ലക്ഷണം ആരംഭിച്ച് രണ്ട് ദിവസങ്ങള്ക്കകം കോമ അവസ്ഥയിലെത്താം: നിപ അറിയേണ്ടതെല്ലാം
കോഴിക്കോട്: കോവിഡ് വ്യാപനം അതിശക്തമായ തുടരുന്നതിനിടയിലാണ് സംസ്ഥാനത്ത് വീണ്ടും നിപ വൈറസ് സ്ഥിരീകരിക്കുന്നത്. നിപ ബാധ സ്ഥിരീകരിച്ച കോഴിക്കോട് ചാത്തമംഗലം സ്വദേശിയായ 12 വയസ്സുകാരന് ഇന്ന് പുലര്ച്ചയോടെ മരണപ്പെടുകയും ചെയ്തു. വിട്ടുമാറാത്ത പനിയും ഛര്ദ്ദിയും മസ്തിഷ്ക ജ്വരവുമായി ആശുപത്രിയില് പ്രവേശിപ്പിച്ച കുട്ടിക്ക് ഇന്നലെ അര്ധ രാത്രിയോടെയായിരുന്നു രോഗം ബാധ സ്ഥിരീകരിക്കുന്നത്. ഉടന് തന്നെ ആരോഗ്യ വകുപ്പ് മന്ത്രിയുടെ നേതൃത്വത്തില് അടിയന്തര യോഗം ചേര്ന്ന് വേണ്ട നടപടികള് സ്വീകരിച്ചു.
കുട്ടിയുടെ സമ്പര്ക്ക പട്ടിക ഉള്പ്പടെ തയ്യാറാക്കിയിട്ടുണ്ട്. 150 ലേറെ പേരാണ് സമ്പര്ക്ക പട്ടികയില് വരുന്നത്. ഇതില് 20 പേര് പ്രാഥമിക സമ്പര്ക്ക പട്ടികയില് വരുന്നവരാണെന്നും മന്ത്രി അറിയിച്ചു. രണ്ട് പേര്ക്കാണ് ഇതുവരെ രോഗ ലക്ഷ സ്ഥിരീകരിച്ചിരിക്കുന്നത്. ഇവര് രണ്ട് പേരും ആരോഗ്യ വിദഗ്ധരാണ്. മെഡിക്കല് കോളേജില് സ്രവ പരിശോധനയ്ക്ക് സൗകര്യം ഒരുക്കും. നാഷണല് വൈറോജി ഇന്സ്റ്റിന്റ്യൂട്ടിലെ വിദഗ്ധര് കോഴിക്കോട് എത്തുമെന്നും ആരോഗ്യ വകുപ്പ് മന്ത്രി വീണ ജോര്ജ് അറിയിച്ചു.
രോഗ ലക്ഷണമുള്ളവരില് നിന്നും നിപ വൈറസ് കൂടുതല് പേരിലേക്ക് പകരാതിരിക്കാനായി പ്രതിരോധ മാര്ഗങ്ങള് ഊര്ജിതമാക്കും. രോഗത്തിന്റെ സംക്രമണത്തേയും പ്രതിരോധത്തേയും കുറിച്ചുള്ള ശാസ്ത്രീയമായ വിവരങ്ങള് എല്ലാവരും മനസിലാക്കണം. കോവിഡ് കാലമായതിനാല് എല്ലാവരും മാസ്ക് ധരിക്കുന്നുണ്ട്. എന് 95 മാസ്ക് നിപ വൈറസിനേയും പ്രതിരോധിക്കും. അതിനാല് തന്നെ ശ്വാസകോശ രോഗ ലക്ഷണങ്ങളുള്ളവരും അവരെ പരിചരിക്കുന്നവരും എന് 95 മാസ്ക് ധരിക്കേണ്ടതാണ്. ഭയപ്പെടാതെ ഒറ്റക്കെട്ടായി നിപയെ പ്രതിരോധിക്കാമെന്നും മന്ത്രി വ്യക്തമാക്കി.
എന്താണ് നിപ വൈറസെന്നും അതിന് സ്വീകരിക്കേണ്ട മുന്കരുതലുകള് എന്തെന്നും എല്ലാവരും അറിഞ്ഞിരിക്കേണ്ടതാണ്. ഇത് മൂന്നാം തവണയാണ് സംസ്ഥാനത്ത് നിപ ബാധിക്കുന്നത്. നേരത്തെ 2018ലും 2019ലും നിപ വൈറസ് സ്ഥിരീകരിച്ചിരുന്നു. 2018 ല് കോഴിക്കോട് ചങ്ങരോത്ത് പഞ്ചായത്തിലായിരുന്നു ആദ്യ കേസ് സ്ഥിരീകരിച്ചത്. അന്നത്തെ വൈറസ് ബാധയില് 17 പേര് മരിച്ചു. 2019 ല് എറണാകുളത്തായിരുന്നു രോഗം സ്ഥിരീകരിച്ചത്. ഇത് കൂടുതല് കേസുകളിലേക്ക് പോവാതിരിക്കാനും രോഗിയെ അടക്കം രക്ഷിക്കാനും സാധിച്ചു.
എന്താണ് നിപ വൈറസ്
റസ്ഹെനിപാ വൈറസ് ജീനസിലെ നിപ വൈറസ് പാരാമിക്സോ വൈറിഡേ ഫാമിലിയിലെ അംഗമാണ്. ഇതൊരു ആര്.എന്.എ. വൈറസ് ആണ്. മൃഗങ്ങളില് നിന്നും മൃഗങ്ങളിലേക്ക് പകരുന്ന വൈറസാണ് നിപ. വൈറസ് ബാധയുള്ള വവ്വാലുകളില് നിന്നോ പന്നികളില് നിന്നോ ഇത് മനുഷ്യരിലേക്ക് പകരാന് സാധ്യതയുണ്ട്. മനുഷ്യരില് നിന്ന് മനുഷ്യരിലേക്കും പകരാം. അസുഖ ബാധയുള്ളവരെ പരിചരിക്കുന്നവരിലേക്ക് രോഗം പകരാനും സാധ്യതയുണ്ട്. അതുപോലെ തന്നെ ആശുപത്രി ജീവനക്കാരും വളരെയധികം ശ്രദ്ധിക്കണം.
രോഗലക്ഷണങ്ങള്
വൈറസ് ശരീരത്തിനുള്ളില് പ്രവേശിച്ച് രോഗലക്ഷണങ്ങള് പ്രകടമാകുന്ന കാലയളവ് (ഇന്കുബേഷന് പീരീഡ്) 4 മുതല് 14 ദിവസം വരെയാണ്. ഇത് ചിലപ്പോള് 21 ദിവസം വരെയാകാം. രോഗബാധ ഉണ്ടായാലും ലക്ഷണങ്ങള് വ്യക്തമാകാന് ഇത്രയും ദിവസങ്ങള് വേണം. പനിയും തലവേദനയും തലകറക്കവും ബോധക്ഷയവുമൊക്കെയാണ് ലക്ഷണങ്ങള്. ചുമ, വയറുവേദന, മനംപിരട്ടല്, ഛര്ദി, ക്ഷീണം, കാഴ്ചമങ്ങല് തുടങ്ങിയ ലക്ഷണങ്ങളും അപൂര്വമായി പ്രകടിപ്പിക്കാം. രോഗലക്ഷണങ്ങള് ആരംഭിച്ച ഒന്നു രണ്ടു ദിവസങ്ങള്ക്കകം തന്നെ കോമ അവസ്ഥയിലെത്താന് സാധ്യതയുണ്ട്. തലച്ചോറിനെ ബാധിക്കുന്ന എന്സഫലൈറ്റിസ് ഉണ്ടാവാനും വലിയ സാധ്യതയാണുള്ളത്. ശ്വാസകോശത്തേയും ബാധിക്കാന് സാധ്യതയുണ്ട്.
രോഗ സ്ഥിരീകരണം
തൊണ്ടയില് നിന്നും മൂക്കില് നിന്നുമുള്ള സ്രവം, രക്തം, മൂത്രം, തലച്ചോറിലെ നീരായ സെറിബ്രോ സ്പൈനല് ഫ്ളൂയിഡ് എന്നിവയില് നിന്നുമെടുക്കുന്ന സാമ്പിളുകള് ആര് ടി പി സി ആര്. പരിശോധന വഴിയാണ് രോഗം സ്ഥിരീകരിക്കുന്നത്.
എടുക്കേണ്ട മുന്കരുതലുകള്
അസുഖം വന്നതിനു ശേഷമുള്ള ചികിത്സ മിക്കവാറും പേരില് അതി സങ്കീര്ണമാണ്. അതുകൊണ്ടുതന്നെ പ്രതിരോധമാണ് ഏറ്റവും പ്രധാനം.കഴിവതും വവ്വാലിന്റെ ആവാസ കേന്ദ്രങ്ങളില് പോകരുത്. വവ്വാല് കടിച്ച പഴങ്ങളോ മറ്റോ സ്പര്ശിക്കാനോ കഴിക്കാനോ പാടില്ല. കൃത്യമായി മാസ്ക് ഉപയോഗിക്കുക.സാമൂഹിക അകലം പാലിക്കുക. ഇടയ്ക്കിടയ്ക്ക് കൈകള് സോപ്പും വെള്ളവും ഉപയോഗിച്ച് 20 സെക്കന്റെടുത്ത് നന്നായി കഴുകുക. ഇത് ലഭ്യമല്ലെങ്കില് ആള്ക്കഹോള് അടങ്ങിയ സാനിറ്റൈസര് ഉപയോഗിച്ച് കൈ വൃത്തിയാക്കണം.
കൂടുതല് വായനക്ക് ക്ലിക്ക് ചെയ്യൂ: കീഴടങ്ങി സതീശൻ; ഉമ്മൻ ചാണ്ടിയെ നേരിട്ട് പോയി കണ്ടു, മുതിർന്ന നേതാക്കളെ വീട്ടിൽ പോയി കാണും... ഗ്രൂപ്പ് വിജയം?
രോഗിയുമായി ഒരു മീറ്റര് എങ്കിലും ദൂരം പാലിക്കുകയും രോഗി കിടക്കുന്ന സ്ഥലത്തു നിന്നും അകലം പാലിക്കുകയും ചെയ്യുക. രോഗിയുടെ വ്യക്തിപരമായ ആവശ്യങ്ങള്ക്കുള്ള സാമഗ്രികള് പ്രത്യേകം സൂക്ഷിക്കുകയും ഉപയോഗിക്കുകയും ചെയ്യുക. രോഗികളെ കൈകാര്യം ചെയ്യുന്നതില് ആശുപത്രികളും വലിയ ജാഗ്രത പുലര്ത്തണം. രോഗമുണ്ടെന്ന് സംശയിക്കുന്ന ആളുകളോട് സംസാരിക്കുമ്പോഴും പരിശോധിക്കുമ്പോഴും, മറ്റു ഇടപഴകലുകള് നടത്തുമ്പോഴും കയ്യുറകളും മാസ്കും ധരിക്കേണ്ടതുണ്ട്.
സ്വയം രക്ഷാ സജ്ജീകരണങ്ങളുടെ ഉപയോഗം
മാസ്ക്, കൈയുറ (ഗ്ലൗസ്), ഗൗണ് എന്നിവയൊക്കെ ഉള്പ്പെടുന്ന പിപിഇ കിറ്റ് രോഗിയുമായി ഇടപഴകുമ്പോള് ഉടനീളം ഉപയോഗിക്കേണ്ടതാണ്. തീര്ത്തും സൂക്ഷ്മമായ വായുവിലെ കണങ്ങളില് 95 ശതമാനവും ശ്വസിക്കുന്നത് തടയാന് കഴിയുന്ന എന്-95 മാസ്കുകള് രക്തവും സ്രവങ്ങളും ടെസ്റ്റിനായെടുക്കുമ്പോഴും ട്യൂബ് ഇടുന്നത് പോലുളള ഇടപെടല് വേളയിലും നിഷ്കര്ഷിക്കേണ്ടതാണ്.
കൈകള് സോപ്പുപയോഗിച്ച് 20 സെക്കന്റെങ്കിലും വ്യത്തിയായ് കഴുകുക. അണുനാശികാരികളായ ക്ലോറോഹെക്സിഡൈന് അല്ലെങ്കില് ആള്ക്കഹോള് അടങ്ങിയ ഹസ്ത ശുചികരണ ദ്രാവകങ്ങള് (ഉദാ. സാവ്ലോണ് പോലുള്ള) കൊണ്ട് ശുശ്രൂഷയ്ക്ക് ശേഷം കൈ കഴുകാവുന്നതാണ്.ശുശ്രൂഷയ്ക്ക് ഉപയോഗിക്കുന്ന ഉപകരണങ്ങളും മറ്റ് വസ്തുക്കളും പരമാവധി ഡിസ്പോസബിള് ആവുന്നതാണ് ഉത്തമം. പുനരുപയോഗം അനിവാര്യമെങ്കില് ശരിയായ രീതിയില് അണു നശീകരണത്തിന് ശേഷം മാത്രമെന്ന് ഉറപ്പ് വരുത്തണം.
പ്രായം തോറ്റുപോകുന്ന അഴക്: സാരിയില് തിളങ്ങി ശാലുമേനോന്
Click it and Unblock the Notifications
Sign in with Google