ആദിവാസി യുവതിയെ മര്ദ്ദിച്ച് നഗ്നയാക്കി പരസ്യമായി നടത്തിച്ചു
റായ്പുര്: ആദിവാസി യുവതിയെ മര്ദ്ദിച്ച് നഗ്നയാക്കിയശേഷം സ്വകാര്യ ഭാഗങ്ങളില് പിടിക്കുകയും പരസ്യമായി നടത്തിക്കുകയും ചെയ്തതായി പരാതി. ഛത്തീസ്ഗഡിലെ റായ്പൂരിനടുത്ത് അര്ജുനി ഗ്രാമത്തില് രണ്ടരമാസങ്ങള്ക്ക് മുന്പാണ് സംഭവം. തനിക്കു നേരിടേണ്ടിവന്ന ദുരഭവത്തെക്കുറിച്ച് യുവതി പരാതിപ്പെട്ടെങ്കിലും രണ്ടരമാസങ്ങള്ക്കുശേഷമാണ് അന്വേഷണം നടത്താന് പോലീസ് തീരുമാനിച്ചത്.
പട്ടേല് സമുദായക്കാരായ പ്രദീപ് പട്ടേല്, മുഞ്ചു പട്ടേല്, ഈശ്വര് പട്ടേല് എന്നിവരുടെ നേതൃത്വത്തിലാണ് ഒരുസംഘം യുവതിയുടെ വീട് ആക്രമിക്കുകയും ഭര്ത്താവിനും ബന്ധുക്കള്ക്കും ഗ്രാമവാസികള്ക്കും മുന്നില് വെച്ച് മര്ദ്ദനത്തിന് ഇരയാക്കുകയും ചെയ്തത്. അക്രമി സംഘം ആവശ്യപ്പെടുന്നയാളെ വിവാഹം കഴിച്ചില്ലെന്ന് ആരോപിച്ചായിരുന്നു മര്ദ്ദനം.
സപ്തംബര് 26നായിരുന്നു സംഭവം. ഇതിന് പിന്നാലെ യുവതി പോലീസില് പരാതി നല്കുകയും ചെയ്തു. എന്നാല് ലോക്കല് പോലീസ് പ്രതികളെ സഹായിക്കുന്ന രീതിയാണ് സംഭവത്തെ വിലയിരുത്തിയത്. യുവതിയെയും ബന്ധുക്കളെയും ഭീഷണിപ്പെടുത്തുകയും പരാതി പിന്വലിക്കാന് നിര്ബന്ധിക്കുകയും ചെയ്തു.
അടുത്തിടെ ഛത്തീസ്ഗഡ് സംസ്ഥാന വനിതാ കമ്മീഷനും റായ്പുര് ഐജിക്കും യുവതി വീണ്ടും പരാതി നല്കിയതോടെയാണ് സംഭവത്തില് അന്വേഷണത്തിന് ഉത്തരവിടുന്നത്. അക്രമത്തിന്റെ വീഡിയോ ദൃശ്യങ്ങള് ഉള്പ്പെടെയായിരുന്നു യുവതി ഐജിക്ക് പരാതി നല്കിയത്. പ്രതികള്ക്കെതിരെ കേസ് രജിസ്റ്റര് ചെയ്തെന്ന് പോലീസ് ഉദ്യോഗസ്ഥന് അറിയിച്ചു. സംഭവം ഗൗരവതരമായാണ് എടുത്തിരിക്കുന്നതെന്നും പ്രതികളെ ഉടന് പിടികൂടുമെന്നും പോലീസ് വ്യക്തമാക്കിയിട്ടുണ്ട്.