ആശുപത്രിയിൽ വീണ ജോര്ജിന്റെ മിന്നൽ സന്ദർശനം;കമ്പ്യൂട്ടർ കേടായെന്ന് തെറ്റിദ്ധരിപ്പിച്ച ജീവനക്കാരിക്കെതിരെ നടപടി
തിരുവനന്തപുരം: ആരോഗ്യ വകുപ്പ് മന്ത്രി വീണാ ജോര്ജ് മുന്നറിയിപ്പില്ലാതെ തിരുവനന്തപുരം ജനറല് ആശുപത്രി സന്ദര്ശിച്ചു. അടഞ്ഞുകിടക്കുന്ന സ്ട്രോക്ക് യൂണിറ്റ് എത്രയും വേഗം പ്രവര്ത്തനസജ്ജമാക്കാന് നിര്ദേശിച്ചു. സ്ട്രോക്ക് ചികിത്സയ്ക്ക് ആശുപത്രിയിലെത്തുന്നവര്ക്ക് പരിചരണം ഉറപ്പാക്കണം. അത്യാഹിത വിഭാഗം, വെയിറ്റിംഗ് ഏരിയ, ഫാര്മസി, കോവിഡ് വാര്ഡ്, ഓപ്പറേഷന് തീയറ്റര് കോംപ്ലക്സ്, വിവിധ ഐസിയുകള്, കാത്ത് ലാബ് എന്നിവ മന്ത്രി സന്ദര്ശിച്ചു. രോഗികളുമായും ജീവനക്കാരുമായും മന്ത്രി ആശയവിനിമയം നടത്തി.
ജനറല് ആശുപത്രിയില് പ്രവര്ത്തിക്കുന്ന അപ്പക്സ് ട്രോമ ആന്റ് എമര്ജന്സി ലേണിംഗ് സെന്റര് മന്ത്രി സന്ദര്ശിച്ചു. വിവിധ മാനിക്യിനുകള് ഉപയോഗിച്ച് നടത്തുന്ന അത്യാധുനിക ക്ലാസുകള് മന്ത്രി നേരിട്ട് വിലയിരുത്തി.
ആശുപത്രി സൗകര്യം, സേവനം, ചികിത്സ എന്നിവ ഉറപ്പാക്കാനാണ് ആശുപത്രി സന്ദര്ശനം നടത്തുന്നതെന്ന് മന്ത്രി പറഞ്ഞു. തിരുവനന്തപുരത്തെ പ്രധാന ആശുപത്രിയായ ജനറല് ആശുപത്രിയില് ധാരാളമാളുകള് എത്തുന്നുണ്ട്. അവര്ക്ക് വിദഗ്ധ പരിചരണം ഉറപ്പാക്കണം. ഒപിയില് തിരക്ക് ഒഴിവാക്കുന്നതിന് ഒപി കൗണ്ടറുകളും ചില ഒപി പരിശോധനാ മുറികളും രോഗികള്ക്ക് സൗകര്യപ്രദമായവിധം പുനക്രമീകരിക്കാന് നിര്ദേശം നല്കിയതായും മന്ത്രി പറഞ്ഞു.
ജനറല് ആശുപത്രിയിലെ മുന്വശത്തുള്ള പാസ് കൗണ്ടറിലാണ് മന്ത്രി ആദ്യമെത്തിയത്. സ്ത്രീകള്ക്കും പുരുഷന്മാര്ക്കും രണ്ട് കൗണ്ടറുകളുള്ളതായി ബോര്ഡുണ്ടെങ്കിലും ഒരു കൗണ്ടര് മാത്രമേ പ്രവര്ത്തിക്കാറൂള്ളൂവെന്ന് ക്യൂവില് നിന്ന ഒരാള് പരാതി പറഞ്ഞു. ഉടന് തന്നെ മന്ത്രി കൗണ്ടറില് കയറി കാര്യമന്വേഷിച്ചു. അവിടെയുണ്ടായിരുന്ന ജീവനക്കാരി പറഞ്ഞത് കമ്പ്യൂട്ടര് കേടായെന്നും 11 മാസമായി പ്രവര്ത്തിക്കുന്നില്ലെന്നുമാണ്. ഉടന് തന്നെ ആശുപത്രി സൂപ്രണ്ടിനെ വിളിച്ചുവരുത്തി. എന്നാല് കമ്പ്യൂട്ടര് പ്രവര്ത്തിക്കുന്നുണ്ടെന്ന് മനസിലായി. ഇതോടെ തെറ്റിദ്ധരിപ്പിച്ച ജീവനക്കാരിക്കെതിരെ നടപടി സ്വീകരിക്കാനും എത്രയും വേഗം കൗണ്ടര് പുന:സ്ഥാപിക്കാനും മന്ത്രി നിര്ദേശം നല്കി.
സ്റ്റാഫ് നഴ്സുമാരായി ജോലി ചെയ്തിട്ടും എക്സ്പീരിയന്സ് സര്ട്ടിഫിക്കറ്റ് നല്കുന്നില്ലെന്ന് ചിലര് പരാതിപ്പെട്ടു. തടസങ്ങള് നീക്കി അവര്ക്ക് എക്സ്പീരിയന്സ് സര്ട്ടിഫിക്കറ്റ് നല്കാന് മന്ത്രി നിര്ദേശം നല്കി. ആരോഗ്യ വകുപ്പ് ഡയറക്ടര് വി.ആര്. രാജു മന്ത്രിയോടൊപ്പമുണ്ടായിരുന്നു.
അതേസമയം, ദിവസങ്ങള്ക്ക് മുമ്പ് മന്ത്രി തൃശൂര് സര്ക്കാര് മെഡിക്കല് കോളേജ് സന്ദര്ശിച്ചിരുന്നു. അത്യാഹിത വിഭാഗം, വിവിധ വാര്ഡുകള് എന്നിവ സന്ദര്ശിക്കുകയും രോഗികള്, കൂട്ടിരിപ്പുകാര്, ഡോക്ടര്മാര്, നഴ്സുമാര്, മറ്റ് ആരോഗ്യ പ്രവര്ത്തകര് എന്നിവരുമായി ആശയ വിനിമയം നടത്തുകയും ചെയ്തിരുന്നു.
തൃശൂര് മെഡിക്കല് കോളേജില് എത്രയും പെട്ടെന്ന് ട്രോമകെയര് സംവിധാനവും ട്രയാജ് സംവിധാനവും പ്രവര്ത്തന സജ്ജമാക്കുന്നതാണ്. വര്ഷങ്ങളായി മുടങ്ങിക്കിടന്ന ട്രോമകെയര് ബ്ലോക്ക് കോടതി വ്യവഹാരങ്ങള് അവസാനിപ്പിച്ച് പുനരാരംഭിക്കുന്നതിന് വേണ്ടിയുള്ള ഇടപടലുകള് നടത്തിയിരുന്നു. ഇതിന്റെ ഫലമായി ട്രോമകെയറിന്റെ നിര്മ്മാണം പുനരാരംഭിച്ചിട്ടുണ്ട്. വളരെ വേഗത്തില് നിര്മ്മാണം പുരോഗമിക്കുകയാണ്.
എമര്ജന്സി മെഡിസിന് ആരംഭിക്കുന്നതിനുള്ള പ്രൊപ്പോസല് സമര്പ്പിക്കാന് നിര്ദേശം നല്കി. മെഡിക്കല് കോളേജില് ഒരു പീഡിയാട്രിക് ഐസിയുവിന്റെ നിര്മ്മാണം പുരോഗമിക്കുന്നുണ്ട്.
ഒരു മാസത്തിനുള്ളില് ഇതിന്റെ നിര്മ്മാണം പൂര്ത്തിയാകും. സൂപ്പര് സ്പെഷ്യാലിറ്റി ബ്ലോക്ക് ആരംഭിക്കുന്നതിന് കിഫ്ബിയിലൂടെ പണം അനുവദിച്ചിട്ടുണ്ട്. സമയബന്ധിതമായി സൂപ്പര് സ്പെഷ്യാലിറ്റി ബ്ലോക്ക് നിര്മ്മിക്കുന്നതിനായുള്ള നിര്ദേശം എസ്.പി.വിക്ക് നല്കിയിട്ടുണ്ട്. ഈ വര്ഷം ന്യൂറോ സര്ജറിക്ക് രണ്ട് പിജി സീറ്റുകള് മെഡിക്കല് കോളേജിന് അധികമായി ലഭിച്ചിരുന്നു. മെഡിക്കല് കോളേജിന് സ്വന്തമായൊരു എംആര്ഐ മെഷീന് അനുവദിക്കും. ഒഴിവുള്ള മെഡിസിന് വിഭാഗം പ്രൊഫസര് തസ്തിക ഉടന് നികത്താന് ബന്ധപ്പെട്ട ഉദ്യോഗസ്ഥന് നിര്ദേശം നല്കി. രോഗികളുടെ പരാതിയെ തുടര്ന്ന് മെഡിക്കല് കോളേജ് ആശുപത്രിയിലെ കിടക്കകള് മരുന്നുപയോഗിച്ച് വൃത്തിയാക്കാനും നിര്ദേശിച്ചിരുന്നു.
Click it and Unblock the Notifications
Sign in with Google