ചെറിയതുറ: ഉദ്യോഗസ്ഥര്‍ക്കെതിരെ നടപടി

തിരുവനന്തപുരം: ചെറിയതുറ വെടിവെപ്പ് സംഭവത്തില്‍ ജുഡീഷ്യല്‍ അന്വേഷണം നടത്താനുള്ള തീരുമാനം വെള്ളിയാഴ്ച ചേര്‍ന്ന മന്ത്രിസഭാ യോഗം ഔദ്യോഗികമായി അംഗീകരിച്ചു. സിറ്റിംഗ് ജഡ്ജിയായിരിക്കും അന്വേഷണം നടത്തുക.

വെടിവെപ്പിന് ഉത്തരവാദികളായ പോലീസ് ഉദ്യോഗസ്ഥര്‍ക്കെതിരെ വകുപ്പ് തല അന്വേഷണത്തിന് ശേഷം നടപടി എടുക്കാനും യോഗത്തില്‍ തീരുമാനമായി. രണ്ട് എസിമാര്‍, ഒരു സിഐ, ഒരു എസ്ഐ എന്നീ ഉദ്യോഗസ്ഥര്‍ക്കെതിരെയാണ് നടപടി.

വെടിവെപ്പ് സംബന്ധിച്ച ഡിജിപി ജേക്കബ്‌ പുന്നൂസ്‌ ആഭ്യന്തര വകുപ്പിന് സമര്‍പ്പിച്ച റിപ്പോര്‍ട്ട് ഇന്ന് ചേര്‍ന്ന മന്ത്രിസഭ പരിഗണിച്ചില്ല. സംഘര്‍ഷം നിയന്ത്രിക്കുന്നതില്‍ പോലീസ് പരാജയപ്പെട്ടുവെന്നും എന്നാല്‍ ചെറിയതുറയില്‍ വെടിവെപ്പ് അനിവാര്യമായിരുന്നുവെന്നുമാണ് ഡിജിപിയുടെ റിപ്പോര്‍ട്ടിലുണ്ടായിരുന്നത്.

മെയ് 17ന് ചെറിയതുറ ബീമാപ്പള്ളി പ്രദേശങ്ങളിലുണ്ടായ സംഘര്‍ഷത്തിനിടെ പോലീസ് നടത്തിയ വെടിവെപ്പില്‍ ആറ് പേര്‍ മരിച്ചിരുന്നു. ഇവരുടെ കുടുംബാംഗങ്ങള്‍ക്ക് 10 ലക്ഷം രൂപ നല്കുമെന്ന് സര്‍ക്കാര്‍ നേരത്തെ പ്രഖ്യാപിച്ചിരുന്നു. ഇതിന് പുറമെ കൊല്ലപ്പെട്ടവരുടെ ആശ്രിതര്‍ക്ക് ജോലി നല്കാനും മന്ത്രിസഭാ യോഗത്തില്‍ തീരുമാനമായി.