സംസ്ഥാനത്ത് വീണ്ടും കോളറ?; തിരുവനന്തപുരത്തെ യുവാവിന്റെ മരണം കോളറ ബാധിച്ചെന്ന് സംശയം

തിരുവനന്തപുരം: തിരുവനന്തപുരത്ത് കോളറ ബാധിച്ച് മരണമെന്ന് സംശയം. നെയ്യാറ്റിൻകര ഭിന്നശേഷിക്കാരുടെ ഹോസ്റ്റലിലെ അന്തേവാസിയായ അനുവാണ് ( 26 ) മരിച്ചത്. അനുവിനാെപ്പം വയറിളക്കം ബാധിച്ച കുട്ടിക്ക് കോളറ സ്ഥിരീകരിച്ചു. എസ് എടിയിൽ ചികിത്സയിലുള്ള കുട്ടികൾക്ക് മെ‍ഡിക്കൽ കോളേജ് ആശുപത്രിയിലെ ലാബിലെ പരിശോധനയിലാണ് രോ​ഗം സ്ഥിരീകരിച്ചത്.

ഹോസ്റ്റലിലെ ഒമ്പത് അന്തേവാസികൾക്ക് കൂടി വയറിക്കം ബാധിച്ച് മെഡിക്കൽ കോളേജ് ആശുപത്രിയിൽ ചികിത്സയിലാണ്. മരിച്ച അനുവിന് കോളറ ബാധിച്ചിരുന്നോ എന്ന് കണ്ടെത്താൻ പരിശോധന നടത്തുമെന്ന് ഡോക്ടർമാർ അറിയിച്ചു. സംസ്ഥാനത്ത് കഴിഞ്ഞ ആറ് മാസത്തിനിടെ 9 പേർക്കാണ് കോളറ സ്ഥിരീകരിച്ചത്. ഒടുവിലായി 2017 ലാണ് സംസ്ഥാനത്ത് കോളറ ബാധിച്ച് മരണം സംഭവിക്കുന്നത്.

വിബ്രിയോ കോളറ എന്ന ബാക്ടീരിയയാണ് പ്രധാനായും കോളറ പരത്തുന്നത്. മലിനമായ ഭക്ഷണത്തിലും ജലത്തിലുമാണ് ഈ ബാക്ടീരിയ കണ്ടുവരുന്നത്. അതിസാരം, ഛർദ്ദി, അമിതമായ ക്ഷീണം, മനം മറിച്ചൽ, കുഴിഞ്ഞ കണ്ണുകൾ, വരണ്ട വായ, അമിതമായ ദാഹം, വരണ്ട ചർമം, മൂത്രമില്ലാത്ത അവസ്ഥ, കുറഞ്ഞ രക്തസമ്മർദം, താളം തെറ്റിയ ഹൃദയമിടിപ്പ് എന്നിവയെല്ലാം കോളറയുടെ ലക്ഷണങ്ങളാണ്.