വൃക്ക ആംബുലന്സ് ഡ്രൈവര്മാര് ഏറ്റുവാങ്ങി, ദുരൂഹത; പരാതിയുമായി മെഡിക്കല് കോളേജ് അധികൃതര്
തിരുവനന്തപുരം: ആലുവയില് നിന്നും തിരുവനന്തപുരം മെഡിക്കല് കോളേജില് എത്തിച്ച വൃക്ക അനധികൃതമായി ഏറ്റുവാങ്ങിയെന്ന് ആരോപിച്ച് രണ്ട് സ്വകാര്യ ആംബുലന്സ് ഡ്രൈവര്മാര്ക്കെതിരെ നിയമനടപടിയുമായി മെഡിക്കല് കോളേജ് അധികൃതര്. ഇവര് വൃക്ക സ്വീകരിച്ച് തീയേറ്ററിലേക്ക് കൊണ്ടു പോകുന്ന സി സി ടി വി ദൃശ്യങ്ങള് ഉള്പ്പടെയാണ് മെഡിക്കല് കോളേജ് അധികൃതര് പരാതി നല്കിയിരിക്കുന്നത്.
ആശുപത്രിയുമായോ അവയവം ഏറ്റുവാങ്ങാവന് പോയ സ്വകാര്യ ആംബുലന്സ് ജീവനക്കാരുമായോ ബന്ധമില്ലാത്തവര് വൃക്ക എടുത്തുകൊണ്ടു പോയതില് ദുരൂഹതയുണ്ടെന്നാണ് ആശുപത്രി അധികൃതര് അറിയിച്ചിരിക്കുന്നത്. ആംബൂലന്സില് പോയ പി ജി ഡോക്ടര്മാര് പിന്നാലെ പോയെങ്കിലും പെട്ടി നല്കാന് ഇവര് തയ്യാറായിരുന്നില്ല. ഇതിന്റെ വീഡിയോ ചിത്രീകരിച്ച് വിവാദമുണ്ടാക്കാന് ശ്രമിച്ചെന്നും അധികൃതര് പറയുന്നു.
വൃക്കയുമായി ഇവര് വഴിയറിയാതെ നില്ക്കുന്നതും തീയേറ്റര് മാറിക്കയറുന്നതും ദൃശ്യങ്ങളില് കാണാന് സാധിക്കും. ആംബുലന്സ് മെഡിക്കല് കോളേജില് എത്തുമ്പോള് പൊലീസ് സുരക്ഷയുണ്ടായിരുന്നെങ്കിലും തീയേറ്ററിലേക്ക് കൊണ്ടു പോകാന് സുരക്ഷയില്ലായിരുന്നു.
അതേസമയം, ശസ്ത്ര്ക്രിയയ്ക്ക് ശേഷം രോഗി മരിച്ച സംഭവത്തില് കര്ശന നടപടി സ്വീകരിക്കാനാണ് സര്ക്കാര് തീരുമാനം. കഴിഞ്ഞ ദിവസം അഡീഷണല് ചീഫ് സെക്രട്ടറിയുടെ പ്രാഥമിക റിപ്പോര്ട്ടിന്റ അടിസ്ഥാനത്തില് ന്യൂറോളജി നെഫ്രോളജി വിഭാഗം മേധാവികളെ അന്വേഷണ വിധേയമായി സസ്പെന്ഡ് ചെയ്തതായി ആരോഗ്യ വകുപ്പ് മന്ത്രി വീണാ ജോര്ജ് അറിയിച്ചിരുന്നു.
ഏകോപനത്തില് വരുത്തിയ വീഴ്ചയെത്തുടര്ന്നാണ് നടപടി. അടിയന്തരമായി അന്വേഷിച്ച് റിപ്പോര്ട്ട് നല്കാന് ആരോഗ്യ വകുപ്പ് അഡീഷണല്
ചീഫ് സെക്രട്ടറിക്ക് നിര്ദേശം നല്കിയിരുന്നു. സംഭവവുമായി ബന്ധപ്പെട്ട് ഉന്നതതല യോഗം അടിയന്തരമായി വിളിച്ച് ചേര്ക്കുകയും ചെയ്തു. തുടര്ന്നാണ് അന്വേഷണ വിധേയമായി സസ്പെന്ഡ് ചെയ്യാന് തീരുമാനിച്ചത്. സംഭവത്തെപ്പറ്റി സമഗ്രാന്വേഷണം നടത്തുമെന്നും മന്ത്രി വ്യക്തമാക്കി.
ഞായറാഴ്ച പകല് 2.30ഓടെയാണ് മെഡിക്കല് കോളേജിലെ ഒരു രോഗിക്ക് ഈ വൃക്ക യോജിക്കുന്നതാണെന്ന് അറിഞ്ഞത്. 4 മണിയോടെ ഓടെ രോഗിയെ ഡയാലിസിസിന് വിധേയമാക്കി. നാല് മണിക്കുറോളം ഡയാലിസിസിന് വേണ്ടി വന്നുവന്നു. അതിന് ശേഷം രോഗിയെ ഓപ്പറേഷന് തീയറ്ററില് കയറ്റി രാത്രി 8.30 ഓടെ ശസ്ത്രക്രിയ നടത്തി. 8 മണിക്കുറോളം ശസ്ത്രക്രിയയ്ക്കെടുത്തു. പോസ്റ്റ് മോര്ട്ടം റിപ്പോര്ട്ടോടെ മാത്രമേ മരണ കാരണം അറിയാന് സാധിക്കുവെന്ന് മന്ത്രി അറിയിച്ചു.
സംഭവത്തില് മനുഷ്യാവകാശ കമ്മിഷനും കേസെടുത്തിട്ടുണ്ട്. വ്യക്ക യഥാസമയം ശസ്ത്രക്രിയ നടത്തി അവയവമാറ്റം നടത്താത്തത് കാരണം രോഗി മരിച്ചെന്ന പരാതിയിലാണ് സംസ്ഥാന മനുഷ്യാവകാശ കമ്മീഷന് കേസെടുത്ത് അന്വേഷണത്തിന് ഉത്തരവിട്ടത്. മെഡിക്കല് വിദ്യാഭ്യാസ ഡയറക്ടര് പരാതിയെ കുറിച്ച് അന്വേഷണം നടത്തി നാലാഴ്ചക്കകം വിശദമായ റിപ്പോര്ട്ട് സമര്പ്പിക്കണമെന്ന് കമ്മീഷന് അധ്യക്ഷന് ജസ്റ്റിസ് ആന്റണി ഡൊമിനിക് ആവശ്യപ്പെട്ടു. തിരുവനന്തപുരം മെഡിക്കല് കോളേജ് അധികൃതരുടെ വീഴ്ച കാരണമാണ് ശസ്ത്രക്രിയ വൈകിയതെന്ന് മനുഷ്യാവകാശ പ്രവര്ത്തകരായ ജി.എസ്.ശ്രീകുമാറും ജോസ് വൈ ദാസും സമര്പ്പിച്ച പരാതിയില് പറയുന്നു.
അതേസമയം, തിരുവനന്തപുരം മെഡിക്കല് കോളേജില് ശസ്ത്രക്രിയ വൈകിയതിനെ തുടര്ന്ന് വൃക്ക രോഗി മരിച്ച സംഭവത്തില് പഴുതടച്ച അന്വേഷണം വേണമെന്നും കുറ്റക്കാര്ക്കെതിരെ കര്ശന നടപടിയെടുക്കണമെന്നും കെപിസിസി പ്രസിഡന്റ് കെ.സുധാകരന് എം പി ആവശ്യപ്പെട്ടു. എറണാകുളം രാജഗിരി ആശുപത്രിയില് നിന്ന് മെഡിക്കല് കോളേജ് സൂപ്പര് സ്പെഷ്യാലിറ്റി ബ്ലോക്കിന്റെ കവാടത്തിലെത്തിച്ച വ്യക്ക ഏറ്റുവാങ്ങാന് വൈകിയെന്നത് ഗുരുതര ആരോപണമാണ്. ഒരു മനുഷ്യജീവന് രക്ഷിക്കുന്നതില് കാണിച്ച അലംഭാവം ഒരിക്കലും പൊറുക്കാന് കഴിയുന്നതല്ല. കുറ്റം ആരുടെ ഭാഗത്ത് നിന്നാണെങ്കിലും മാതൃകാപരമായ ശിക്ഷ അനിവാര്യമാണെന്നും അദ്ദേഹം കൂട്ടിച്ചേര്ത്തു.
ഹോളിവുഡ് താരങ്ങള് തോറ്റുപോകും; ഗ്ലാമറസ് ആന്ഡ് ഹോട്ട്, നിങ്ങള് പൊളിയാണ് മാളവിക
Click it and Unblock the Notifications
Sign in with Google