത്തിന് കീഴിലുള്ള വൈസ് പ്രസിഡന്റുമാരില് ഒരാളായിരുന്നു, സംഘടനയെയും അതിന്റെ കാര്യങ്ങളെയും കുറിച്ച് മതിയായ അനുഭവവും ധാരണയും ഉണ്ടായിരുന്നു,' ശ്വേത പറഞ്ഞു.
വനിതാ അംഗങ്ങളോടും അവരുടെ പ്രശ്നങ്ങളോടും സംഘടന നിസംഗത പുലര്ത്തുന്നു എന്ന ധാരണ ഇല്ലാതാക്കാന് ശ്രമിക്കുമെന്നും ശ്വേത വ്യക്തമാക്കി. പല കാരണങ്ങളാല് അമ്മയുടെ ചരിത്രത്തില് ഏറ്റവും കൂടുതല് സ്ക്രീനിംഗിന് വിധേയയാകാന് പോകുന്ന വനിതാ പ്രസിഡന്റായിരിക്കും താന് എന്നും അവര് പറഞ്ഞു. അതേസമയം തിരഞ്ഞെടുപ്പ് സമയത്ത് തനിക്കെതിരെ രജിസ്റ്റര് ചെയ്ത കേസില് അത്ഭുതം തോന്നി എന്നും ശ്വേത പറഞ്ഞു.
' മത്സരിക്കുമ്പോള് എല്ലാത്തരം തടസങ്ങളും ഞാന് പ്രതീക്ഷിച്ചിരുന്നെങ്കിലും, പ്രശസ്തരായ നടന്മാര്ക്കും സംവിധായകര്ക്കും ഒപ്പം ചില ക്ലാസിക് മലയാള സിനിമകളില് അഭിനയിച്ചതിനും അതിനിടയില് സംസ്ഥാന അംഗീകാരം നേടിയതിനും എനിക്കെതിരെ ഫയല് ചെയ്ത വിചിത്രമായ കേസ് പൂര്ണ്ണമായും അമ്പരപ്പിക്കുന്നതും പരിഹാസ്യവുമായിരുന്നു,' ശ്വേത മേനോന് കൂട്ടിച്ചേര്ത്തു.
താന് ഇപ്പോള് പ്രസിഡന്റായതുകൊണ്ട് മാത്രം അത്തരം പ്രചരണങ്ങള് അവസാനിക്കുമെന്നോ അത്തരക്കാര് നിശബ്ദത പാലിക്കുമെന്നോ കരുതുന്നില്ല എന്നും എന്നാല് തന്റെ കുടുംബത്തില് നിന്നും തന്നെ അടുത്തറിയുന്നവരില് നിന്നും തന്നോടൊപ്പം പ്രവര്ത്തിച്ചവരില് നിന്നും പിന്തുണയുള്ളതിനാല് അതില് താന് ഒട്ടും ആശങ്കപ്പെടുന്നില്ല എന്നും ശ്വേത വ്യക്തമാക്കി.
സ്ത്രീകള് എന്ന നിലയില് നമ്മുടെ ഗുണങ്ങളായ അനുകമ്പ, ഫലപ്രദമായ ആശയവിനിമയം, ക്ഷമ, പ്രതിരോധശേഷി എന്നിവ അമ്മയുടെ പൊതു സ്വീകാര്യത വര്ദ്ധിപ്പിക്കാന് സഹായിക്കുമെന്ന് ഞാന് വിശ്വസിക്കുന്നു. പ്രധാന സ്ഥാനങ്ങളില് സ്ത്രീകള് ഉണ്ടായിരിക്കുന്നത് മറ്റ് വനിതാ അംഗങ്ങളെ ഒരു മടിയും കൂടാതെ മുന്നോട്ട് വന്ന് അവരുടെ പ്രശ്നങ്ങള് ഞങ്ങളുമായി ചര്ച്ച ചെയ്യാന് ധൈര്യപ്പെടുത്തും.
എല്ലാത്തിനുമുപരി, നാമെല്ലാവരും നല്ല ശ്രോതാക്കളും കൂടുതല് ക്ഷമയുള്ളവരുമാണ്. ഈ തിരഞ്ഞെടുപ്പിന് ശേഷം ഞങ്ങളുടെ അംഗങ്ങള്ക്കിടയില് വലിയ പോസിറ്റിവിറ്റിയും ഞാന് കാണുന്നു, ശ്വേത പറഞ്ഞു. അമ്മയിലെ അംഗങ്ങളുടെ, പ്രത്യേകിച്ച് സ്ത്രീകളുടെ, തൊഴില് സാഹചര്യങ്ങള് മെച്ചപ്പെടുത്തുന്നതിനുള്ള വഴികളും മാര്ഗങ്ങളും ആലോചിക്കുന്നുണ്ട് എന്നും ഇതിന് ആവശ്യമായ ആശയങ്ങള് മറ്റിടങ്ങളില് നിന്ന് സ്വീകരിക്കുന്നുണ്ട് എന്നും ശ്വേത പറഞ്ഞു.
'അമ്മയിലെ അംഗങ്ങള് അവര് നേരിടുന്ന പ്രശ്നങ്ങളെ കുറിച്ച് തുറന്ന് പറഞ്ഞ് മുന്നോട്ട് വരണം. അമ്മ അവരോടൊപ്പം ഉണ്ടാകുമെന്ന് ഞാന് അവര്ക്ക് ഉറപ്പ് നല്കുന്നു. പീഡനങ്ങളും മറ്റും നേരിടുന്ന ഇരകള്ക്ക് ചുറ്റും ഞാന് സംഘടനയെ അണിനിരത്തി അവര്ക്ക് നീതി ഉറപ്പാക്കും. അത്തരം രീതികള് തടയാന് ഞങ്ങള് ഞങ്ങളുടെ കഴിവിന്റെ പരമാവധി ചെയ്യും,' അവര് വ്യക്തമാക്കി.
Click it and Unblock the Notifications
Sign in with Google