വണ്ടിപ്പെരിയാർ കേസ്: മൃതദേഹം ആദ്യം ഏറ്റുവാങ്ങിയതും അർജുൻ; തുടക്കം മുതൽ നാട്ടുകാരെ കബളിപ്പിച്ചത് ഇങ്ങനെ...

പൊലീസിന്റെ കൃത്യമായ ഇടപ്പെടലും നിരീക്ഷണവമാണ് കൃത്യം പുറത്തുകൊണ്ടുവന്നത്

പീരുമേട്: ക്രൂരപീഡനത്തിന് ഇരയായി കൊല്ലപ്പെട്ട ആറുവയസുകാരിയുടെ മൃതദേഹം ആദ്യം ഏറ്റുവാങ്ങിയതും പ്രതി അർജുനാണെന്ന് കുടുംബം. ജൂൺ 30നാണ് വീടിനുള്ളിൽ ആറുവയസുകാരിയെ കഴുത്തിൽ കയർ കുരുങ്ങിയ നിലയിൽ കണ്ടെത്തുന്നത്. കളിക്കുന്നതിനിടെ അബദ്ധത്തിൽ സംഭവിച്ചതാകാമെന്ന ഉറച്ച വിശ്വാസത്തിലായിരുന്നു വീട്ടുകാരും നാട്ടുകാരും. എന്നാൽ പൊലീസിന്റെ കൃത്യമായ ഇടപ്പെടലും നിരീക്ഷണവമാണ് കൃത്യം പുറത്തുകൊണ്ടുവന്നത്.

വീട്ടുകാർക്കും നാട്ടുകാർക്കും ഒന്നും സംശയമില്ലാത്ത രീതിയിലായിരുന്നു ആ ദിവസങ്ങളിലെല്ലാം പ്രതി അർജുന്റെ പെരുമാറ്റം. ഇതിന് ഇവർ എടുത്ത് പറയുന്നത് ജീവനറ്റ ശരീരം കണ്ടെത്തിയ ഉടൻ ഓടിയെത്തി പ്രാധമിക ശുശ്രൂഷ നൽകാനുൾപ്പടെ അർജുൻ കാണിച്ച തിടുക്കമാണ്. സംഭവം ഇങ്ങനെ...

കുളിപ്പിക്കാനായി അമ്മൂമ്മയാണ് കുട്ടിയെ ആദ്യം തിരയാൻ തുടങ്ങിയത്. ലയമയതിനാൽ അടുത്തുള്ള വീടുകളിൽ പോയി കളിക്കുന്ന പതിവുമുണ്ട്. ഇതിന്റെ അടിസ്ഥാനത്തിൽ അവിടെയെല്ലാം അന്വേഷിച്ചെങ്കിലും കണ്ടെത്താനായില്ല. മണിക്കൂറുകളായി ആരും കുട്ടിയെ കണ്ടില്ലെന്നാണ് പറഞ്ഞത്. ഇതോടെയാണ് അടച്ചിട്ടിരിക്കുന്ന പൂജമുറിയിൽകൂടി നോക്കിയത്. ഇത് അകത്ത് നിന്ന് കുറ്റി ഇട്ടിരുന്ന നിലയിലായിരുന്നു.

കത്തി ഉപയോഗിച്ച് പൂജമുറി കുത്തി തുറന്നപ്പോഴാണ് മനസ് തകരുന്ന കാഴ്ച ബന്ധുക്കൾ കാണുന്നത്. ഒരു കാൽ നിലത്തും ഒന്ന് കട്ടിലിലുമായാണ് തൂങ്ങികിടന്നിരുന്ന കുഞ്ഞിനെ കണുന്നത്. ഇതോടെ അലമുറയിട്ട് കരഞ്ഞ ബന്ധുക്കളുടെ ശബ്ദം കേട്ട് ആദ്യം ഓടി വന്നവരിൽ അർജുനുമുണ്ടായിരുന്നു. ജീവനറ്റ കുഞ്ഞിന്റെ ശരീരം ആദ്യം ഏറ്റുവാങ്ങി അനക്കമുണ്ടോയെന്ന് കുലുക്കി നോക്കിയതും അടുത്തുള്ള നഴ്സിന്റെ വീട്ടിലേക്ക് ഓടിയതും അർജുൻ തന്നെ.

പിന്നീട് അർജുന്റെ പിതാവ് ഓടിവന്ന് കുഞ്ഞിനെയും എടുത്തുകൊണ്ട് ആശുപത്രിയിൽ പോവുകയായിരുന്നുവെന്നും കുട്ടിയുടെ ബന്ധുക്കൾ പറയുന്നു. പിന്നീട് സംസ്കാര ചടങ്ങുകൾക്കായി പടുത വലിച്ചുകെട്ടാനും വീട്ടിലെ കാര്യങ്ങൾക്ക് ഓടിയതുമെല്ലാം അർജുനായിരുന്നു. തമിഴ്നാട്ടിൽ നിന്നടക്കം വന്ന ബന്ധുക്കൾക്ക് ഭക്ഷണവും വെള്ളവുമെല്ലാം ഒരുക്കാൻ മുന്നിൽ നിന്നതും പ്രദേശത്തെ ഡിവൈഎഫ്ഐ പ്രവർത്തകൻ കൂടിയായിരുന്ന അർജുനായിരുന്നു.

കുഞ്ഞിനെ കൊലപ്പെടുത്തുന്ന ദിവസവും അർജുൻ പതിവുപോലെ 50 രൂപയ്ക്ക് മിഠായി വാങ്ങിയാണ് പോയതെന്ന് സമീപത്തെ കടക്കാരനും വെളിപ്പെടുത്തിയിരുന്നു. ഇത്തരത്തിൽ മൂന്ന് വയസ് മുതൽ കുട്ടിയെ ഇയാൾ മിഠായി കൊടുത്ത് ലൈംഗികമായി പീഡിപ്പിച്ചുവരുകയായിരുന്നുവെന്ന് അർജുൻ തന്നെ സമ്മതിച്ചു.

കളിക്കുന്നതിനിടെ കഴുത്തിൽ കയർ കുരുങ്ങി മരിച്ചതാണെന്നാണ് തുടക്കത്തിൽ എല്ലാവരും വിശ്വസിച്ചിരുന്നത്. എന്നാൽ പോസ്റ്റ്മോർട്ടം റിപ്പോർട്ടാണ് സംഭവത്തിലെ ഞെട്ടിപ്പിക്കുന്ന രഹസ്യങ്ങളെല്ലാം പുറത്തുകൊണ്ടുവന്നത്. ബന്ധുക്കളടക്കം കുട്ടിയുടെ പോസ്റ്റ്മോർട്ടം ഒഴിവാക്കണമെന്ന് ആവശ്യപ്പെട്ടിരുന്നു. എന്ത് തന്നെയായാലും ഇത്തരം ഇടപ്പെടലുകളെല്ലാം അവഗണിച്ച് പോസ്റ്റ്മോർട്ടവുമായി മുന്നോട്ട് പോയ പൊലീസ് നടപടിയാണ് സംഭവത്തിന്റെ ചുരുൾ അഴിക്കുന്നത്. അപകട മരണമെന്ന് കരുതിയത് പോസ്റ്റ്മോർട്ടത്തിൽ കൊലപാതകമെന്ന് കണ്ടെത്തി.

English summary

Vandiperiyar Child abuse case: six year old girl's family reveals more about accused Arjun